Read Hmar KOLOSSA 2 Bible Online

KOLOSSA 2 - Hmar bible

KOLOSSA 2

¹Nangni le Laodikeia umhai le, taksaa ka hmêl hmu naw phawthai ta dingin iengti raua nasain am ka thaw pêk ṭâl ṭâl zie cheu hi in hriet ka nuom si a.

²An lungrilah thlamuongna nei a, hmangainaa insuikhâwma, kawng tinrêngah hrietchiengna hau a, Pathien thurûk, Krista ngei chu an hrietchieng thei ka nuom a nih.

³amaa chun varna le hrietna ro po po thupin a um si a.

⁴Tûkhawma bau thiema an hlêm nâwna ding cheuin, chuong chu ka ti a nih.

⁵Ka taksain in kuomah um naw lang khawm, in felzie le Krista in ring detzie hre zingin lâwmtakin thlaraua chun in kuomah ka um si a.

⁶Chuleiin, Krista Isu, Lalpa chu in pawm ang khan amaa chun um ro.

⁷Amaa zung kei le, rem sâng deu deua umin, an inchûktir ang cheu khan, lâwmthu hrilna hauin, in ringnaa chun dettakin um ro.

⁸Fimkhur ro, chuong naw chun, tûkhawmin Krista thu ang ni lovin, mihriem thurosie le khawvêl A AW B[1] ang lemin an thu var le hlêmna mei meiin râl lâkin la rawi an ti cheu.

⁹Amaa chun Pathien famkimna tinrêng chu taksa neiin a um zing si a.

¹⁰Amaa chun in famkim ta bawk a, ama chu inlalna le thuneina po po lu a nih.

¹¹Krista sertannaa chun mihriem tisa suol chu hlîp vawngin, ama bawka chun kuta sertan ni lova sertan in ni kha.

¹²Baptismaa chun a kuoma phûm in lo ni ve ta si a, chu bawka chun mithi laia ama keithotu Pathien sinthaw awi leia a kuoma keitho in ni ve kha.

¹³Chun, nangni bawsietnahai le tisaa sertan nâwna leiin thi in lo ni a, nangni ngei chu ama leh a sukhring cheu in ni kha. Ei bawsietnahai po po a mi ngaidam a.

¹⁴Batna lekha thupêka ziek, ei chunga um a mi kal hlaktu chu a thaibo ta si a; chu ngei chu krawsa hemdein a lâk hmang ta a.

¹⁵Chun, inlalna le thuneinahai chu hlîp thlain, chu krawsa chun chuonghai chu hnein, ân langa inhriettirnain a hmang ta a.

¹⁶Chuongchun, fâk thua manih, dâwn thua manih, ruoiṭhe ni thua manih, thla thar thua manih, châwlni thua manih tûkhawmin sawisêl naw raw hai se cheu;

¹⁷chuonghai chu thil hung tlung dinghai hlim a nih, a tak ruok chu Krista ta a nih.

¹⁸Mâni insukhnuoi fâwmna le vântirko biekna ngaisâng a, inlârnaa innghat a, an tisa tieng nuom zâwng hlêmna mei meia insukpuithu mi an um a; chuong ang mihai chun in lâwmman chu inchântir naw raw hai se cheu.

¹⁹Lu chu an chel tlat si naw a. Ama, Lua chun, taksa hlawmpui chu, inzawmna le khuopnahaia châwm le inzawmkhâwma umin, Pathien inṭhang liennain ân ṭhanglien hlak a ni si a.

²⁰Khawvêl thlarau thilhai chu Kristaah in thisan ta si chun, iengleia hi khawvêl mi anga la um rawp am in ni a?

²¹“Them naw la, intem naw la, tâwk bawk naw” ti mihriemhai dân siemfâwm le inchûktirna hnuoia hin in intuklût am?

²²Chuonghai chu hmang puma bohmang ding a nih.

²³Hieng vântirko biek ding ti dâm, mâni insukhnuoi ti dâm le, taksa sukrinum ding tihai hi thaw âwm takin ân lang ngei; nisienlakhawm, taksa nuom zâwng hnêna ding chun iengkhawm a ṭhahnem chuong dêr nawh.