Read Hmar JOSUA 17 Bible Online

JOSUA 17 - Hmar bible

JOSUA 17

¹Chun, Manasse thlahai chanpuol chu hieng hi a nih; ama chu Josef naulutîr kha a na. Gilead pa, Manasse nau lutîr Makir ruok chu indo mi a na, Gilead le Basan ram chu a chang a.

²Chun, chanpuol chu Manasse hnam, an sûngkuo izir ang peiin, Abiezer nauhai, Helek nauhai, Asriel nauhai, Sekem nauhai, Hepher nauhai le Semida nauhai ta ding dâmin pêk a nih; chuonghai chu an sûngkuo izir ang peia Josef naupa Manasse naupasalhai chu an nih.

³Manasse naupa Makir, chu naupa Gilead, chu naupa Hepher, chu naupa Zelophehad ruok chun naupasal nei lovin naunuhmei ruok a nei a; chuong a naunuhmeihai hming chu: Mahla, Noa, Hogla, Milka le Tirza an nih.

⁴Chun, thiempu Eleazar le Nun naupa Josua le mi lienhai hmaah an fe ve a, “Kan unaupahai laia hin chanpuol mi pe ve dingin LALPAIN Mosie kha thu a pêk a nih,” tiin an hril a, chuongchun, LALPA thupêk angin an pa unauhai laia chun chanpuol a pêk ve ta a.

⁵Chuongchun, Jordan râla Gilead le Basan ram tiem lovin Manasse chanpuolah hmun sâwm a tlu a;

⁶Manasse naunuhmeihai chun a naupasalhai laia chun chanpuol an nei ve lei a nih. Gilead ram chu Manasse naupasal danghai chun an chang a.

⁷Chun, Manasse ramri chu Sekem saktienga um Asera inthawka Mikmethath chenin a nih; ramri chu simtieng panga chun En-tappua mihai umna chenin a fe a.

⁸Tappua ram chu Manasse ta a na, Manasse ramri depa Tappua ruok kha chu Ephraim thlahai ta a nih.

⁹Chun, ramri chu Kana vadungteah, vadungte simtieng panga chun a fe thla a, chuong khawpuihai chu Manasse khawpuihai laia, Ephraim ta a nih. Manasse ramri chu vadungte hmârtieng panga chun a nih; chun, tuisuorietah a fe thla a.

¹⁰Simtieng pang chu Ephraim ta a na, hmârtieng pang chu Manasse ta a na, Mediterranean Tuipui chu a ramri a nih, hmârtienga chun Aser chenin a va ni a, saktienga chun Issakar chenin a hang nih.

¹¹Issakar le Aser rama chun Manasse chun Beth-sean le a sîrvêl khuohai, Ibleam le a sîrvêl khuohai, Dora umhai le a sîrvêl khuohai, En-dora umhai le a sîrvêl khuohai, Taanaka umhai le a sîrvêl khuohai, Megiddoa umhai le a sîrvêl khuohai, zo khawsâng pathumhai chu a nei a.

¹²Nisienlakhawm, Manasse thlahai chun chuong khawpuia umhai chu an hnawt suok thei naw a, Kanaan mihai chu chuong rama chun an um tlat el a.

¹³Israel thlahai chu an hung hrât deu deu phing chun, Kanaan mihai chu sinthawa hmang dingin an inumtir a, an hnawt suok fai rêt ta nawh.

¹⁴Josef thlahai chun Josua kuomah, “Iengtiziea rohluo ding chanpuol pakhat le chan khat chau i mi pêk bîk am a na, LALPA hlakin mal a mi sâwm nasa a, kan tam hle si a?” tiin an hril a.

¹⁵Josua chun an kuomah, “Chuonga tam in ni chun, Periz mihai le Rephaim mihai ram rampuihai khi, fe unla, in umna dingin hang vât ta unla, Ephraim tlâng ram in ta dinga a chîn taluo chun,” a ti a.

¹⁶Josef nauhai chun, “Tlâng ram hi kan ta dingin a hun naw a nih, phai rama Kanaan mi chênghai po po, Beth-sean le a khawpuia umhai le Jezreel ruoma umhai hin thîr tawlailîr an nei seng si a,” an ti a.

¹⁷Josua chun Josef sûnghai, Ephraim le Manasse thlahai kuoma chun, “In tam hle a, hrât khawm in hrât a; chuongchun, chan khat chau chu nei da ti niu ie,

¹⁸tlâng ram khi in ta ni el raw se, rampui khawm ni sienla, vât in ta, a ram chin po po chu in ta a ni el ding annâwm; Kanaan mihai chun thîr tawlailîrhai neiin, hrât hle hai sien khawm, in la hnawt suok ding annâwm,” tiin a hril a.