Read Hmar JOSUA 22 Bible Online

JOSUA 22 - Hmar bible

JOSUA 22

¹Chuongchun, Josua chun, Reuben mihai, Gad mihai le Manasse hnam zâtve hai chu a ko a,

²an kuomah, “LALPA siehlaw Mosiein thu a pêk taphawt cheu chu in pawm pei a, thu keiin ka pêk taphawt cheu khawm in pawm pei hlak a,

³hi chen hin, vawisûn ni chen hin in unauhai chu in thlathlam naw a, LALPA in Pathienin thaw dinga thu a pêkhai cheu chu in zâwm hlak a.

⁴Chuongchun, LALPA in Pathienin an kuoma a lo hril ta ang khan in unauhai hi tuhin muongna a pêk ta hi: chuleiin, LALPA siehlaw Mosiein Jordan râla in chanpuol dinga ram a lo pêk ta cheua khan, in puon in tienga chun fe nâwk ta ro.

⁵LALPA siehlaw Mosiein LALPA in Pathien chu hmangai a, a lampuihai po po chu hraw a, a thupêkhai chu pawm a, ama chu chel tlat a, in lungril po po le thlarau po poa a rawngbâwl tlat dinga thu a pêk cheu kha; chu thupêk le dân dâm chu fîmkhurtakin vawng ṭhat tum phawt el unla,” a ta.

⁶Chuongchun, Josua chun anni chu mal a sâwm a, ân fetir ta a; chuongchun, an puon inhai tieng chun an fe ta a.

⁷Tun Manasse hnam zâtvehai kha Mosie chun Basan ramah chanpuol a pêk a; a zâtve danghai ruok kha chu Josua chun thlang tienga Jordan râla an unauhai lai chanpuol a pêk lem a. Josua chun an in tienga ân fetir ding lai khan mal a sâwm a,

⁸an kuomah, “In puon inhai tieng chun hausatakin fe ta unla, ran tamtak leh, tangka dâm, rângkachak le dâm, dâr le dâm, thîr le dâm, silfên tamtakhai le dâm, in hmêlmahaia inthawka in râllâkhai kha in unauhai leh insem seng ro,” tiin a hril a.

⁹Chun, Reuben mihai le Gad mihai le Manasse hnam zâtvehai chu an kîr nâwk ta a. Kanaan ram Silo khuoa Israel thlahai kuoma inthawk chun Gilead ram, LALPAIN Mosie hmanga thu a lo pêk ta ang khan an chanpuol hrima lo ruotsa tah, chu rama fe ding chun an suok ta a.

¹⁰Chun, Kanaan ram Jordan biel an va tlung chun Reuben mihai le Gad mihai le Manasse hnam zâtvehai chun Jordan vadung panga chun maichâm lientak el langsârtak hi an siem a.

¹¹Chun, Israel thla mi danghai chun, “Ngai ta u, Reuben mihai le, Gad mihai le Manasse hnam zâtvehai khan Kanaan ram bultak Jordan biel, Israel thlahai ram tieng pangah maichâm an siem a,” tia mî hril an hriet a.

¹²Chun, chu chu Israel thlahai chun an lo hrietin Israel mipui po po chu anni hang do ding chun Silo khuoa chun an inkhâwm ta a.

¹³Chun, Israel thlahai chun Gilead rama Reuben mihai le, Gad mihai le Manasse hnam zâtvehai kuoma chun Thiempu Eleazar naupa Phinehas an tir a;

¹⁴ama le chun mi lien sâwm, Israelhai hnam laia sûngkuo lusa tak pakhat pei leh. Chuonghai chu Israel hnamhai laia an sûngkuo lusa takhai pei an nih.

¹⁵Chun, Reuben mihaihai le Gad mihai le Manasse hnam zâtvehai kuoma chun Gilead ramah an hang fe ta a,

¹⁶an kuomah, “LALPA mipui pungkhâwm po poin, ‘Hi thil suoltak hi iengtiziea Israelhai Pathien chungah thaw am in ni a? LALPA chu nghatsanin maichâm dâm siemin iengtiziea Lalpa chunga hel am in ni a?

¹⁷Peor hmuna bawsietnahai kha ei ta dinga chîn taluoa ngai thei am a nih? Tu chen khawm hin khâng ei suolhai kha ei lân silfai zo naw a na, kha lei khan LALPA mipuihai chunga khan hri kha ân lêng a na,

¹⁸vawisûn hin LALPA chu nghat- san in tum el ding maw? Hienga vawisûn hin LALPA chunga in hel el chun zinga chun Israel mipui po po chungah a lunginsen ngei ding a nih.

¹⁹Amiruokchu, in ram hluo hi ân thieng naw a ni chun, LALPA ram sûng, LALPA biekbûk umna hmunah hung ve el unla, keini lai um ve el ta unla; amiruokchu, LALPA kan Pathien maichâm ti naw chu, maichâm dang siem chun chu LALPA chungah hel naw ro; chun, kan chunga khawm hel naw ta unla.

²⁰Zera naupa Akan khan thil pumpêka khan thil a suksuol a, Israel mipui po po chunga khan lunginsenna a tla a ni naw am a ni kha? Ama kha ama bawsietnaa khan ama chau ringawt a bohmang el bik naw kha,’ an ti a ni ie,” an ti a.

²¹Chuongchun, Reuben mihai le Gad mihai le Manasse hnam zâtvehai chun Israelhai hnam puipa chu an dawn a,

²²an kuomah, “LALPA, pathienhai Pathien, LALPA, pathienhai Pathien chun a hriet a; Israelhai khawmin hre raw se! Kan maichâm siem hi LALPA nghatsan tuma hel tumna amanih, thil suksuol tumnaa mania siem kan ni chun, (vawisûn ngei khawm hin mi hla naw el ro)

²³pumrawhmang thilinhlânna dingin amanih, fâk ding thilinhlânna dingin amanih, inremnaa thilinhlânna dingin amanih a ni chun ama LALPA ngeiin hung ngaituo raw se.

²⁴Nakie pha chun in thlahaiin kan thlahai kuomah, ‘LALPA Israelhai Pathien hi nangnîn ieng am in hmang phâk vena a um lie?

²⁵Nangni Reuben mihai le Gad mihai, LALPAIN keini le nangni ta dingin Jordan hi ramri dingin a siem in sawnnaw, LALPAA hin chanpuol in nei ve hlak lêm,’ hung ti hlau rawi an tih tia, fimkhurna leia thaw san nei taka thaw kan nih in sawnnaw, in thlahaiin kan thlahai chu LALPA ṭina châng hre lovin an la siem el thei in sawnnaw.

²⁶Chuleiin, ‘Hung ta u, maichâm siem ei tiu, pumrawhmang thilinhlânna ding le inthâwina ding ruok chu ni lovin,

²⁷keini le nangni le ei hnunga ei thlahai kâra hrietna ding nîng a ta, chuongchun, kan pumrawhmang thilinhlânhai, kan inthâwina dâm le, kan inremna thilinhlânhai hin LALPA rawng kan bâwl theina dingin a nih; chuong naw chun in thlahai khawmin nakie tieng kan thlahai kuoma chun LALPAAH chanpuol in nei ve naw ie, hung ti rawi an tih,’ kan ti a nih.

²⁸Chu nawa khawm, nakie pha kan kuoma manih, kan thlahai kuoma manih chuong anga an la hung ti pha leh keinin, ‘En ta unla, kan thlatuhaiin LALPA maichâm umdân an siem hi pumrawhmang thilinhlânna ding le, inthâwina ding a ni naw a, keini le nangni kâra hrietna a ni lem, kan la tina dingin,’ kan ti a nih.

²⁹ LALPA chunga chu helin vawisûn hin LALPA nghatsana, LALPA ei Pathien a biekbûk bula maichâm ngawt naw hi pumrawhmang thilinhlânnain amanih, fâk mi thilinhlânna dingin amanih, inthâwina amaniha maichâm siem kan ni nawzie chu,” an ta.

³⁰Chun, thiempu Phinehas le a kuoma um mipuihai mi lien, Israel hnama lusahai chun Reuben mihai le Gad mihai le Manasse mihai thuhril an hriet chun anni a suklâwm ta hle a.

³¹Chun, thiempu Eleazar naupa Phinehas chun Reuben mihai le Gad mihai le Manasse mihai kuoma chun, “LALPA chungah thil in suksuol naw leiin, tuhin chu LALPA chu eini lai a um ngei a nih ti ei hriet tah a nih; chuongchun, Israelhai chu LALPA kuta inthawkin in sansuok tah a ni hi”, an ta.

³²Chuongchun, thiempu Eleazar naupa Phinehas le mi lienhai chu Reuben mihai le Gad mihai kuoma inthawk chun Gilead rama inthawk chu Kanaan ram tienga Israelhai kuom tienga chun an kîr nâwk a, thu chu an vân tlun nâwk ta a.

³³Chuong thu chun Israelhai chu a suklâwm hle a; chun, Israelhai chun Pathien chu an inpâk ta a; chuongchun, Reuben mihai le Gad mihai chu hang do a, an umna ram hang suksietpêk thu chu an hril nâwk ta naw a.

³⁴Chun, Reuben mihai le Gad mihai chun chu maichâm chu Ed[5] an inbûk a, “LALPA chu Pathien a lo ni ngei ti ei kâra hin hrietpuitu a ni leiin”, an ta.