Read Hmar 1 THESSALONIKA 2 Bible Online

1 THESSALONIKA 2 - Hmar bible

1 THESSALONIKA 2

¹Unauhai, nangni laia kan hung lûtna kha a lo thlâwn nawh ti nangni ngeiin in hriet si a;

²thlâwn nêk hmanin, in hriet ta angin, kha hma khan Philippia chun rinum tuor le inzaktaka siemin lo um ta inlang khawm, Pathien Chanchin Ṭha chu, kan Pathiena huoina neiin, dodâlna nasatak kârah, in kuomah kan puong ta lem kha.

³Kan thu hril hi khêla suok a ni si naw a, inthieng nawnaa suok a ni bawk naw a, zâwrnain a ni bawk nawh;

⁴Chanchin Ṭha inkawltira um dingin Pathien ṭha tizâwng mi kan ni ang ngeiin, mihriem suklâwm ding ang ni lovin, kan lungril fietu Pathien suklâwm lemin thu kan hril lem hlak a nih.

⁵Ieng lai khawma inpâk tehlêmna thu amanih, duâm inkhumna amanih, kan hmang lai an hriet nawh ti in hriet kha (Pathien a mi hrietpuitu a nih.)

⁶Mihriem laiah, nangni laia manih, mi danghai laia mani khawm chawimawina kan zawng ngai nawh;

⁷Krista tirkohai kan nina leiin inkhâwkpuium kan lo ni el thei de khawmin. Nu nau pawmin ama nauhai a duot angin, nangni laiah zaidamtakin kan um lem kha.

⁸Chuong ang bawkin, kan dit zâwng tak in hung ni ta lei khan, kan dit ngawi ngawi cheu a, Pathien Chanchin Ṭha chau ni lovin kan hringna rau khawm pêk cheu kan inhuom kha.

⁹Unauhai, kan thaw sâwlzie le kan sin inrimzie kha in hriet zing deh! nangni laia tûkhawm kan sukkhâwk nawna ding cheuin a sûn a zâna sin thawin, Pathien Chanchin Ṭha kan hril hlak cheu kha.

¹⁰Nangni ringtuhai chungah inthiengtak le feltak le, demum lotaka kan umzie kha Pathien leh a mi hrietpuituhai in nih;

¹¹pain ama nauhai chunga a thaw angin in chunga kan thawzie kha in hriet, infui le thlamuon le inhriettir cheuin, in chung senga kan thawzie kha;

¹²Ama ram le ropuinaa kolûttu cheu Pathien mi ni tlâka in um theina dingin.

¹³Hi hi lei hin ma lovin Pathien kuomah lâwmthu kan hril bawk hlak, Pathien thu kan kuoma inthawka in hriet, in pawm lai khan, mihriem thu pawmin in pawm naw a, Pathien thu pawma in pawm lem lei khan; chu chu Pathien thu a ni hrim a, nangni a ringtuhai sûnga sin thaw hlak bawk chu a nih.

¹⁴Nangni unauhai, Judai rama Pathien kohran, Krista Isua umhai inchûktu in lo ni kha; anni chun Judahai laia an tuor angin nangni khawmin nangni rama mihai laia inthawkin in tuor ve bawk si a.

¹⁵Chuong Judahai chun Lalpa Isu le zâwlneihai khawm an that a, keini khawm an mi hnawt suok a, Pathien an suklâwm naw a, mi po po an kal hlak;

¹⁶sandam an ni theina dinga Jentailhai laia thu hril an mi khap hlak si a, chuong anga an suol inkhina suksip rawp dingin, nisienlakhawm, lunginsenna chu an chungah a tâwp khâwk râwtin a hung tlung tah.

¹⁷Nisienlakhawm, unauhai, sâwt nâwtea dingin nangni leh lungril tienga inṭhe lovin, hmêl tieng chaua inṭhea ei um hri lei hin, inhâwk tak puma in hmêl hmu dingin kan beisei nasa nâwk zuol hlak a nih;

¹⁸in kuomah hung kan tum tlat si a; kei Paula ngei khawm hin vawi hni rau hung ka tum nghe nghe ta a; nisienlakhawm, Setanin a mi hluo hlak a nih.

¹⁹Kan beiseina amanih, kan hlimna amanih, kan lallukhum suong amani chu ieng am a na? A hung phaleh ei Lalpa Isu hmaa chun nangni ngei in ni ding a ni naw am a nih?

²⁰Nangni hi kan isuong le kan hlimna in nih in sawnnaw.