Read Hmar 1 THESSALONIKA 4 Bible Online

1 THESSALONIKA 4 - Hmar bible

1 THESSALONIKA 4

¹Chuongchun, unauhai, a tâwp taka chun, in um dân ding le Pathien in suklâwm dân ding (tuta in um dân hi) kan kuoma inthawka in lâk ang khan in hau nâwk zuolna dingin Lalpa Isua chun kan ngênin kan infui cheu a nih.

²Lalpa Isu zâra chun ieng thuhai am kan pêk cheu kha in hriet si a.

³Pathien dit zâwng, in inthiengna ding chu, hi hi a nih, indit bânsan unla;

⁴inthieng le chawimawiin mâni bêl vawng thiem seng ro.

⁵Pathien hre naw Jentailhai anga hur kawnga châk lovin;

⁶chu kawnga chun tûkhawmin bawsein, a unau chungah thil ṭha naw chu thaw naw sien la, Lalpa chu chuong ang thil thawtuhai po po phuba latu a ni leiin keini khawmin kan hril lâwkin kan inhriettir ta cheu ang khan.

⁷Pathienin inthieng naw dingin a mi ko si naw a, inthieng dingin a mi ko lem a nih.

⁸Chuleiin, a pawisa nawtu chu mihriem pawisa naw a ni naw a, Pathien, a Thlarau Inthieng pe hlaktu cheu kha pawisa naw a ni lem.

⁹Amiruokchu, unauhai, hmangai kawng thu chu ziek pêk cheu in ngai nawh, inhmangai tuo dingin nangni ngei Pathien inchûktirin in um si a.

¹⁰Makedonia ram pumpuia unau umhai po po chunga chun chu chu in thaw ngei bawk a nih: nisienlakhawm, unauhai, thaw nâwkzuol deu deu dingin kan infui cheu a nih.

¹¹Kan hril ta cheu ang khan dei dapa um a, mâni sin seng ngaisak a, mâni kut ngeia sin thaw tum tlat ro.

¹²Chuongchun, puo tienga mihai chungah mawitakin um thei in ta, iengkhawm tlasam naw ti niu.

¹³Nisienlakhawm, unauhai, mi dang beiseina hrim nei nawhai anga in lungngai nâwna dingin, a inhai chanchin in hriet naw kan nuom nawh.

¹⁴Isu a thi a, a tho nâwk tah ti ei ring si chun, Isua intahai chu Pathienin ama ruolin hung ṭhuoi sa ngei a tih.

¹⁵Hi hi Lalpa thuin in kuomah kan hril a nih; eini Lalpa hung pha chena dama lo la um zinghai hin, a in tahai chu lekhal naw tawp ei tih, ti hi.

¹⁶Lalpa ngei chu khêkri leh, vântirko chunghnungtak râwl leh, Pathien tawtawrâwt ri leh, vâna inthawkin a hung ṭum ding a ni si a; chun, Kristaa thi tahai chu tho hmasâng an tih.

¹⁷Chu hnunga chun eini dama lo la um zinghai hi boruokah Lalpa tuok dingin annihai ruolin sûm laiahai khin zuk lâkin um ei tih; chuongchun, Lalpa kuomah kumkhuoin um tâng ei tih.

¹⁸Chuleiin, hieng thu hin inthlamuon tuo ro.