Read Hmar GALATI 4 Bible Online

GALATI 4 - Hmar bible

GALATI 4

¹Nisienlakhawm, hienghin ka ti a nih: Rohluotu ding chu iengkim chunga hotu ni sien la khawm, naupang a la ni sûng chu suok leh danglamna a la nei chuong nawh.

²A pa ruot hun chu a hung tlung hmakhat chu vêngtu le enkawltuhai hnuoiah a um lem a nih.

³Chuong angin eini khawm naupang ei ni lai khan, khawvêl A AW B[1] hnuoiah suokin ei um.

⁴Nisienlakhawm, a hunbi a hung kim khan, Pathienin a Naupa, nuhmei inei, Dân hnuoia hung piengin, a tir suok ta a,

⁵nau nina ei hmu theina dinga Dân hnuoia umhai chu intlan dingin.

⁶Chun, nau in ni leiin Pathienin a Naupa Thlarau chu, “Abba! (Pa!)” tia khêkin, ei lungrilah a hung tir a.

⁷Chuongchun, suok i ni ta naw a, nau i ni lem; chun, nau i ni chun Pathien zâra rohluotu ding i nih.

⁸Nisienlakhawm, khânga Pathien in hriet naw lai khan, an piengzie hrim khawma Pathien ni dêrlohai suok in na.

⁹Tuta Pathien in hung hriet hnung hin chu, ti nêk hmanin, Pathien mi hriet in hung ni hnung hin chu, ti ding a ni lem. Khawvêl A AW B derdêp le teplo mei mei, a suoka um nâwk in inhâwkhai tienga chun, iengtiziea nghakîr nâwk am in na?

¹⁰Nihai, thlahai, hunhai, kumhai in inser hlak.

¹¹In ta dingin tha ka sêng thlâwn el rawi am ti hi kân lau pêk cheu.

¹²Unauhai, ka ngên cheu a nih, keia angin um ro, kei khawm nangni angin ka um si a. Ka pawi iengkhawm in tâwk nawh.

¹³Chanchin Ṭha in kuoma ka hril hmasak ṭum kha, ka taksa hrâtnawna lei a nih ti in hriet si a.

¹⁴Chun, ka taksaa in ta dinga thlêmna um chu in hmusit naw a, in tirdak naw bawk a; Pathien vântirko angin, Krista Isu ang elin, in mi lâwm lem ta kha.

¹⁵Vângnei in intina kha khâwlai am a um ta a? Thaw thei ruol chu ni lem sien la, nangnîn in mithai kheldawkin mi pe tâng in tih ti ka hriet pêk cheu in sawnnaw.

¹⁶Chuongchun, thu indiktak ka hril cheu leiin in hmêlma ka lo ni tah a ni maw?

¹⁷Ṭhat tiengah ni dêr si lovin, nasatakin an ngaisak hlak cheu a, anni in ngaisak theina dingin keinia inthawka ṭhethlâk cheu tum an ni tak.

¹⁸Thu ṭha tienga ruok chu, ieng lai khawmin, ṭhahnemngaitaka zawnga um rawp hi a ṭha a nih, in kuoma ka um lai chau ni lovin.

¹⁹Ka nauhai, Krista chu nangnia siem puitlinga a um hmakhat chu nauha invawiin kân vawi nâwk cheu hi.

²⁰Anih, tulai hin in kuoma uma ka rawl sukdanglam kân hâwk thei zie chu, in chungthuah ka lunginzîng si a.

²¹Dân hnuoia um nuomhai, mi hril ta u, Dân thu chu in ngai hlak naw am a nih?

²²Hieng ang hin ziek a ni si a, “Abrahamin naupasal pahni a nei a, pakhat chu a suoknu leh, pakhat chu a suoknawnu leh.

²³Nisienlakhawm, suoknu le nau chu tisa dân angin a pieng a, suoknawnu le nau ruok chu thutiem leiin a pieng a nih,” ti hi.

²⁴Chuong thu chu tekhina a nih: chuong nuhmeihai chu thuthlung pahni an nih, pakhat chu Sinai tlânga mi suok ni dinga nau neitu chu, chu chu Hagar a nih.

²⁵Chun, Hagar hi Arabia rama Sinai tlâng chu a nih[2] Jerusalem tulaia um le hin angkhat an nih; a nauhai leh suokah an um si a.

²⁶Chungtieng Jerusalem ruok chu suok a ni naw a, chu ngei chu eini nu a nih.

²⁷“Nang ching, nau nei ngai lo hlim rawh. Nang nauha invawi ngai lo khêk suok rawh; Pasal nei mi nêk chun khawsâwtnu chun Nauhai a nei tam lem si a,” ti ziek a ni kha.

²⁸Chuongchun, unauhai, eini hi Isak ang khan thutiem nauhai ei nih.

²⁹Chun, chuong lai chun, tisa dâna hung pieng khan, Thlarau dâna hung pieng chu a suknawmna a, tu khawm hin chuong ang bawk chu a nih.

³⁰Nisienlakhawm, Pathien Lekha thuin iengtin am a hril a? “Suoknu chu, a naupa leh hnawtdawk rawh, suoknu naupa chun suoknawnu naupa chu ro a hluopui âwm si naw a,” a ti a.

³¹Chuongchun, unauhai, suoknu nauhai ei ni naw a, suoknawnu le nauhai ei ni lem.