Read Hmar 2 TIMOTHE 4 Bible Online

2 TIMOTHE 4 - Hmar bible

2 TIMOTHE 4

¹Pathien mithmu le, mi hring le mithi ngaituotu ding, Krista Isu mithmua chun, ân lârna le a ram sâlin, ṭhahnemngaitakin kân hriettir che:

²Thu chu hril rawh, a huna khawm, a hun nawa dâm khawm thaw pei rawh; dawtheitaka inchûktir peiin an thiem nawna inhriettir la, infui la, kâwk rawh.

³Inchûktirna indik an ngai pei naw hun a la tlung ding a ni si a; an nahai ân za leiin anni dit zâwng angin inchûktirtuhai an kuomah inkhâwm lem an tih.

⁴An na chu thutak tieng chun suksêt an ta, tienami thu tieng pêt tâng an tih.

⁵Nang ruok chu iengkimah fimkhur la, rinum tuor la, Chanchin Ṭha hriltu tieng sin thaw la, i rawngbâwlna kha hlen rawh.

⁶Kei chu tu khawm hin inhlânin ka um zing ta si a, ka suok pha a tlung tah.

⁷Inruolsiekna ṭha chu ka thaw zo ta a, kân tlânsiekna lampui chu ka suo ta a, ringna chu ka vawng zing ta a nih.

⁸Tuhin chu felna lallukhum chu ka ta dingin siein a um ta a, chu chu Lalpa, ngaituotu feltak chun chu nia chun mi pêng a tih; ka kuoma chau ni lovin, a hung inlang nâwkna ngaituhai po kuoma khawm.

⁹Inhmawtakin ka kuomah hung hrâm hrâm rawh.

¹⁰Dema chun tulai khawvêl hi a ngainat leiin a mi mâksan ta a. Thessalonikaah a fe ta si a; Kreske chu Galati ramah a fe ta a, Tita chu Dalmati ramah a fe ta bawk a, Luka chau ka kuomah a um tah.

¹¹Marka kha fiel la, hung ṭhuoi ve rawh; ama chu rawngbâwl tieng ka ta dingin a ṭangkai si a.

¹²Tukik chu Ephesiah ka tir ta a.

¹³I hung pha leh Troasa Karpa kuoma zakuo fuol ka mâksan kha, lekhabuhai le khan hung chawi la, savun lekha mawl kha hung chawi rawh.

¹⁴Alexander, dâr sung thiem kha ka chungah a suol bêk bêk hlak a nih;

¹⁵Lalpa chun a thil thaw ang peiin thung a tih. A kuoma khan nang khawm fimkhurtakin um rawh, ei thu a kal nasa hle si a.

¹⁶Ka thiemna thu ka hril hmasak ṭum chun tûkhawmin an mi ṭhangpui nawh, an mi thlathlam ta vawng lem a nih; a maw chu phurin um tâwl naw raw hai se.

¹⁷Chanchin Ṭha keima leia hril kima a um theina ding le, Jentailhai po poin an hriet theina dingin, Lalpa chun a mi ṭan a, a mi sukhrât ta lem a nih; chun sakeibaknei baua inthawk kha sansuokin ka lo um ta a nih.

¹⁸Lalpa chun suolna po poa inthawkin mi sansuok a ta, a vân rama chun himtakin mîn tlung a tih; ama chu chatuona ropuiin um raw se. Amen.

¹⁹Priska le Akuila, Onesiphora sûnghai le khan, chibai mi bûkpêk rawh.

²⁰Erasta chu Korintha chun a um zing ta a, Trophim ruok chu Miletiah damnawin ka mâksan tah.

²¹Thlasik hmain hung hrâm hrâm rawh aw. Eubul hai, Puden hai, Lina hai, Klaudi hai, unau po pohai leh chibai an bûk che.

²²Lalpa chu i thlarau kuomah um raw se. Lunginsietna in kuomah um raw se.