Read Hmar 2 THESSALONIKA 2 Bible Online

2 THESSALONIKA 2 - Hmar bible

2 THESSALONIKA 2

¹Nisienlakhawm, unauhai, ei Lalpa Isu Krista hungna le a kuoma ei hang inkhâwmna ding thua chun,

²“Lalpa Ni chu a tlung zing tah,” tina thlarau[1] leiin amanih, thu leiin amanih, kan kuoma inthawka lekhathawn ang leiin amanih, in lungril inhnîng el nawna ding le in buoi bawk nawna dingin kan ngên cheu a nih.

³Tûkhawmin iengkhawmin hlêm naw raw se cheu; tlûksanna chu a hung tlung hmasa zeta, Dân Bawsepa, bohmang naupa chu, a hung inlang naw chun, chu Ni chu tlung si naw ni a.

⁴Ama chu, Pathiena an inbûk taphawt le sakhuo po po doin an chunga um tumin inchawimawi a tih; chuongchun, Pathien biekina ṭhungin Pathien ang rauin intâr suong a tih.

⁵In kuoma ka hung um lai khan chuong thu chu ka hril hlak cheu ti in hriet zing naw am a nih?

⁶Ama hun tak chauah a hung inlang theina dingin iengin am a khapa ti tuhin in hriet.

⁷Dân bawsietna thurûk chun tu khawm hin sin a thaw zing a ni si a; nisienlakhawm, a khaptu chun lâk hmanga a um hma poin khap a ta.

⁸Lâk hmang a ni pha chun Dân Bawsepa chu hung inlang nghâl tâng a tih. Lalpa Isun ama chu a baua thuokin sukhlum a ta, a hunga inlârnain sukbohmang a tih.

⁹Chu Dân Bawsepa hungna chu Setan sinthaw zie ang peiin, thilthawtheina tinrêng dâm, inchikna tinrêng dâm, khêl thilmak tinrêng leh,

¹⁰bohmang zinghai dinga fel nawna hlêmna tinrêng leh nîng a tih, sandama an um theina dinga thutak hmangaina chu an pawm naw leiin.

¹¹Chuleichun, thukhêl chu an awina dingin Pathienin suol sinthawna chu an kuomah intlungtir a tih,

¹²thutak awi lova, fel nawnaa lâwm lemtuhaiin thiemnaw an chang vawng theina dingin.

¹³Unau, Lalpa idittakhai, Thlarau isukthiengnaa le thutak ring leia sandama um dingin a tîra inthawka Pathienin a thlang cheu leiin, in chungthua hin Pathien kuomah lâwmthu hril rawp ding hrim kan nih.

¹⁴Chuong anga ding chun ama chun kan Chanchin Ṭhaa hin a ko cheu kha, ei Lalpa Isu Krista ropuina nei dingin.

¹⁵Chuongchun, unauhai, ngîr det unla, thurosiehai chu, thu hrilin amanih, kan lekhathawnin amanih kan inchûktir cheu kha, pawm tlat ro.

¹⁶Chuongchun, ei Lalpa Isu Krista ngei le, Pathien ei Pa, a mi hmangaitu le lunginsietna leia chatuona thlamuongna le beiseina ṭha mi petu chun,

¹⁷in lungrilhai chu sukthlamuongin, thil thaw ṭha le thu hril ṭha tinrêngin sukdet raw se.