Read Hmar JOSUA 19 Bible Online

JOSUA 19 - Hmar bible

JOSUA 19

¹Chun, ṭhumvâwr pahnina chu Simeon chungah, Simeon thlahai chungah an sûngkuo izir ang peiin a tlu ta a; an chanpuol chu Juda thlahai chanpuol lai khan a ṭhang ve a nih.

²An chanpuola tluhai chu, Beerseba, Seba, Molada,

³Hazar-sual, Bala, Ezem,

⁴Eltolad, Bethul, Horma,

⁵Ziklag, Beth-markaboth, Hazarsusa,

⁶Beth-lebaoth le Saruhen, khawpui sâwmpathum a khaw chînhai leh.

⁷Ain, Rimmon, Ether le Asan; khawpui pali a khaw chînhai leh;

⁸chuong khawpui vêla khaw chînhai po po Baalath-beer, simtienga Ramah chenin. Chuong chu a nih Simeon thlahai hnam an sûngkuo izir ang peia an chanpuola ruot chu.

⁹Simeon nauhai chanpuol chu Juda nauhai chanpuol laia mi a nih; Juda nauhai chanpuol chu anni ta dingin a lien taluo si a; chuleiin, Simeon thlahai chanpuol chu an chan lai khan a ṭhang ve a nih.

¹⁰Chun, ṭhumvâwr pathumna chu Zebulun thlahai chungah an sûngkuo izir ang peiin a tla ta a; an chanpuol ramri chu Sarid chenin a nih;

¹¹chun, an ramri chu thlangtieng pangah Marala tlung zakin a fe pei a; Dabbeseth a va tlung a, chun, Jokneam saka vadungte a va tlung a;

¹²Sarida inthawkin saktieng pangah nisa suokna tieng pangah Kisloth-tabor ramri chenin a hang kâwi a; Daberathah a suok a, Japhiaa chun a fe pei a;

¹³chun, chutaka inthawk chun saktieng pangah Gitta-hepher le Ethkazinah a fe pei a; Nea tieng panin Rimmonah a suok a;

¹⁴chun, ramri chu hmârtienga chun Hannathon-ah ân kuol phei a, Iphtahel ruomah a suok a,

¹⁵chun, Kattath, Nahalal, Simron, Idala le Bethlehem; khawpui sâwmpahni a khaw chînhai leh.

¹⁶Chuong chu a nih Zebulun thlahai an sûngkuo izir ang peia an chanpuola ruot chu; chuong khawpuihai le a khaw chînhai chu.

¹⁷Ṭhumvâwr palina chu Issakar chungah, Issakar thlahai an sûngkuo izir ang peiin a tla ta a;

¹⁸an ramri chin chu Jezreel, Kesulloth le Sunem,

¹⁹Hapharaim Sion, Anaharath,

²⁰Rabbith, Kision, Ebez;

²¹Remeth, En-gannim, En-hadda le Beth-pazez chenin a nih;

²²ramri chu Tabor, Sahazuma le Beth-semes a va tlung a nih; chuongchun, an ramri suokna chu Jordanah a nih; khawpui sâwmparuk, a khaw chînhai leh.

²³Chuong chu a nih Issakar nauhai hnam an sûngkuo izir ang peia an chanpuola ruot chu, khawpuihai le a khaw chînhai chu.

²⁴Ṭhumvâwr pangana chu Aser thlahai hnam chungah an sûngkuo izir ang peiin a tla ta a.

²⁵An ramri chin chu Helkath, Hali, Beten, Aksaph,

²⁶Allammelek, Amad le Misal an nih; thlangtieng panga chun Karmel le Sihor-libnath a zu tlung a;

²⁷chun, nisa suokna tieng panga chun Beth-dagonah an kuol a, chun, Zebulun le hmârtieng pangah Iphtahel ruomah Bethemek le Neiel a va tlung a, chun, hmârtieng panga chun fe peiin Kabul,

²⁸Ebron, Rehob, Hammon, Kana le Sidon ropui tlung zakin a fe pei a;

²⁹chun, ramri chu Ramaa le Tura khawpui kul neia chun ân kuol phei a; chun, ramri chu Hosaah ân kuol phei pei a, chuongchun, Akzib ram Medirerranean Tuipuiah a tâwp a.

³⁰Umma, Aphek le Rehob, khaw sâwmhni pahni le a khaw chînhai leh,

³¹Chuong chu a nih Aser nauhai hnam an sûngkuo izir ang peia an chanpuol chu, chuong khawpuihai le a khaw chînhai chu.

³²Ṭhumvâwr parukna chu Naphtali thlahai chungah an sûngkuo izir ang pei bawkin Naphtali thlahai chung ngeiah a tla ta a.

³³An ramri chin chu Helepha inthawk dâm, Zanannima thingsaisuoa inthawk dâm, Adami-nekeb le Jabneela inthawka Lakkum chenin a nih; chun, a suokna chu Jordanah a nih;

³⁴chun, ramri chu thlangtieng panga chun Aznoth-taborah a fe thla a; chutaka inthawkin Hukkokah a fe a; chun, simtienga chun Zebulun a va tlung a, thlangtienga chun Aser a tlung a, chun, nisa suokna tienga chun Juda rama Jordan a hang tlung a.

³⁵Chun, khawpui kul nei mihai chu Ziddim, Zer, Hammath, Rakkath, Kinnereth,

³⁶Adama, Rama, Hazor,

³⁷Kedes, Edrei, En-hazor,

³⁸Iron, Migdal-el, Horem, Bethanath le Beth-semes an nih; khawpui sâwmpakuo a khaw chînhai leh,

³⁹Chuong chu a nih Naphtali thlahai hnam an sûngkuo izir ang peia an chanpuol chu, khawpuihai le a khaw chînhai chu.

⁴⁰Ṭhumvâwr pasarina chu Dan thlahai hnam chungah an sûngkuo izir ang peiin a tlu ta a.

⁴¹An chanpuol ramri chu Zora, Estaol, Ir-semes,

⁴²Saalabin, Aijalon, Ithla,

⁴³Elon, Timna, Ekron,

⁴⁴Elteke, Gibbethon, Baalat,

⁴⁵Jehud, Bene-berak, Gathrimmon,

⁴⁶Me-jarkon, Rakkon, Joppa dep ramhai le khan an nih.

⁴⁷Dan thlahai chun an ram chu nuom elin an hluo thei naw leiin Lesem an hang do a, an lâk a, kâwlhnâmin an sukbohmang a, an nei ta a; chutaka chun an um nghâl ta a, an pu Dan hming chu chawiin Lesem chu Dan an inbûk tah a nih.

⁴⁸Chuong chu a nih Dan thlahai hnam an sûngkuo izir ang peia an chanpuol chu, chuong khawpuihai le a khaw chînhai le chun.

⁴⁹Chuongchun, an chanpuol ding anga ramri siem ang peiin ram chu an lo sem zo ta a; chuongchun, Israel thlahai chun Nun naupa Josua chu anni lai chanpuol an siempêk ve a;

⁵⁰LALPA thupêk angin Ephraim tlâng rama a khawpui hni Timnathsera khuo chu an pêk a; chun, khawpui chu a siem ṭha a, chutaka chun a um ta a.

⁵¹Chuonghai chu a nih thiempu Eleazar hai, Nun naupa Josua hai le Israel thlahai hnam sûngkuo upahaiin Siloa LALPA hmaa inbiekna puon in kawtkhâra an rochan dinga ṭhumvâwra an lo sempêk tahai chu, chuongchun, ram ṭhe chu an zo tah a nih.