Read Hmar 1 THESSALONIKA 5 Bible Online

1 THESSALONIKA 5 - Hmar bible

1 THESSALONIKA 5

¹Amiruokchu, unauhai, a hun le a ni kawng thu hrim ziekpêk in ngai naw a.

²Lalpa Ni chu zâna inru angin a hung tlung ding a nih ti nangni ngeiin chiengtakin in hriet si a.

³“Muongna le himna,” tia an hril lai takin, nuhmei nauhase angin kârlovin an chungah bohmangna hung tlung a tih, pumpel naw tawp an tih.

⁴Nisienlakhawm, unauhai, nangni ruok chu, chu Ni chun inru anga a nangna ding cheuin inthimah in um nawh.

⁵Var nauhai le Ni nauhai in ni vawng si a, zâna mi ei ni naw a, inthima mi ei ni bawk nawh.

⁶Chuleichun, mi danghai angin in ta nâwng ei tiu khai! Meng ei tiu a, fîmkhurin ngaiven lem ei tiu.

⁷A inhai chu zânah a nih an in hlak chu, zu inruihai khawm zânah a nih an inrui hlak chu.

⁸Nisienlakhawm, eini chu nia mi ei ni lei hin, ringna le hmangaina âwmphaw chu hâkin, sandamna beiseina chu lukhuma hmangin ngaiven lem ei tiu.

⁹Pathienin lunginsenna tuor ding ni lovin, ei Lalpa Isu Krista zâra sandamna hmu ding lema a mi ruot a ni si a.

¹⁰Ei meng khawma, ei in khawma, ama leh ei hring kawp theina dingin ama chu ei thi aiin a thi a nih.

¹¹Chuleiin, infui tuoin insukṭhahnem tuo seng ro, in thaw hrim hlak ang khan.

¹²Nisienlakhawm, unauhai, kan ngên cheu a nih: nangni laia sin inrim le Lalpaa in hotua um le, a kâwktuhai cheu chu hre ding le,

¹³an sinthaw leia hmangaia ngaihlu bêk bêk dingin. Inremin um ro.

¹⁴Chun, unauhai, kan ngên cheu, dân ang nawa umhai chu kâwk unla, lungril chînhai chu infui unla, a hrât nawhai chu ṭhangpui unla, mi po po chungah dâwthei takin um ro.

¹⁵Tûkhawmin tu suol khawm suola thung lo dingin fîmkhur ro; thil in inthawpêk tuona tieng le, mi po po chunga in thawpêkna tienga khawm a ṭha taphawt chu hnawt lem rawp ro.

¹⁶Lâwm rawp unla,

¹⁷ma lovin ṭawngṭai unla,

¹⁸iengkimah lâwmthu hril rawp ro; chu chu nangni tieng thuah Krista Isua chun Pathien dit zâwng a ni si a.

¹⁹Thlarau chu sukmit naw ro.

²⁰Thu hrilhai hmusit naw ro;

²¹iengkim infie lem unla, a ṭha ṭha chu pawm tlat ro.

²²Suol anga inlang po poa inthawk chun insiekieng ro.

²³Chun, inremna Pathien ngei chun, in pumin sukthieng raw se cheu; chun, in thlarau le, in lungril le in taksa chu ei Lalpa Isu Krista a hung pha chun, sawisêlboa a puma humhimin um raw se.

²⁴A kotu cheu chu ring a um a, thaw khawm thaw ngei bawk a tih.

²⁵Unauhai, mi ṭawngṭaipêk ro.

²⁶Unau po pohai kha fâwp inthiengin chibai mi bûkpêk ro.

²⁷Hi lekha hi unau po po kuoma chun tiem dingin Lalpa hmingin ka phût cheu.

²⁸Ei Lalpa Isu Krista lunginsietna chu in kuomah um raw se.