Read Hmar HEBRAIHAI 1 Bible Online

HEBRAIHAI 1 - Hmar bible

HEBRAIHAI 1

¹Pathienin inhma khan zâwlneihai hmangin ei thlatuhai kuomah vawi tamtak le kawng dang dangin thu a lo hril hlak a,

²hieng ni nuhnunghaia hin eini kuomah a Naupaa chun thu a hril tah. Ama chu iengkim rohluotu dingin a ruot a, amaa bawk chun khawvêlhai chu a siem a.

³Ama chu a Pathien ropuina var le, a tak angpui ngei leh, ama thilthawtheina thuah iengkim tungdingtu niin, suolhai a sukthieng hnungin chung tienga Ropuitak changtienga khin a hang ṭhung a.

⁴Vântirkohai nêka hming ṭha lem ro a hluo sâwng ang ngeiin anni nêka ropui lem a hung ni ta si a.

⁵Vântirko hai laia tu kuom am hi thu hi a hril hlak a? “Nang chu ka Naupa i nih, Vawisûn hin ka nei che a nih,” ti le, “A ta dingin Pa ning ka ta, Ama chu keia ta dingin Naupa ning a tih,” ti hi.

⁶Chun, Nau lutir chu khawvêla hin a ṭhuoi lût nâwkin, “Pathien vântirkohai po po khawmin, Ama chibai bûk raw hai se,” a ti a.

⁷Chun, vântirko chungchâng thua chun hi hi a hril a nih: “Ama chun a vântirkohai chu thliah a siem hlak a, A rawngbâwltuhai chu meichawkah a siem hlak,” ti hi.

⁸Naupa chungchâng thua ruok chu hi hi a hril a nih: “Aw Pathien, i lalṭhungpha chu chatuon chatuonin um a ta; Indikna lal hmawl khawm chu, I ram lal hmawl a nih.

⁹Felna chu i ngaina a, Bawsietna chu i theida kha; Chuleiin, Pathien, i Pathien chun, I ruolhai nêk chun, Hlimna hriek a nâl nasa lem che hi,” ti le,

¹⁰“Nang Lalpa, a tîrin, Leilung innghatsan i phûm ta a, Vânhai khawm i kutsuok a na,

¹¹Chuonghai chu la bohmang a ta, Nang ruok chu um sawng ding i nih; Chun, chuonghai po po chu, Silfên angin la hlui a ta,

¹²Puon angin zuol bawk i ta Silfên ang elin, Chuongchun, hung danglam tâng a ta; Nang ruok chu i pângngai rawp a, I kumhai khawm bo naw ni,” tiin.

¹³Nisienlakhawm, vântirkohai laia tu chungchâng thu âm hi hi a hril hlak a? “Ka changtieng ṭhung rawh, I hmêlmahai i kepha sirsana, Ka siem hmakhat chun,”ti hi.

¹⁴Anni po po chu rawngbâwlna thlarauhai, sandamna rohluotu dinghai ta dinga rawngbâwl dinga tirsuok an ni naw am a nih?