Read Hmar KOLOSSA 1 Bible Online

KOLOSSA 1 - Hmar bible

KOLOSSA 1

¹Paula, Pathien dit zâwnga Krista Isu tirko le Timothe, ei unaupa chun:

²Kolossaa Kristaa mi inthienghai le unau ringumhai kuoma chun, Pathien ei Pa kuoma inthawka lunginsietna le inremna in kuomah um raw se.

³In ta dinga ṭawngṭai rawpin, Pathien ei Lalpa Isu Krista Pa kuoma chun lâwmthu kan hril hlak:

⁴Chu chu, Krista Isua in ringna le mi inthieng po pohai chunga in hmangaina chu kan lo hriet leiin le,

⁵vâna in ta dinga beiseina siepêka in um leiin a ni a; Chanchin Ṭha thutak thua in lo hriet ta lei khan a nih.

⁶Chu Chanchin Ṭha chu, khawvêl pumpuiah malsâwmna hung intlunin a pung pei a; chuong ang takin in kuoma khawm a hung tlung a; titakzeta Pathien lunginsietna chu ngaia in hriet ni chena inthawk khan chu nangnia khawm rain a pung pei a ni kha.

⁷Epaphra, kan suok chanpui dittaka inthawka in inchûk ngei kha a nih. Ama hi kan aiawa Krista rawngbâwltu ringumtak a na.

⁸Thlarauin nangnia hmangaina ân neitir cheu thu keini mi hriltu kha a ni bawk.

⁹Chuleichun, Thlarau tieng varna le hriet theina po poa a dit zâwng hrietnaa chun in hung sip theina dingin, kan hriet nia inthawk chu keini khawma ṭawngṭai le hnipêk cheu kan ma nawh.

¹⁰Chuongchun, sinthaw tinrênga hung ra a, Pathien hrietna kawnga hung inṭhang deu deu a, kawng tinrênga ama suklungawi dinga Lalpa zui tlâka in um theina ding le,

¹¹hlimtaka selna le dawtheina tinrêng nei dinga a ropuina hrâtzie ang peia hrâtna tinrênga sukhrâta in um theina dingin kan ngênpêk cheu.

¹²Pa, vara mi inthienghai ro chu inṭâwmpui tlâka mi hung siemtu, kuoma chun lâwmthu hril pei bawkin.

¹³Ama chun inthim thuneinaa inthawka mi sansuokin, a Naupa hmangaitak rama chun a mîn kai tir ta a,

¹⁴amaa chun ei intlanna ei hmu a nih-ei suolhai ngaidamna chu

¹⁵Ama chu hmu thei naw Pathien angpui, nau lutîr, thilsiemhai po po nêka chunghnung lem a nih.

¹⁶Amaa chun iengkim siem a ni si a; vâna umhai, hnuoia umhai leh, hmu thei lo le hmu theihai le chun, lalṭhungphahai khawm, rorêlnahai khawm, inlalnahai khawm, thuneinahai khawm, iengkim amaa chun, ama ta ding bawka siem a nih.

¹⁷Chun, ama hi chu iengkim um hmain a um hrim a nih, amaa chun iengkim a ngir khâwm bawk a nih.

¹⁸Ama chu a taksa Kohran lu a na, iengkima a chunghnung tak a hung ni theina dingin, a bulpui, mithi laia inthawka tho hmasatak chu a nih.

¹⁹Pa lungni zâwngtak chu hi hi a ni si a: Pathien famkimna tinrêng chu amaa a um zing le,

²⁰a kraws thisen chun inremna hung siemin, amaa chun iengkim, ama ngeia chun hnuoia thil umhai le vâna thil umhai khawm, ama le inremtir hi.

²¹Chun, nangni inhmaa in thil suksuolnaa khan amaa inthawka ṭhein in lo um a, in lungrila chun hmêlma in lo ni bawk kha.

²²Tu ruok hin chu a taksa thina leiin, thienghlim le sawiselbo le hmelhemlova a hmaa in um theina dingin ama leh a sukrem ta cheu a nih.

²³Amiruokchu, in ringna chun innghatsan neiin dettakin in um ding a nih. Chanchin Ṭha in ihriet beiseinaa inthawk sawn hmangin um naw ro. Chu Chanchin Ṭha chu vân hnuoia thilsiem po po laia tlânginsampui a ni kha; kei Paula hi, chu rawngbâwltua siem chu ka nih.

²⁴Tuta ka tuorpêkna cheua hin ka lâwm a, Krista rinum tuor bâk chu a taksa leiin ka taksaa hin ka sunzawm pei a nih, a taksa chu kohran hi a nih.

²⁵Pathien thu hril kim dinga enkawlna sin Pathienin in ta dinga a mi pêk ang peiin chuonghai rawngbâwltua siem ka nih.

²⁶Chu Pathien thu chu chatuon le suon um chena inthawka thurûk inthup kha a nih; tu ruok hin chu a mi inthienghai kuoma inlangtirin a um tah.

²⁷Chuonghai kuoma chun Jentailhai lai chu thurûk ropuina hauzie chu Pathienin inhriettir a nuom hrim a nih: chu thurûk chu Krista nangnia um ropuina beisei san chu a nih.

²⁸Mi tin Kristaa chun ṭha famkima kan inngîrtir theina dingin, mi tin infuiin, mi tin varna tinrênga inchûktirin a chanchin kan hril hlak hi;

²⁹chuong anga inngîrtir thei dingin, nasataka keimaa sin a thaw, chu a sinthaw ang peia thaw ṭâlin, ka thaw hrim bawk hlak a nih.