Read Hmar GALATI 5 Bible Online

GALATI 5 - Hmar bible

GALATI 5

¹Suok ni lo dingin Krista chun a mîn suoktir kha; chuongchun, ngir det unla, suok ringkawla chun intâng nâwk ta naw ro.

²Ngai ta u, kei Paulain in kuomah ka hril hi, ser in intantir chun Krista chu in ta dingin iengkhawm ṭhahnemna ni naw nih.

³Anih, Dân thu po po zâwm dinga battu an nih ti, ser intantir taphawt kuomah kân hriettir nâwk a nih.

⁴Nangni Dâna thiem chang tumtuhai, Krista leh in inṭhe ta a, lunginsietna chu in tlûksan tah.

⁵Keini chun Thlarau zârah ringnain felna beiseina kan nghâk si a.

⁶Krista Isua chun sertan iengkhawm a ṭhahnem naw a, sertannaw khawm iengkhawm a ṭhahnem chuong nawh, ringna hmangainaa thaw ruok chu a ṭhahnem a nih.

⁷Ṭhatakin in tlân hlak kha, thutak chu in zâwm nawna dingin tuin am a hluo ta cheu a?

⁸Hi thlêmna hi a kotu cheua inthawk a ni nawh.

⁹Chawl tlâwmtêin bei tlang chu a pumin a fang suok hlak.

¹⁰Ngaituo danglam naw ti niu ti Lalpaa chun kei chun nangni tieng ka ring cheu a nih; nisienlakhawm, a sukbuoitu cheu chu, tûkhawm ni sien la, a chunga rorêlna chu la tuor a tih.

¹¹Unauhai, keiin sertan thu ka la hril rawp si chun, ieng dinga suknawmnata la um rawp am ka na? Chuong ang a ni si chun kraws insuina chu sukbo ni tâng a tih.

¹²A sukbuoitu cheu chu intan thla law law sien ka nuom a nih.

¹³Nangni, unauhai, suok ni lo dinga ko in ni si a; nisienlakhawm, suok in ni nawna chu tisa ta dinga remchângah hmang naw unla, hmangainain rawng inbâwl tuo pêk seng lem ro,

¹⁴“Nangma în hmangai angin i vênghai i hmangai ding a nih,” ti thu baukhata hin Dân thu po po chu a famkim tah a ni si a.

¹⁵Nisienlakhawm, in inse a, in infâk tuo si chun, in insukbohmang tuo nawna dingin fîmkhur ro.

¹⁶Chuongchun, hi hi ka ti a nih: Thlarauah um ro; chuongchun, tisa châkna chu in zâwm naw ding annâwm.

¹⁷Tisa hin Thlarau dona tieng ân hâwk hlak, Thlarau khawmin tisa dona tieng ân hâwk bawk si hlak a, thil thaw in itumhai chu in thaw thei nawna dingin chuonghai chu an inkal si a.

¹⁸Nisienlakhawm, Thlarau ṭhuoia in um chun, Dân hnuoia chun in um nawh.

¹⁹Chun, tisa thilthawhai chu ân lang fel a nih; chuong chu hieng hi an nih: inditna dâm, inthiengnawna dâm, hurna dâm,

²⁰milim biekna dâm, dawithiemna dâm, theidâna dâm, inhalna dâm, thîkna dâm, lungsenna dâm, mani hmasielna dâm, insuktumna dâm, ring tumna dâm,

²¹thîkthusietna dâm, zu inruina dâm, zu hmun hlimna dâm, chuong anghai chu, chuong kawnga chun kha hmaa, “Chuong ang thil thawtuhai chun Pathien ram hluo naw ni hai,” tia ka hril lâwk cheu ang khan, ka hril nâwk cheu hi.

²²Thlarau ra ruok chu hmangaina dâm, hlimna dâm, inremna dâm, dawtheina dâm, ngilneina dâm, ṭhatna dâm, ringumna dâm,

²³thuhnuoirawlna dâm, insûmthei na dâm a ni lem: chuong ang kal zâwngin Dân thupêk hrim a um nawh.

²⁴Chun, Krista Isu mihai chun tisa chu a suol ngaituona le a châknahai pumin an hemde tah.

²⁵Thlaraua hring ei ni chun, Thlaraua ṭhuoi ang peiin um ei tiu.

²⁶Inchotuoin, in itthîktuoin inngaihlu nâwng ei tiu.