Read Hmar GALATI 6 Bible Online

GALATI 6 - Hmar bible

GALATI 6

¹Unauhai, mi suol iengkhawm a thaw laia phâwkin um sien la, nangni thlarau mihai, “Thlemna tuok ve rawi ka tih,” tia invêng ṭha pumin chuong ang mi chu thuhnuoirawltakin tungding nâwk ro.

²In rikphurhai chu insâwngtuo ro; chuongchun, Krista dân chu in zâwm nîng a tih.

³Mi iengkhawm ni si lovin, mi lien deua ân ngai chun, ân hlêm fâwm el a ni si a.

⁴Mi tinin mani thilthaw infie seng lem raw hai se, chu hnunga chun, mi dang chungah ni lovin, mani chung chauah suong ding nei an tih.

⁵Mi tinin mani phur an phur seng ding a ni si a.

⁶Chun, thu inchûktir dawngtu chun, thilṭha po po inchûktirtu kuomah pe ve raw se.

⁷Hlêmin um naw ro; Pathien chu hmusit zie a ni nawh; miin a ithe ang ang, chu bawk chu a sîk ding a ni si a.

⁸Mani tisa tienga thetu chun tisaa sietna chu sîk a tih; Thlarau tienga thetu ruok chun Thlaraua chatuona hringna a sîk ding a nih.

⁹Chuongchun, thil ṭha thaw chu nghawk nâwng ei tiu, ei inhlêmsan naw chun a hun taka chun ei sîk ngei ding a nih.

¹⁰Chuongchun, remchâng hun ei nei ang peiin mi po po kuomah thil ṭha chu thâwng ei tiu, ringna sûnghai laia mi chungah thaw bîk tak ei tiu.

¹¹Keima kut ngeiin in kuomah lekha inhrawl pherphura ka ziek hi en ta u.

¹²Tisaa hmêl insukmawi nuomhai poin sertana um dingin an tir lui hlak cheu a nih; ieng dang lei khawm a ni naw a, Krista kraws leia suknawmnatna an tuor nawna ding chau a nih.

¹³Sertanhai meu khawm chun Dân thu an zâwm chuong si naw a; in taksaa chun suong ding an nei theina dingin ser intantir cheu an nuom el a nih.

¹⁴Kei ruok chun ei Lalpa Isu Krista kraws naw chu ka suong naw ding zie chu, chu zâra chun khawvêl hi ka ta dinga hemdein a um tah, kei khawm khawvêl ta dinga hemdein ka um a nih.

¹⁵Siem thar nâwkna naw chu sertan hi iengkhawm a ni naw a, sertannaw khawm iengkhawm a ni chuong bawk nawh.

¹⁶Chun, chu dân anga um taphawthai chunga chun inremna le lunginsietna um raw se, Pathien Israelhai chunga khawm.

¹⁷Tuta chen chu tûkhawmin mi sukbuoi ta naw raw hai se, ka taksaa hin Isu inchiknahai ka put si a.

¹⁸Unauhai, Lalpa Isu Krista lunginsietna in thlarau kuomah um raw se. Amen.