Read Hmar 1 TIMOTHE 5 Bible Online

1 TIMOTHE 5 - Hmar bible

1 TIMOTHE 5

¹Putar deuhai chu hal naw la, pa angin thlêm lem rawh; tlanglakhai chu unau angin;

²pitar deuhai chu nu angin, nunghâkhai chu inthiengtakin farnu angin.

³Hmeithai, hmeithai taktakhai chu chawimawi rawh.

⁴Nisienlakhawm, hmeithai tûkhawmin nauhai amanih, tuhai amanih nei sienla, chuonghai chun anni insûng tienga Pathien ngaisaka um dân le, anni keitleituhai chunga ṭhatzie inchûk zet raw hai se; chu chu Pathien lâwm zâwng a ni si a.

⁵Hmeithai taktak mâkhât chaua um chun Pathien chungah beiseina a nei tlat a, a sûn a zânin hni le ṭawngṭaiin a um rawp hlak.

⁶Nisienlakhawm, hmeithai mâni inhawitirna ngawta inpe chu, a dam lai khawm a thi a nih.

⁷Sawisêlboa an um theina dingin chuong thu khawm chu pe rawh.

⁸Nisienlakhawm, tûkhawmin mâni mihai ta ding a ngaituo lâwk naw a, mâni insûnga mihai ta ding hman a ngaituo lâwk naw chun, ringna chu ân phat san a, awi naw mi nêkin a suol lem a nih.

⁹Hmeithaihai kum sâwmruk chen hnuoi tieng ni lova, mi pakhat nuhmei lo ni ta chu hmeithaia ziek thei a nih

¹⁰thil ṭha thaw kawnga mi inpâka um tah, nauhai lo châwm tlei taa, mikhuolhai lo intlungtir taa, mi inthienghai ke lo sâwp taa; lunginzînghai lo sawmdâwl taa, thil ṭha tinrêng taimataka a lo thaw ta phawt chun.

¹¹Hmeithai la nunghâk deuhai chu ziek nuom naw rawh; Krista tieng an det nawin, pasal nei an nuom hlak si a;

¹²an thutiem hmasa chu an bawsiet hlak leiin thiemnaw changin an um hlak a nih.

¹³Chu naw khawm chu, in tinah an lêng lâwr a, thabo khawm an chîng hlak a, thabo chau khawm ni lovin, thu hril naw ding ding hrilin, bau tam le mihai thil thaw dempêk an hmang bawk a nih.

¹⁴Chuongchun, hmeithai la nunghâk deuhai chu pasal nei hai sienla, nauhai nei sienla, insûng khawsak rel hai sienla, sawisêlna ding remchâng hrim hmêlma chu inhmutir naw hai sienla ka nuom a nih.

¹⁵Tu khawm hin mi ṭhenkhat chu Setana tieng panin an pêt hmang ta si a.

¹⁶Ringtu nuhmeiin hmeithaihai kawl nei sienla, amain sawmdâwl raw se; Kohran chu sukbuoiin um naw raw se, hmeithai taktakhai chu an sawmdâwl theina dingin.

¹⁷Kohran upa ro rêl ṭhahai chu a lêt hnia chawimawi tlâka ngai ni raw hai se; thu hril le inchûktirna kawnga sininrimhai chu chawimawi tlâka ngai nâwk zuol ni raw hai se.

¹⁸Pathien Lekha Thu chun, “Sebâwng chalin bu a chîl laiin a hmûr khit naw rawh,” a ti a. “Sinthawtu chu a hlaw hmu tlâk a nih,” a ti bawk a.

¹⁹Kohran upa an hêkna chu hretu pahni amanih, pathum amanih baua inthawk naw chu pawm naw.

²⁰Thil suksuoltuhai chu mi po po hmaah kâwk rawh; mi dang khawma an ṭi ve theina dingin.

²¹Hieng thu hi thlier bîk nei lovin, thlier bîk neia iengkhawm thaw lovin, Pathien le Krista Isu le Vântirko thlanghai mithmuin zâwm dingin ṭhahnemngaitakin kân hriettir che.

²²Tû chunga khawm kut innghat thut naw la, mi dang suolnahaia chun ṭhang bawk naw; insukthieng zing rawh.

²³Tui chau dâwn mi ni ta naw la, i phîng lei le i damnaw rawp leiin uoin tlâwmtê hmang hlak rawh.

²⁴Mi ṭhenkhat suolhai chu ân lang zing a, rorêlna chu a tlung hmasa hlak; mi ṭhenkhat suol chun an hnungah a zui lem hlak.

²⁵Chuong ang bawkin thil thaw ṭhat ân lang zing chi a um a, chuong ang nawhai khawm chu thup thei a ni nawh.