Read Hmar 1 THESSALONIKA 1 Bible Online

1 THESSALONIKA 1 - Hmar bible

1 THESSALONIKA 1

¹Paula le Silvan le Timothe chun: Pa Pathien le Lalpa Isu Kristaa Thessalonikaa kohranhai kuomah: Lunginsietna le inremna in kuomah um raw se.

²Kan ṭawngṭainahaia chun in hming lamin, nangni po po leiin Pathien kuomah lâwmthu kan hril hlak a nih.

³Ei Pathien le Pa hmaa ringna leia in sin thawzie dâm, hmangaina leia in sin inrimzie dâm, ei Lalpa Isu Krista beisei leia in selzie dâm kha theinghil lova hre zingin.

⁴Unau Pathien idittakhai, a thlangzie cheu kha kan hriet a,

⁵khânga kan Chanchin Ṭha chu thu chaua tlung lova, thilthawtheina le Thlarau Inthieng le nasataka ring tlatna leh a hung tlung lem kha. Nangni hma sielin in chungah ieng ang mi am kan lo ni ta kha in hriet si a.

⁶Chun, thu chu rinum tuor pumin Thlarau Inthienga lâwmin in lo pawm a, keini le Lalpa inchûktuhai in lo nih.

⁷Chuongchun, Makedonia le Akaia rama ringtuhai po po ta dingin enkhina in hung ni kha,

⁸Lalpa thu chu nangnia inthawkin ân thang suok ta si a; Makedonia le Akaia rama chau ni lovin, hmun tina khan Pathien tienga in ringzie chu ân thang ta a; chuongchun, keinîn iengkhawm hril hrim a ngai ta nawh.

⁹Nangni laiah ieng ang lawmlûtna am kan dawng anni ngeiin an inhriettir a; milimhai chu Pathien tienga in nghatsanzie, Pathien hring le indiktak rawng bâwl ding le,

¹⁰a Naupa mithi laia inthawka a ikeitho, lunginsenna hung tlung dinga inthawka a mi sansuoktu Isu kha vâna inthawka hung lo nghâk dinga in nghatsanzie khawm kha an inhriettir bawk hlak a nih.