Read Hmar TITA 3 Bible Online

TITA 3 - Hmar bible

TITA 3

¹Lalhai le thuneituhai kuoma intuklût ding dâm, thu awi ding dâm, thil ṭha tinrêng thawa inzo ding dâm,

²tûkhawm hrilsiet naw ding dâm, kâwmaw insuo naw ding dâm, mi po po kuomah thuhnuoirawlna tinrêng suklanga nuninnêm ding dâmin anni inhriet suotir nâwk rawh.

³Eini khawm inhma khan invêt tak dâm, thu awi naw dâm, hlêma um dâm, châkna le lâwmna tinrêng rawng bâwl dâm, suol le îtthîk hmanga um dâm, tirdakum dâm, intheida tuo dâm ei ni si a.

⁴Nisienlakhawm, Pathien ei Sandamtu ngilneizie le, mihriem chunga a hmangaizie chu a hung inlang lai khan,

⁵thil feltaka thaw, eini ngeia thawhai chu, chu lei chun ni lovin, Thlarau Inthieng siem tharna sâwpna le siem ṭhat nâwkna chun, a lunginsietna chun a mi sandam tah.

⁶Chun, Thlarau Inthieng chu Isu Krista ei sandamtu zâra chun nasatakin ei chungah a buok kha.

⁷Chuongchun, a lunginsietnaa thiem inchangtira hung umin, chatuona hringna beiseina ang peiin rohluotu dinga siemin um thei ei tih.

⁸“Pathien ring tahai chun thil ṭha thaw pei dingin ngaituo rawhai se,” ti thu hi ring a um a nih, chuong thu chanchin chu huoitaka i hril tlat ka nuom a nih. Chuong thu chu mihriemhai ta dingin a ṭhain a ṭhahnem a nih.

⁹Nisienlakhawm, indawnna invêt dâm, thlatuhai thu suina dâm, insêlna dâm, Dân thua insuolna dâm chu nghatsan pei rawh; chuong chu thil ṭangkai naw, iengkhawm ni lo a ni si a.

¹⁰Ringdân tum nei mi chu vawikhat vawihni kâwk hnung chun inthlawppui ta naw rawh;

¹¹chuong ang mi chu a fe pêtin a suol a ni ti in hriet deh; ama le ama thiemnaw inchangtir a ni si a.

¹²Artema amanih, Tukik amanih i kuomah ka hung tir pha chun Nikopoliah ka kuomah hung hrâm hrâm rawh; chutaka chun thlasikah um ka tum si a.

¹³Zena, dân hretu le, Apollo chun iengkhawm an tlâksam nawna dingin an inzinnaa chun ṭhahnemngaitakin ṭhangpui tâwl raw khai.

¹⁴Ei mipuihai chu an ni tin mamawhai hmu theina dingin thilṭha thaw pei dingin inchûktir la, râ insuo thei lova an um nawna dingin.

¹⁵Ka kuoma um po pohai hin chibai an bûk che. Ringnaa mi hmangaituhai kha chibai mi hung bûkpêk rawh. In rênga kuomah lunginsietna um raw se.