Read Hmar EPHESI 5 Bible Online

EPHESI 5 - Hmar bible

EPHESI 5

¹Chuongchun, a nau dittakhai angin Pathien umdân latuhai ni ro.

²Chun, Kristain a hmangai cheu a, riminhnik dinga Pathien kuoma thil inhlâna ding le, inthâwinaa ei aia ân pêk ang bawk khan, hmangainaah um ro.

³Nisienlakhawm, mi inthienghai thawa mawi âwm tak hrimin, inditna le inthiengnawna po po, duamna leh nangni laiah a sâma sâm khawmin um naw raw se;

⁴zâmaw dâm, thu teplo dâm, fiemthu dâm khawm, chuong chu a mawi naw a nih; chuong ti nêk chun lâwmthu hril lem ro.

⁵Indithmang le mi inthiengnaw le mi duâm hrim hrim chu, (mi duâm chu milim betu a nih), Krista le Pathien rama chun chan hrim an nei nawh ti in hriet hle si a.

⁶Tûkhawmin thu teplo mei meiin hlêm naw raw se cheu, chuong thil lei chun Pathien lunginsenna chu ringnaw nauhai chungah a tlung hlak si a.

⁷Chuleiin, anni inṭawmpui naw ro.

⁸Inhma khan inthim in na, tu ruok hin chu Lalpaa chun var in hung ni ta hi, var nauhai angin um ro,

⁹(var[3] ra chu ṭhatna le felna le thutak po poah ânlang si a).

¹⁰Lalpa lâwmzâwng ieng am a na ti infie pei bawk unla.

¹¹Chun, inthim thilthaw ra nei ngailohaia chun ṭhangna hrim nei naw ro, ṭhang nêk hmanin a thiemnawzie inhriettir lem ro;

¹²inrûka an thil thaw hlakhai chu a hril khawm inzak a um si a.

¹³Amiruokchu, thil tinrêng a thiemnawzie inhriettira um hi var isuklang a ni hlak,

¹⁴suklanga um taphawt chu var a ni si a[4]. Chuleiin, “Nang a in! meng la, Mithi laia inthawkin tho rawh. Chuongchun, Krista chun, Hung ên var a ti che,” a ti kha.

¹⁵Chuongchun, mi varnawhai anga um lovin, mi varhai anga um lemin, in um dânah fîmkhur ro.

¹⁶Nihai hi a ṭhat naw leiin remchângnahai inchaw pei ro.

¹⁷Chuleichun, invêt nuom naw unla, Lalpa ditzâwng ieng am a na ti lo hre lem ro.

¹⁸Chun, uoin inruiin um naw ro, chutaka chun insûm nawna a um si a; Thlaraua sipin um lem ro.

¹⁹Inpâkna hlahai, Pathien hlahai, thlarau tieng hlahaia inbe tuoin, Lalpa chu in lungrilah hla sakpêkin, ṭingṭang kei pêk ro.

²⁰Ei Lalpa Isu Krista hmingin, Pathien, Pa ngei kuoma chun, iengkim chungah lâwmthu hril ro.

²¹Krista ṭi dêkin intuklût tuo seng ro.

²²Nuhmeihai, Lalpa kuoma in intuklût ang hin mani pasalhai kuomah intuklût seng ro.

²³Krista chu ama ngei taksa sandamtu nia, kohran lu a ni ang bawk hin, pasal chu a nuhmei lu a ni si a.

²⁴Chuongchun, kohran chu Krista kuoma ân tuklût ang bawkin, nuhmeihai chu iengkimah an pasalhai kuomah intuklût raw hai se.

²⁵Pasalhai, in nuhmeihai hmangai ro, Kristain kohran a hmangai a, a aia ama ân pêk ang khan,

²⁶kohran chu tuia sâwpa, thu chun sukfaia ân thieng theina dingin;

²⁷fainawna kai lo le, zûr lo le, chuong ang thil hrim put lova, inthieng le hmêlhem nawa um lemin, ama kuoma vêk kohran ropui taka a pêk theina dingin.

²⁸Chuong ang bawkin pasalhai khawmin mani taksa angin mani nuhmeihai chu an hmangai ding a nih. Mani nuhmei hmangaitu chu mani inhmangai a nih.

²⁹Tukhawmin, mani taksa a theida ngai si naw a, a châwmin a duot lem hlak a nih.

³⁰Kristain kohran a châwma a duot ang hin; a taksa pênghai ei ni si a.

³¹“Chuleiin, pasalin a nu le pa mâksanin a nuhmei chel a ta, chun, an pahni chun tisa pumkhat hung ni tâng an tih.”

³²Chu thurûk chu a ropui a nih; nisienlakhawm, kei chun Krista le kohran thu ka hrilna a nih.

³³Iengkhawm ni sien la, nangni laia mi tûkhawmin mani ân hmangai ang bawkin, mani nuhmei hmangai seng raw hai se; nuhmei khawm chu a pasal ṭi dêk dingin fimkhur raw se.