Read Hmar JOSUA 18 Bible Online

JOSUA 18 - Hmar bible

JOSUA 18

¹Chun, Israel mipui pungkhâwmhai po po chu Silo khuoah an inkhâwm ta a, chutaka chun inbiekna puonin an zar a; ram chu an thu hnuoiah a hung um ta a.

²Israel thlahai lai chun an chanpuol la pêk ve lo hnam sari an la um a.

³Chuongchun, Josua chun Israel nauhai kuoma chun, “LALPA in thlatuhai Pathienin a lo pêk ta cheu ram hi ieng chen am hluo lova la muong ding in ni a?

⁴Hnam hran hran laia mi pathum seng inthlang suok unla, anni chu lo tir ka ta, anni chu inthawk an ta, ram chu va fang an ta, an chanpuol ding huntâwk ang sengin va ziek an ta, chun, ka kuomah hung kîr nâwk an tih.

⁵Hmun sariah ṭhe phawt an ta, Judahai chu simtieng an chanpuolah um an ta; chun, Josef sûnghai chu hmârtiengah an chanpuolah um an tih.

⁶Ram chu hmun sariah va ṭhe unla, ziek chu mi hung pe ro; chuongchun, hitaka hin LALPA ei Pathien hmaah ṭhum lo vâwrpêk ka ti cheu.

⁷Levi mihai hin chu chu nangni lai chanvo an nei ve naw a, LALPA thiempu sin hi an chanpuol a ni si a; chun, Gad mihai, Reuben mihai le Manasse hnam zâtvehai khan chu Jordan râl saktienga khan an chanpuol chu LALPA siehlaw Mosiein a lo pêk kha an lo chang ta a,” a ta.

⁸Chuongchun, chuong mihai chu an inthawk suok ta a, chun, ram chanchin va ziek suok dinghai chu Josua chun, “Ram chu va fang unla, hung ziek suok unla, ka kuomah hung intlun nâwk unla, hitaka Silo khuoa hin LALPA hmaah ṭhum vâwrpêk ka ti cheu,” tiin thu a pêk a.

⁹Chun, mihai chu an fe a, ram chu an va fang a, hmun sariah an ṭhe a, lekhabuah a khuoin an ziek suok a, riebûk Siloa chun Josua kuomah an fe nâwk a.

¹⁰Josua chun Siloa chun LALPA hmaa chun ṭhum a lo vâwrpêk a, chutaka chun Israel thlahai chu an inṭhe ang pei chun ram chu a sem ta a.

¹¹Ṭhumvâwr chu Benjamin thlahai hnam an sûngkuo izir ang peiin an chungah a tla ta a; chun, an ramri chin chu Juda thlahai le Josef thlahai inkâr kha a nih.

¹²Hmârtieng panga an ramri chin chu Jordana inthawkin a na; chun, ramri chu Jeriko sîrah hmârtieng pangah a hang fe pei a, thlangtieng panga chun tlâng ramah a hang fe pei a, ramri tâwpna chu Beth-aven thlalêrah a nih.

¹³Chun, ramri chu chutaka inthawk chun Luz tieng, Luz (chu chu Bethel a nih) sîrah, simtieng pangah a fe pei a, chun, ramri chu Beth-horon thlanghnung lem simtieng panga tlâng hrûlah Astaroth-adarah a fe thla a.

¹⁴Chun, ramri chu a fe pei a, Beth-horon simtieng panga tlâng bula inthawk chun thlangtienga chun simtieng pangah ân kuol phei a; chu chu Kiriath-baal (chu chu Kiriath-Jearim a nih) Juda thlahai khawpuiah a tâwp a, chu chu thlangtieng pangah ramri chu a nih.

¹⁵Chun, simtieng panga ram chu Kiriath-Jearim tâwpa inthawkin a nih, chun, ramri chu thlangtienga chun a suok a, Nephtoa vadung tuiahai chun a fe pei a;

¹⁶chun, ramri chu Rephaim hmârtieng ruomah Hinnom naupa ruom bula tlâng hmawra chun a fe thla a; chuongchun, Jebushai sîrah, simtieng panga Hinnom ruomah a fe thla a; chun, En-rogelah a fe thla a;

¹⁷chun, hmârtieng zâwngin Ensemesah a fe a, Adummim hang fena dep Gelilotha khan a fe a, chun, Reuben naupa Bohan lungah a fe thla a;

¹⁸chun, Araba sîr hmârtieng pangah a fe pei a, Arabaa chun a fe thla a;

¹⁹chun, ramri chu Beth-hogla sîr, hmârtieng pangah a fe pei a; chun, ramri tâwpna chu Jordan sim tâwp, Tuipui Al hmâr likilkawia khan a nih, chu chu simtieng ramri a nih.

²⁰Chun, Jordan chu saktieng rama ramri tâwp a nih. Chu chu a nih Benjamin hnam an sûngkuo ang peia an chanpuol ramin a huom sûng chu.

²¹Chuongchun, Benjamin thlahai an sûngkuo izir ang peia an khawpuihai chu Jeriko, Beth-hogla, Emek-keziz,

²²Beth-araba, Zemaraim, Bethel,

²³Avim, Para, Ophra,

²⁴Kephar-amoni, Ophni, Geba, khawpui sâwmpahni a khaw chînhai leh;

²⁵Gibeon, Rama, Beeroth,

²⁶Mizpe, Kephira, Moza,

²⁷Rekem, Irpeel, Tarala,

²⁸Zela, Eleph, Jebus, (chu chu Jerusalem a nih), Gibeah le Kiriath an nih; khawpui sâwmpali a khaw chînhai leh. Hieng hi a nih Benjamin nauhai an sûngkuo izir ang peia an chanpuola ruot chu.