Read Hmar 1 TIMOTHE 6 Bible Online

1 TIMOTHE 6 - Hmar bible

1 TIMOTHE 6

¹Pathien hming le a închûktirna thu hrilsieta a um nâwna dingin, suok rîngkawl bât taphawthai chun anni puhai iengkimah chawimawi tlâkah ngai raw hai se.

²Chun, ringtu pu neihai chun, unau an ni leiin ngainêp naw raw hai se; amiruokchu, ṭhathnemna hmutuhai chu ringtu le dittakhai an ni leiin an rawng bâwlpêk zuol lem raw hai se. Hieng thu hi inchûktir la, infui rawh.

³Mi tûkhawmin inchûktirna dang ân chûktir a, thutak (Ei Lalpa Isu Krista thu) le, Pathien ngaisakna inchûktirna tieng a awi naw chun,

⁴ama chu a chapo a, iengkhawm a hriet naw a, hriet nêk hmanin insêl le thu kal kawnga chun ân vêt ta lem a nih. Chuonga inthawk chun, inhnarna dâm, insuolna dâm, hrilsietna dâm, a ṭha naw tieng ringna dâm a hung suok a,

⁵lungril sie nei le thutak nei naw mi nina, sêlhrâtna dâm a suok hlak; chuonghai chu, Pathien ngaisak hi hlâwkna amanih titu an nih.

⁶Pathien ngaisak hi lungawina ṭhang chun hlâwkna nasatak a ni hrim a nih.

⁷Khawvêla hin iengkhawm ei lûtpui naw a, iengkhawm ei suokpui thei bawk nawh.

⁸Nisienlakhawm, fâk ding le sil ding neiin, chuonga chun lungawi ei tih.

⁹Amiruokchu, hausak tumtuhai chu thlêmnaa dâm, chânga dâm, invêtthlâk le sukkhawhlo thei inhâwkna tamtaka dâm an tlu lût a, chuong inhâwknahai chun sietna le bohmangnaah mi a suktlum hlak.

¹⁰Tangka sum ngainat hi suol tinrêng bul a ni si a; chu chu ṭhenkhatin an inhnar a, ringna chu an fe hmang san a, anni le anni lungngaina tamtakin an insun tlang ta nghuon a.

¹¹Nisienlakhawm, nang Pathien mi, chuong thilhai chu tlânsan la, felna dâm, Pathien ngaisakna dâm, ringna dâm, hmangaina dâm, dawtheina dâm, thuhnuoirawlna dâm hnawt pei rawh.

¹²Ringna inruolsiekna ṭha chu thaw la, chatuon hringna chu chel rawh; chu chu chang dinga ko i na, hretu tamtakhai mithmuah ṭanna ṭha chu i ṭan ta kha.

¹³Pathien thil tinrêng sukhringtu le, Krista Isu, Pontia Pilat hmaa ṭanna ṭha ṭantu mithmua chun, thu ka pêk che;

¹⁴ei Lalpa Isu hung inlar nâwk hmakhat chu thupêk kha sawisêlbo le inthiengtaka pawm dingin.

¹⁵Chu inlârna chu a hun taka chun inpâktlâk thuneitu tak chau, laltakhai laltak, lalhai lal chun inentir a ti che.

¹⁶Ama chau chun thi thei nawna a nei a, var hnai thei ruol lova chun a um a, ama chu tûkhawmin an hmu ngai naw a, hmu khawm an hmu thei naw bawk a, ama kuoma chun chatuona chawimawina le thilthawtheina chu um raw se. Amen.

¹⁷Hi khawvêla hausahai hi chapo naw ding le sum ringum nawah an beiseina innghat lova, thil po po lâwmna dinga mi petu Pathien chunga chun innghat lem dingin kâwk rawh.

¹⁸Thil ṭha thaw dingin, thil ṭha thaw hau dingin, tiktlaia thâwlâwm pe pei dingin,

¹⁹hringna, hringna taktak chu an vawng theina dingin, hun hung tlung dinga ding chun lungphûm ṭhatak an ta dinga lo rem dingin infui rawh.

²⁰Aw Timothe, i kuoma inkawltira um chu kawl ṭha rawh, Pathien inzâ naw tieng thu hril mei mei le, indik nawtaka, “Varna,” an iti insêlna hi nghat san rawh.

²¹Chu chu ṭhenkhathaiin nei amanih insâwnin, ringna chu an fe kawisan ta a. Lunginsietna in kuomah um raw se.