Read Hmar JOSUA 1 Bible Online

JOSUA 1 - Hmar bible

JOSUA 1

¹LALPA siehlaw Mosie chu a thi hnung chun, Mosie rawngbâwltu Nun naupa Josua kuoma chun LALPAIN,

²“Ka siehlaw Mosie chu a thi ta a; tho la, nang le hieng mipui po pohai le hin Jordan hi kân unla, anni Israel mihai ngei ka ipêk rama chun fe ro.

³Mosie kuoma ka hril ta ang khan, in kephaa in isir taphawt chu ka pêk vawng cheu a nih.

⁴Thlalêra inthawk le hi Lebanon tlânga inthawka Euphrates vadung, vadung lientak chen, Hit mihai ram po po, nisa tlâkna tieng Mediterranean tuipui chen in ramri nîng a ta.

⁵I dam sûng po po chun tukhawm i hmaah ngîr thei naw ni hai a, Mosie kuoma ka um ang khan i kuoma khawm ka um ve ding a nih; inhlâwsamtir naw ning che a, mâk khawm mâksan naw tawp ka ti che.

⁶Hrâttak le huoitakin um rawh, inkhâma an thlatuhai pêk ka lo tiem ta ram kha anni hi în hluotir ding a ni si a.

⁷Ka siehlaw Mosiein dân po po zâwm dinga a pêk che kha zâwm tlat dingin hrâttak le huoitakin um phawt el rawh. I fena taphawta i tluongtlung peina dingin i changtieng amanih, i vawitieng amaniah khawm pêtsan dêr naw rawh.

⁸Hi dân bu hin i bâu chu suoksan hlek naw sienla, chu thu ziekhai po po chu i zâwm tlat theina dingin sûn le zânin i ngaituo ding a nih, chuongchun, i lampuihai chu suktluong pei i ta; i hung tluongtlung pei ding a nih. Thu ka pêk che a ni naw am a nih?

⁹Hrâttak le huoitakin um rawh; ṭi naw la, zâm bawk naw rawh, LALPA i Pathien chu i fena taphawtah i kuomah a um pei ding annâwm,”tiin, a hril a.

¹⁰Chuongchun, Josua chun mipui hotuhai chu thu a pêk a,

¹¹“Riebûk chu va fang unla, mipuihai kuoma chun, ‘Fâk dinghai buotsai ro khai, ni thum sûngin LALPA in Pathienin ram hluo ding a pêk cheu hi hluo dingin Jordan vadung hi in kân ding a nih,’ tiin thu pe ro,” tiin.

¹²Chun, Reuben mihai le, Gad mihai le Manasse hnam zâtvehai kuoma chun Josua chun,

¹³“LALPA in Pathienin châwlna a pêk cheu a, hi ram hi a la pêk ding cheu a nih, tia LALPA siehlaw Mosiein thu a pêk cheu hi hre zing unla.

¹⁴In nuhmeihai, in nau le tehai le in ran ruolhai hi chu Jordan râla Mosiein ram a lo pêka cheu chun um an ta; nangni mi hrât huoihai po chu inrâlthuomin lo kai hmasâng in ta, in unauhai lo ṭhangpui in ta;

¹⁵ LALPAIN in unauhai khawm chu nangni ang bawka châwlna a pêka, LALPA in Pathienin ram a pêk chu anni khawma an hluo ve hmakhat chun; chuongchun, LALPA siehlaw Mosiein Jordan râl, nisa suokna tieng ram in puola a lo pêk ta cheu tieng chun kîr nâwk in ta, in la hluo ding a nih,” tiin, a hril a.

¹⁶Anni chun Josua chu an dawn a, “Thaw dinga i thu mi pêkhai po po chu thaw pei kan tih.

¹⁷Kawng iengkima Mosie thu kan zâwm pei hlak ang khan, i thu khawm zâwm pei kan tih. LALPA i Pathien chu Mosie kuoma a um hlak ang khan i kuoma hin um ve phawt sienla.

¹⁸Tukhawm i thupêk chunga hela, thu i pêk taphawt zâwm nuom lo chu sukhlum ding nîng an tih, hrâttak le huoitakin um phawt el rawh,” tiin.