Read Hmar JOSUA 2 Bible Online

JOSUA 2 - Hmar bible

JOSUA 2

¹Chun, Nun naupa Josua chun, Shittima inthawk chun mi pahni arûkin enthlatu dingin a tir a, “A ram le Jeriko khuo dâm chu va en vêl ta u,” tiin. Chun, an va fe a, nawchizawr pakhat a hming Rahab inah an va lût a, chutaka chun an tlung ta a.

²“Ngai ta, vawizân hin ram enthla dingin Israel mi ṭhenkhat an hung a,” tiin Jeriko khuo lal chu an hril a.

³Jeriko khuo lal chun, “I ina hung tlung mikhuolhai kha hung ṭhuoi suok rawh, ram pumpui enthla dinga hung an ni si a,” tia hril dingin Rahab kuomah mi a tir a.

⁴Nuhmei chun mi pahnihai chu a ṭhuoi a, a thuphmang ta a; “Anih, mihai chu ka kuoma chu an hung ngei a, amiruokchu, khâwtaka inthawka hung am an ni ruok chu ka hriet nawh;

⁵khaw inthim, kul kawtkhâr khâr hun ding lai vêl khan anni chu an suok nâwk ta a, khâwtieng am an fe tah ti khawm ka hriet nawh; hnawt vat unla, hnawt phâk in ti ie,” a ta.

⁶Diktak chun in chungah a ṭhuoi a, in chunga a ziza kûng intieng khâwm lai chun a thuphmang a nih.

⁷Chun, mihai chun Jordan vadung tieng chun kai chen chun an va hnawt ta a; chun, a hnawttuhai chu an suok phing le chun dai kawtkhâr chu an khâr ta a.

⁸An zâl hma chun in chunga chun an kuomah a hang fe a,

⁹chu mihai kuoma chun, “Hi ram hi LALPAIN a pêk ta cheu a, in ṭitumna hin a mi del tâwl ta a, hi rama chênghai po po hi in hmaa hin an intui zo tah a nih ti ka hriet a.

¹⁰Aigupta rama inthawka in hung suok khan LALPAIN Tuipui Sen kha a sukkangpêk cheu a, Jordan râla Amor mihai lalhai pahni Sihon le Og chunga in thawzie kha, khânga in sukbohmang tâk elzie kha kan lo hriet si a.

¹¹Chu chu kan lo hriet phingleh kan lungrilhai chu ântui zo a, nangni lei hin, mi tukhawm lungril mumal put hrim hrim hi an um naw a, LALPA in Pathien chu chungtieng vâna le hnuoitieng hnuoiah Pathien a ni si a.

¹²Chuleiin, tuhin ka ngên cheu a nih, hi in chungah ka lunginsietzie cheu ka lo suklang ta a, nangni khawma ka pa sûnghai chungah in lunginsietna chu hung inlangtir ve ding le inchikna fietak mi siempêk dingin LALPA hming sâlin mîn khâmpêk ro:

¹³ka nu le ka pa le ka unaupahai le ka unaunuhai le an neihai po po leh, thinaa inthawkin kan hringna chu sansuok ngei dingin,” a ta.

¹⁴Mihai chun amanu kuoma chun, “Kan thilthaw hi i hril suok naw ding chun in thi ai thîng kan tih. LALPAIN ram hi a mi pêk pha chun lunginsiet chein, i chungah ringumtakin thâwng kan tih,” an ta.

¹⁵Chuongchun, tukvera chun hruihruolin a thlâk thla ta a; a in chu khawpui kul tlânga um a ni si a, kul chunga chun a um a nih.

¹⁶Chun, an kuoma chun, “Tlâng tieng panin fe ro khai, chuong naw chun, a hnawttuhai cheu khan hmu hlau rawi an ti cheu; chutaka chun ni thum vân bihmang unla, a hung hnawttuhai cheu kha an kîr nâwk hmakhat chun: chu zoa chun fe chau ro,” a ta.

¹⁷Mihai chun a kuomah, “I ṭawng mîn khâmtir ringawt el hin chu thiemnaw mîn changtir el thei naw nih.

¹⁸Ngai rawh, hi rama kan hung lût phaleh, hi pat sen hi i mi thlâkna tukvera hin lo khitde la; chun, in sûngah i kuomah i nu hai, i pa hai, i unaupahai, i pa sûnghai po po chu ṭhuoi lût vawng bawk raw aw.

¹⁹Tukhawm i kawtkhâra inthawka khawlaia suok taphawt chu an thisen maw chu annîn phur an ta, keini chu thiemnaw changin um naw nîng ungah; amiruokchu, tukhawm in sûnga i kuoma um taphawt chu mîn an chungah kut an thlâk chun an thisen maw chu keinîn phur kan tih.

²⁰Amiruokchu, kan thilthaw hi i hril suok chun ṭawng i mîn khâmtirnaa hin thiemnaw changin um naw nîng ungah,” an ta.

²¹Chun, amanu chun, “In thu ang pei chu ni raw se chu,” a ti a. Chuongchun, anni chu ân fetir a, an fe a; chun, tukvera chun pat sen chu a khitde a.

²²Chuongchun, an fe ta a, tlâng chu an va tlung a, anni hnawttuhai chu an kîr nâwk hmakhat chu, chutaka chun ni thum an um a, anni hnawttuhai chun lampui intluonin an zawng a, nisienlakhawm, an hmu zo naw a.

²³Chuongchun, mi pahnihai chu an kîr nâwk a, tlânga inthawk chu an fe thla a, Jordan vadung an kai a, Nun naupa Josua kuom chu an va tlung a, an chunga thil hung tlung po po chu an hril ta a.

²⁴Chun, Josua kuoma chun, “LALPAIN a ram pumpui chu ei kutah a lo pêk takmeu el; chu chau khawm chu a ni naw a, chu rama chênghai po po chu eini, mi ṭiin an thi dang el a nih,” an ta.