Read Hmar PHILIPPI 4 Bible Online

PHILIPPI 4 - Hmar bible

PHILIPPI 4

¹Chuleiin, ka unau dittak le ka ngaitak, ka lâwmna le ka lallukhumhai, chuong ang chun Lalpaah ngîr det ro, ka dittakhai.

²Lalpaa chun lungril hmunkhat put dingin Eodi ka ngên a, Suntuki khawm ka ngên bawk a nih.

³Anih, nang khawm ka rîngkawl bâtpui tak, ka fiel bawk che, kha nuhmeihai kha ṭhangpui rawh. Chanchin Ṭhaa chun an mi thawpui hlak si a; Klemen le ka sinthawpui dang Hringna bua hming chuonghai le khan.

⁴Lalpaa chun lâwm rawp ro, ti nâwk hlak ka tih lâwm ro. In dawtheizie mi po po hriet ni raw se.

⁵Lalpa chu a hnai a, ienga khawm lunginzing naw ro.

⁶Iengkimah ṭawngṭaina le hninain, lâwmthu hrilsa peiin in dithai chu Pathien kuomah inhriettirin um lem raw se.

⁷Chuongchun, Pathien thlamuonna, lungril hrim hrima hriet sênglo khan, in lungril le in ngaituonahai chu Krista Isua chun vêngpêk a ti cheu.

⁸A tâwp taka chun, unauhai, ân dik taphawt dâm, ân zâum taphawt dâm, a fel taphawt dâm, ân thieng taphawt dâm, a ditum taphawt dâm, ân thang mawi taphawt dâm, ṭhatna hrim hrim a um a, inpâkna hrim hrim a um chun, chuong chu ngaituo ro.

⁹Keimaa thil in inchûka in pawmhai dâm, in hmua in hriethai dâm, khâng thilhai kha thaw hlak ro. Chuongchun, Lungmuongna Pathien chun umpui a ti cheu.

¹⁰Nisienlakhawm, ka ta dinga in ngaituona chu tûta in hung thâwthar nâwk ta leiin, Lalpaa chun ka lâwm hle a nih; chuong ang kawng chu ngaituo kha chu in ngaituo hle a, remchâng ruok chu in hmu naw mei a ni kha.

¹¹Ka tlâksamna thu hril chu ka ni naw a, a kei chu ieng ang khawmin um lang lungawi pei ka chîng ta si a.

¹²Tlâwmtaka um dân ka thiem a, hausaa um dân khawm ka thiem bawk a, thil tinrêng le thil po poa tlai le phîngṭama um dân, hausa le tlasama um dân thurûk chu ka hriet suok tah.

¹³A mi sukhrâttu Krista zâra chun iengkim ka thaw thei a nih.

¹⁴Nisienlakhawm, ka lunginzîngnaa in mi lo lunginzîngpui hi in thaw ṭha ngawt el.

¹⁵Chun, nangni Philippia mihai, Chanchin Ṭha tlung hlim laia Makedonia rama inthawka ka fe suok lai khan, nangni chau naw chun, kohran pakhat khawmin thil, pêk le dawng kawngah an mi ṭhangpui nawh ti nangni ngeiin in hriet bawk a.

¹⁶Thessalonikaa ka um lai khawm khan, ka tlâksamna phuhrûk dingin[4] vawi khat chau ni lovin, vawi hni lai in hung inphur kha,

¹⁷Thilpêk chu zawng ka ni naw a, ra nangni tienga pung ding chu zawng ka ni lem.

¹⁸Nisienlakhawm, iengkim ka nei a, ka hau a nih: Epaphrodita kuta in iengkhat hung inphurhai kha ka lo hmu a, ka phuiinsui tah. Chuongchu thil riminhnik rim, inthâwina dawn tlâk, Pathien lâwm zâwng a nih.

¹⁹Chun, ka Pathien chun Krista Isua a ropuina hauzie ang peiin, in tlâksamna tinrêng khawm phuhrûkpêk a ti cheu.

²⁰Ei Pathien le ei Pa kuoma chun kumkhuoin ropuina chu um raw se. Amen.

²¹Krista Isua mi inthieng tinrêng chibai mi bûkpêk ro. Ka kuoma unau umhai hin chibai an bûk cheu a.

²²Mi inthieng po poin chibai an bûk cheu a; abîktakin Kaisar sûnghai laia mihai hin an bûk cheu a nih.

²³Lalpa Isu Krista lunginsietna chu in thlarau kuomah um raw se.