Read Hmar KOLOSSA 3 Bible Online

KOLOSSA 3 - Hmar bible

KOLOSSA 3

¹Chuongchun, Krista kuomah keithoin in um ve ta chun, chung tieng, Pathien changtienga ṭhung Krista umnaa thil umhai chu zawng ro;

²chung tienga thil umhaia chun in lungril innghat tlat ro, hnuoia thil umhaia chun innghat lovin.

³In thi ta a, in hringna chu Pathiena chun Krista kuomah thupin a um si a.

⁴Krista in hringna chu a hung inlâr pha chun nangni khawm ama kuomah ropuiin inlâr vêng in tih.

⁵Chuongchun, nangnia um hnuoi tieng thilhai chu sukhlum ro, inditna dâm, inthieng nawna dâm, hurna dâm, châkna suol dâm, duâmna dâm hi, duâmna chu milim biekna a ni si a.

⁶Chuong thilhai lei chun a nih Pathien lunginsenna chu awi naw nauhai chungah a hung tlung hlak chu.

⁷Nangni khawm inhmaa chuong ang thilhaia in hring lai khan, chuonghaia chun in um hlak kha.

⁸Tu ruok hin chu nangni khawmin hieng po po, inngâwkna dâm, lunginsenna dâm, theidâna dâm, hrilsietna dâm, in baua suok ṭawng zâmawhai hi sukbo ro.

⁹Khêl inhril tuo naw ro, mihriem hlui chu a thilthawhai leh in hlîp thlâk ta a.

¹⁰Mihriem thar chun in inthuom ta si a, chu mihriem thar chu, hriet famkimna nei dingin a siemtu angpui anga siem tharin a um mêk a nih;

¹¹chutaka chun Grik mi le Juda mi, sertan le tan lo, hnamchawm dâm, Skuthia mi dâm, suok dâm, suok naw dâm khawm an um thei nawh, Krista chu iengkim ni lemin, iengkimah a um bawk a nih.

¹²Chuongchun, Pathien mi thlang, mi inthieng le dittakhai angin inlainatna lungril dâm, ngilneina dâm, inngaitlâwmna dâm, thuhnuoirawlna dâm, dawtheina dâm chun inthuom ro.

¹³Tûkhawmin tu chunga khawm thupawi nei ang unla, indaw tuoin, inngaidam tuo unla, Lalpa chun a ngaidam ang tak cheu khan ngaidam ve ro.

¹⁴Chun, chuong po po chunga chun hmangaina inbel ro, chu chu khuop famkimna a nih.

¹⁵Chun, Krista thlamuonna chun in lungrilah ro rêl raw se; chuong ang ni dingin taksa pumkhata ko in ni hrim in sawnnaw; lawm nachâng hre bawk ro.

¹⁶Krista thu chu varna tinrêngin nangnia chun um ṭeu raw se; inpâkna hla dâm, Pathien hla dâm, thlarau tieng hla dâma inchûktirin inkâwk tuo unla, lungrila lâwmna neiin Pathien chu hla sakpêk ro.

¹⁷Chun, in thaw taphawt chu, thu hril amanih, thil thaw amanih, ama zârah Pa Pathien kuomah lâwmthu hril pumin Lalpa Isu hmingin thaw vawng ro.

¹⁸Nuhmeihai, Lalpaa a âwmtâwk ang peiin, in pasalhai kuomah intuklût ro.

¹⁹Pasalhai, in nuhmeihai hmangai unla, an kuomah vîn naw ro.

²⁰Naupanghai, iengkimah in nu le pahai thu zâwm ro; chu chu Lalpaa chun lâwm a um si a.

²¹Pahai, in nauhai suknuor naw ro, chuong naw chun, an bei dawng rawi a tih.

²²Suokhai, taksaa in hotuhai thu hi iengkimah zâwm ro; mihriem suklâwmtuhai ang ela mit rawng bâwl lovin, lungril hmunkhat puta Lalpa ṭi dêk pumin zâwm lem ro.

²³Iengkim in thaw taphawt chu mihriem ta ding anga thaw lovin, Lalpa ta ding anga thaw lemin, inhâwktakin thaw ro;

²⁴a thungna rohluo ding chu Lalpa kuoma inthawkin in hmu ding a nih ti hre zingin Lalpa Krista rawng in bâwl a ni hi.

²⁵Thil indik naw thawtu chun a thil indik naw thaw man hmûng a tih, mi thlier bîkna hrim a um si naw a.