Read Hmar HEBRAIHAI 10 Bible Online

HEBRAIHAI 10 - Hmar bible

HEBRAIHAI 10

¹Dân thu chun thil ṭha hung um dinghai angpui nei lovin, a hlim chau a nei leiin, kum tina inthâwina pângngai an inhlân rawphai chun, a hung hnaihai chu iengtika khawm sukfamkim thei si naw ni a.

²Chuong chu ni naw sien chu a betuhai chu vawi khata sukthieng nghâla umin suolhai inhrietna nei ta naw nihai a, inhlân chu an ma dai ta naw ding am a nih?

³Nisienlakhawm, chuong inthâwinaa chun kum tinin suolhai hriet nâwkna a hung um rawp lem a nih.

⁴Bâwngchalhai le kêlhai thisen chun suolhai sukbo thei ruol a ni si naw a.

⁵Chuongchun, khawvêla a hung lût laiin: “Inthawina le thil inhlân i dit naw a, Ka ta dingin taksa i mi buotsai pêk lem a;

⁶Pumrâwhmanga inthâwinahaia le, Suol ta dinga inthâwinahaia chun Lâwmna hrim i nei nawh.

⁷Chu phingle chun keiin, ‘Aw Pathien, ngai ta, (Lekhabu zuola chun ka thu ziek a nih), I dit zâwng thaw dingin ka hung,’ ka ti a, ” a ta,

⁸A saka khin, “Inthawina dâm, thil inhlân dâm, pumrâwhmanga inthâwina dâm, suol ta dinga inthâwina dâm i dit naw a, chuonga chun lâwmna i nei bawk nawh,” a ti a. (Chuonghai chu dân thu anga inhlân a nih).

⁹Chu phingle chun, “Ngai ta, i dit zâwng thaw dingin ka hung,” a lo ti ta a. A pahnina hi ân tungding theina dingin a hmasa chu a sukbo ta a nih.

¹⁰Chu chu dit zâwng chun, Isu Krista taksa vawi khata hlân nghâl lei khan sukthiengin ei um tah.

¹¹Chun, thiempu tinrêngin kâwla nisa suok tiema rawng bâwlin suolhai iengtik lai khawma sukbo thei naw inthâwina pângngai inhlân rawpin an ngîr hlak;

¹²ama ruok hi chu, chatuona dingin suolhai ta dinga inthâwina ṭum khat chau ân hlân hnungin, Pathien changtieng a hang ṭhung ta lem a.

¹³Chu chena inthawk chu, a hmêlmahai a kepha innghatnaa siem an ni hmakhat chu a nghâk zing a.

¹⁴Thil inhlân ṭum khat chauin sukthieng tahai chu chatuona dingin a sukfamkim ta si a.

¹⁵Chun, Thlarau Inthieng khawm chun a mîn hriettir bawk a:

¹⁶“Chuong ni hnunga chun, An kuoma thu ka thlung dinghai chu hieng hi a nih, Lalpain a tih, An lungrilah ka thupêkhai sieng ka ta, An lungrilah ziek bawk ka tih,” tia a hril hnung khan;

¹⁷“An suolhai le an bâwsietnahai Hre zing ta naw ning,” a ti si a.

¹⁸Chuongchun, chuong ang ngaidamna taphawta chun suol ta dingin thil inhlân a um ta naw a nih.

¹⁹Chuongchun, unauhai, Isu thisen lei chun, Hmun Inthienga khan lût ei huom a;

²⁰Puonzâr (a taksa) chu fe thlengin, lam thar le hring a mi hawng pêk ta a;

²¹Chuongchun, Pathien sûnghai chunga Thiempu ropuitak ei nei leiin,

²²ei lungrila sie le ṭha hrietna faitaka umin, ei taksa khawm tui inthienga sâwpa umin, ringna famkim neia lungril indiktak putin hnai ei tiu.

²³Inhnîng lovin ei beisei thuring hi pawm tlat ei tiu; thutiemtu chu ring a um si a.

²⁴Chun, hmangai le thilthawa inchawktho tuo dingin inngaituo seng ei tiu.

²⁵Ṭhenkhat thaw dân anga inkhâwm dâm bânsan lovin, infui tuo lem ei tiu, ni chu hung hnai deu deua in hrietin infui tuo nâwkzuol sau ro.

²⁶Thutak hrietna famkim chu ei chang hnunga thil ei suksuol ṭâl chun, suolhai dingin inthâwina um ta dêr naw ni a,

²⁷rorêlna ṭi lâwkna râpthlâktak ieng amani leh dotuhai kâng hmang dinga lungsenna mei chu um lem tâng a tih.

²⁸Mosie Dân thu pawisa naw mi chu, hretu pahni pathum amani thuin lainatna ṭhang lovin an thi hlak.

²⁹Pathien Naupa sirde a, thuthlung thisen ama sukthiengna thil narâna ruota, lunginsietna Thlarau suknuortu chu, chu mi chu ieng anga hremna nasa lem tuor tlâka ruot ni dingin am in ngai a?

³⁰“Phuba hrim hrim keia lâk ding a nih, keiin thung ka tih,” ti le “Lalpa chun a mihai ngaituong a tih,” ti nâwktu chu ei hriet si a.

³¹Pathien hring kuta tlûk chu thil râpthlâktak a nih.

³²Nisienlakhawm, inhmaa sukvara in um hnunga tuorna buoi nasatak in tuor lai nihai kha ngaituo nawn nâwk hlak ro:

³³kawng khata chun hmusit le rinumhai khawm tuorin ennuoma siemin in um a, kawng khata chun chuong anga inhmaa lo umhai kha tuorpuituhai in hung nih.

³⁴Kawlbunhai chu in lainat a, thil ṭha lem, um sawng bawk ding chu, mâniin in nei ti hrein, in thilneihai lâkpêka in umnaa khawm lâwmtakin in lo tuor ta a.

³⁵Chuongchun, in ringna lâwmman pêk nasatak nei ding chu peihâwn naw ro,

³⁶Pathien dit zâwng in thaw hnungin thiltiem chu in hmu theina dingin selna in ngai a nih.

³⁷“Sawt nawtê hnungah, A hung ding chu a hung ding a ni si a. Sâwt riel ta naw nih.

³⁸Nisienlakhawm, ka mi fel chu Ringnain hring a tih; A hnungtawl ruok chun, Ka lungrilin amaa chun lâwmna hrim nei naw ni,”

³⁹Nisienlakhawm, eini chu bohmang dinga hnungtawl pâwla mi ei ni naw a, hringna humhim dinga ringna nei pâwla mi ei ni lem.