Read Hmar EPHESI 2 Bible Online

EPHESI 2 - Hmar bible

EPHESI 2

¹Nangni khawm in bawsiet le in suolhai leia thi in ni lai khan, a sukhring cheu a nih,

²chuongahai chun inhma khan hi khawvêl dân angin in um kha, boruoka thuneina lal, tuta awinaw nauhai sûnga sin thaw zingtu thlarau dân ang hin.

³Chuong ringnaw nauhai laia chun, eini khawm inhma chun tisa le lungril nuomzâwng thawin, ei tisa châknahai angin ei um vawng a, mi danghai angin lunginsenna naua insieng hrim ei ni kha.

⁴Nisienlakhawm, Pathien chun lunginsietna a hauin, a mi hmangaina nasatak lei khan,

⁵ei bawsietna leia thi ei ni lai meu khawmin, Krista ruolin a mi sukhring ve a, (lunginsietnaa sandam in ni tah),

⁶Krista Isua chun ama ruol bawka mi keithoin, vân hmunhaiah ama kuom ngeiah a mîn ṭhungtir ta a,

⁷Chuongchun, hun la hung tlung dinghaia chun Krista Isua hin ei chunga ngilneiin, a lunginsietna nasatzie chu inentir thei a tih.

⁸Ringna leia lunginsietnaa sandam in ni si a, chu khawm chu nangnia inthawka suok a ni naw a, Pathien thilpêk a nih.

⁹Thilthaw lei a ni nawh; chuong naw chun, miin suong rawi an tih.

¹⁰Thil ṭha thaw dinga Isu Kristaa chun siema umin, ama kut suok ei ni si a, chu thil ṭha thaw chu ei umna dingin Pathienin a buotsai lâwk a nih.

¹¹Chuleiin, hi hi hre zing ro: Inhmaa nangni pieng dâna Jentail, taksa kuta hmanga “Sertan” an tihaiin, “Sertannaw,” an tihai,

¹²khâng lai khan Krista boin, Israel khuoletui leh intuolkhat lovin, khawvêla hin beiseina hrim nei lo le, Pathien boa umin, tiemna thuthlunghaia mikhuola in um kha.

¹³Tu ruok hin chu Krista Isuah, nangni inhmaa hlataka umhai kha, Krista thisen chun sukhnaiin in lo um ta a.

¹⁴Ama chu ei inremna a nih, pâwl hnihai chu pumkhata siemin, an inkâr ping dangna bang chu a sukchim a;

¹⁵ama chun intaina, (ser le sâng thilhaia thupêk Dân um chu), a taksaa sukboin, amaa chun pahnihai chu mihriem thar pumkhata siem a, inremna a siem theina ding le,

¹⁶kraws zâra taksa pumkhata pahnihai chu Pathien le ân remtir theina dingin: chu kraws chun intaina chu a sukhlum si a.

¹⁷Chun, a hungin nangni hlataka umhai kuomah inremna Chanchin Ṭha a hril cheu a, hnaitaka umhai kuoma khawm Chanchin Ṭha a hril bawk a.

¹⁸Ama zârin Thlarau hmunkhata, Pa kuoma lût theina ei nei ve ve a nih.

¹⁹Chuongchun, tuhin mikhuol le mi châm el in ni ta naw a, mi inthienghai le chun tuol khat le Pathien sûnghai in ni ta lem a nih.

²⁰Isu Krista ngei chu a kia lung pawimawtak niin, tirkohai le zâwlneihai lungphûm chunga bâwl in nih.

²¹Amaa chun lung rem tum senghai, inremtaka inchuktuokin, Lalpaa chun biekin inthiengah ân chang pei hlak a,

²²nangni khawm amaa chun, Thlaraua Pathien umna dinga rem khâwm in nih.