Read Hmar 1 THESSALONIKA 3 Bible Online

1 THESSALONIKA 3 - Hmar bible

1 THESSALONIKA 3

¹Chuongchun, kan tuor zo ta naw tika chun Atheniah keini chau mâksanin um inlang ṭha kan ti a.

²Timothe ei unaupa, Krista Chanchin Ṭha tienga Pathien rawngbâwltu hi sukdet ding cheu le in ringna kawnga thlamuon ding cheuin kan hung tir a nih;

³hieng rinum tuorna lei hin tûkhawm an inhnîng nawna dingin; hienghai hi tuor dinga ruot kan nih ti nangni ngeiin in hriet si a.

⁴In kuoma kan um lai khan rinum tuor ding kan nih ti kan hril lâwk ngei cheu kha; chuong ang ngei chun a hung tlung ta a, chu chu in hriet kha.

⁵Chuleichun, ka tuor zo ta naw phingleh, thlêmtu chun thlêm thlu hlau rawi a ti cheu a, kan sin inrimna chu thlâwn rawi a tih, tiin in ringzie ka lo hriet theina dingin mi ka hung tir a nih.

⁶Nisienlakhawm, Timothe chu in kuoma inthawka tuta kan kuoma a hung tlung hin, hmu cheu kan inhâwk ang bawkin, mi hmu inhâwk bêk bêkin ngainatakin in mi hriet zing ti thu le, in ringna le in hmangaina chanchin lâwmum tak a mi hâwn a.

⁷Chuleiin, unauhai, kan lunginrimna le rinumna po poah, in ringna leiin in chungah thlamuongtakin kan um tah.

⁸Tuhin chu kan hring tah, Lalpaah in ngîr det phawt hin chu.

⁹Ei Pathien hmaah in chunga kan hlimna po po lei hin, nangni tieng thuah ieng lâwmthu am Pathien kuomah hril ve thei kan ti aw?

¹⁰In hmêl kan hmu theina ding le, in ringna tienga in tlâksamna kan phuhrûk pêk theina ding cheuin a sûn a zânin nasatakin kan ṭawngṭai zing a nih.

¹¹Chuongchun, ei Pathien le ei Pa ngei chun, ei Lalpa Isu khawmin nangni kuom tiengah mi ṭhuoi raw se.

¹²Chun, nangni tienga hmangaina kan hau angin, nangni laia inhmangaituona le mi po po tienga hmangaina chu Lalpain sukpungin inhautir raw se cheu;

¹³chuongchun, ei Lalpa Isu, a mi inthienghai po po le a hung pha, ei Pathien le ei Pa hmaah in lungrilhai inthiengna kawngah sawisêlboin sukdet thei a ti cheu.