Read Hmar GALATI 3 Bible Online

GALATI 3 - Hmar bible

GALATI 3

¹Aw, nangni Galati mi invêthai, tûin am a dâwi cheu a, in mithmu ngeiah Isu Krista chu hemdein chiengtaka inlangtir a ni vei leh?

²Hi chau hi in kuoma inthawkin lo hriet ka nuom: Dân thilthawhai leiin am Thlarau chu in hmu a, in ngaithlâka in ring leiin? Hieng lâwm hin in invêt a ni maw?

³Thlaraua ṭan ta siin tisain in zo ding a ni maw?

⁴Thil chuong zât zât chu a thlâwn elin in tuor a ni maw? A thlâwn hlawl el chu ni lo e!

⁵Chun, in kuoma Thlarau petu cheu le nangni laia thilmak thawtu chun Dân thilthawhai leiin am a thaw a, in ngaithlâka in ring leiin?

⁶Abrahamin Pathien a ring a; chu ringna chu a felnaa ruot a ni ang khan.

⁷Chuleiin, hre ro, ringnaa umhai, chuonghai ngei chu Abraham nauhai an nih.

⁸Pathien Lekha thu chun, Pathienin ringna leiin Jentailhai thiem ân changtir ding a nih ti hre lâwkin, “Nangmaa chun hnam tin malsâwmpêkin um an tih,” tiin Abraham kuomah Chanchin Ṭha chu a hril lâwk kha.

⁹Hi lei hin, a ring taphawt chun, Abrahamin a ringa malsawmna a dawng ang chu an dawng ve hlak a nih.

¹⁰Dân thilthawa um taphawthai chu ṭawngse hnuoiah an um si a, “Dân Lekhabua thu ziek po po anga thaw dinga um zing naw taphawt chu ṭawngsephurin an um hlak,” ti ziek a ni si a.

¹¹Chun, Pathien mithmuin tûkhawm Dân leiin thiem chang an um nawh ti ân lang zing a nih, “Ringna leia mifel chu hring a tih,” ti a ni si a,

¹²chun, Dân chu ringnaa inthawk a ni naw a, “Chuong anga thawtu chu chuonga chun hring a tih,” ti a ni lem.

¹³Krista chu ei aia ṭawngsephur chu lo niin, Dân ṭawngsiea inthawk chun a mîn tlan suok ta a; (“Thinga khaikâng taphawt chu ṭawngsephur an nih,” ti ziek a ni si a).

¹⁴Chuongchun, Abraham chunga malsâwmna chu Krista Isua chun Jentailhai chungah hung um thei a ta; chuongchun, ringna leiin Thlarau tiem chu hmu thei ei tih.

¹⁵Unauhai, mihriem angin ka hril hi, mihriem thuthlung khawm ni sien la, sukdet ta hnungin an sût nâwk ta ngai naw a, bel khawm an belsa ngai bawk nawh.

¹⁶Chun, Abraham kuomah a nih thu chu tiema a lo um chu, a chithla kuoma khawm. Mi tamtak chungthu hril angin, “Chithlahai kuoma khawm,” a ti naw a, mi pakhat chungthu hril angin, “I chithla kuoma khawm,” a ti lem a nih, chu chu Krista chu a nih.

¹⁷Chun, hienghin ka ti a nih: Thuthlung Pathienin a lo sukdet ta chu, Dân kum za li sâwmthum hnunga hung um ta khan thutiem chu iengkhawm lova siemin a sukbo naw a.

¹⁸Rohluo ding chu Dân lei a ni chun thutiem lei ni ta naw ni a; nisienlakhawm, Pathienin thutiem leiin a nih Abraham kuoma a pêk chu.

¹⁹Annawleh, iengtiziea Dân chu um am a ni leh: Chithla thutiemna chu a hung hmakhat chu bawsietnahai leiin belsain a um a, vântirkohai hmanga palai kuta rêl a nih.

²⁰Chun, palai hrim hrim mi pakhat inkâra palai a ni ngai naw a; Pathien ruok chu pakhat a nih.

²¹Annawleh, Dân chun Pathien thutiemhai chu a kal am a nih? Teu lo e a! Dân mi sukhringthei hrim hrim pêkin a um ta si chun, felna chu Dân leiin a um ngei ding a nih.

²²Nisienlakhawm, Isu Krista ring leia thiltiem chu ringtuhai kuoma pêk a ni theina dingin, Pathien Lekha thu chun suol hnuoiah iengkim a khârkhip ta vawng a.

²³Nisienlakhawm, ringna a hung tlung hma khan, ringna hung inlang ding ta dinga khârkhipa Dân hnuoia vêng ei ni kha.

²⁴Chuongchun, Dân chu ringna leia thiem ei chang theina dinga Krista kuom tienga a mi keihruoitu a lo nih.

²⁵Nisienlakhawm, tuta ringna a hung tlung hnung hin, keihruoitu hnuoiah ei um ta naw a.

²⁶Isu Krista ring leiin Pathien nauhai in ni vawng si a.

²⁷Nangni laia Kristaa baptisma chang phawthai kha Krista chun in inthuom ta si a.

²⁸Chutaka chun Juda mi an um thei naw a, Grik mi khawm an um thei bawk nawh; suok an um thei naw a, suoknaw khawm an um thei bawk nawh; nuhmei le pasal khawm an um thei nawh; Krista Isua chun in rêngin pumkhat in ni si a.

²⁹Chun, Krista ta in ni chun, Abraham thla, thutiem anga rohluotu dinghai in nih.