Read Hmar 1 TIMOTHE 1 Bible Online

1 TIMOTHE 1 - Hmar bible

1 TIMOTHE 1

¹Paula, Pathien a mi Sandamtu le Krista Isu ei Beiseina ruot anga Krista Isu Tirko chun;

²Ringnaa ka nau taktak Timothe kuomah: Pathien ei Pa le, ei Lalpa Isu Krista kuoma inthawka lunginsietna dâm, zângaina dâm, inremna dâm hung um raw se.

³Makedonia rama ka fe ding laia Ephesia um zing dinga ka ngên che ang khan, mi ṭhenkhathai chu inchûktirna danglam hrim inchûktir lo dinga i kâwk theina ding le,

⁴tienami mei mei le sui sêng lo thlatuhai thu (ringnaa Pathien khawsakzie um hi sukṭhat nêka insêlna siem lem hlaktu chu) ngaisak lo dinga kâwk dingin tu khawm hin ka la ngên rawp che a nih.

⁵Nisienlakhawm, kâwkna san chu lungril inthieng le, sie le ṭha hrietna inthieng le, ringna taktaka inthawka hung suok hmangaina chu an nei theina dingin a nih;

⁶mi ṭhenkhathai an fe kâwi leiin chu chu an pêtsan a, thu teplo hrilna tieng an fe ta lem a.

⁷An thu hril umzie le ngamtaka an thu hril chanchin chu hre si lovin, Dân inchûktirtuhai ni an nuom hlak a nih.

⁸Dân chu a ṭha ti ei hriet si a, miin a hmang ṭha phawt chun.

⁹Hieng hi hre hai sienla, “Dân hi mi feltak ta dinga siem a ni naw a, dân pawisa nawhai le dân bawsiehai ta ding dâm, mi inthieng nawhai le Pathien inzâ nawhai ta ding dâm, pahai thattuhai le nuhai thattuhai ta ding dâmin,

¹⁰indit hmanghai ta ding dâm, mawngkawhurhai ta ding dâm, mihriem inru hmanghai ta ding dâm, khêl hril hmanghai ta ding dâm, inkhâm tehlêm hmanghai ta ding dâm, inchûktirna indik ang ni lova thil dang hrim;

¹¹inpâktlâk Pathien Chanchin Ṭha ropui inchûktirna indik ka kuomah inkawltira um ang ni lo ta ding chun siem a ni lem.

¹²A mi sukhrâttu Krista Isu ei Lalpa kuoma chun lâwmthu ka hril a nih; ringumah a mi ngai a, a rawngbâwltuah a mi ruot ta leiin.

¹³Inhma chun hrilsetu le suknawmnatu le sawisatu ni lang khawm, awi naw puma hre lova thaw ka ni leiin zângaina chu ka hmu a nih;

¹⁴chun ei Lalpa lunginsietna chu ringna le Krista Isu hmangainain nasatakin a liem ta a.

¹⁵“Krista Isu mi suolhai sandam dingin khawvêla hin a hung,” ti hi ring a umin, pawm tlâk tak a nih; anni laia mi suol tak ka ni hi.

¹⁶Nisienlakhawm, hi lei hin a nih, zângaina ka hmu chu, Isu Krista chun mi suol tak keimaa hin a dawtheizie po po ân langtir theina dingin, tuta chen chu chatuon hringna hmu dinga ama la hung awi dinghai khîkhmûna dingin.

¹⁷Laltak chatuona um, se thei lo, hmu thei lo Pathien tak chau chu chatuona chawimawi le ropuiin um raw se. Amen.

¹⁸Ka nau Timothe, inhmaa i chanchin an hril lâwk thuhai ang khan chu kâwkna thu chu kân kawltir che; chuong le chun, indona ṭha chu i do theina dingin;

¹⁹ringna le sie le ṭha hrietna inthiengtak pawm tlatin. Mi ṭhenkhathaiin chuong chu pei thlain, ringna kawnga chun lawngkawi angin an kawi se ta a.

²⁰Chuhai lai chun Humenai le Alexander an na; Pathien hrilsiet naw an inchûk theina dingin anni chu Setan ka pêk a nih.