Read Hmar HEBRAIHAI 12 Bible Online

HEBRAIHAI 12 - Hmar bible

HEBRAIHAI 12

¹Chuongchun, sumpui nasatak ang thlîrtuhai min huol vêla ei um leiin, a mi sukhnawk taphawt le suol einia kawp tlat chu sie thla vêng ei ta, ei hmaa intlânsiekna uma hin seltakin tlân pei ei tiu.

²Isu ei ringna siemtu le sukfamkimtu tieng chu en zingin; ama chun a hmaa hlimna um lei chun muolphona chu ngainêpin, kraws chu a tuor a, Pathien lalṭhungpha changtieng khin a hang ṭhung ta a.

³In hung sâwl a, in thlarau tieng in hung chau nawna dingin, misuolhai theidana nasatak tuormuolsuotu ngei chu ngaituo ro.

⁴Suol doin thisen suok khawpin in la ṭhang naw a,

⁵infuina thu, nauhai kâwk anga kâwkna cheu kha in lo theinghil tah a ni maw? “Ka nau, Lalpa thununna chu ngainêp naw la, A kâwka i umin inthlada bawk naw rawh;

⁶Lalpa chun a hmangai chu a thunun hlak a, Nau a ilâwm taphawt chu a vuok hlak i sawnnaw,” ti hi.

⁷In tuor hi nangni thununna ding a nih; nauhai chunga thaw angin Pathienin in chungah a thaw a ni hi; pa thunun naw nau tû am a um hlak a.

⁸Nau po po ihlaw hlak thununna chu hlaw lova in um chun, nau tak ni lovin, sâwn in ni, a ni ding a nih.

⁹Chu naw khawm chu a mi thunun dingin ei taksa pahai ei nei kha, chuonghai chu ei inza si a; chu nêka nasa chun, ei hringna dingin, thlarauhai Pa thu thuin ei um naw ding am a nih?

¹⁰Anni chun ni sâwt nawtê ṭha an ti ang peiin an mi thunun ngei luo a, Ama ruok chun ân thiengna chu ei chang ve theina dingin, ei ṭhatna dingin a mi thunun lem a nih.

¹¹Chun, thununna hrim hrim hi tuor lai chun lâwmumin ân lang naw a, thlasietthlâkin ân lang lem hlak, tuor hnung ruok chun chutaka sawizawia umhai ta ding chun felna ra thlamuongumtak chu ân suopêk hlak.

¹²Chuongchun, kut kaithlahai chu dawm kâng unla, khûp zawihai chu sukhrât ro;

¹³chun, kebai chu sukpelsawl lova, sukdama a um lemna dingin, in kehai ta dingin lampui tlûnhai siem ro.

¹⁴Mi po po le inremna le inthiengna hnawt ro, chu inthiengna naw chun tukhawmin Lalpa hmu naw ni hai.

¹⁵Fimkhur takin en ro, Pathien lunginsietna chu tûkhawma in chân nawna dingin, chuong naw chun khâkna zung hung inder suoka sukbuoi cheuin, chu chun mi tamtak sukpawrchein an um hlak.

¹⁶indit hmang amanih, Esau anga Pathien inza naw mi amanih um rawi an tih. Ama chun a nau lutir nina chu bu vawikhat fâkin a zawr a.

¹⁷Chu hnunga chun malsâwmna ro chu hluo chu nuom hlein, mitthli tla pumin ṭhahnemngaitakin zawng sien khawm, simna remchâng a hmu tâk naw leiin peiin a um tah ti in hriet si a.

¹⁸Nangni chu tlâng tâwk thei, meia kâng dâm, sûm dum dâm, inthim dâm, thlipui dâm umna kha tlung in ni si naw a;

¹⁹tawtawrâwt inrîkna dâm, thu hril ri umna dâm kha, chu ri hretuhai chun thu dang hrim an kuoma hril ta lo dingin an ngên a,

²⁰“Sa chen khawmin tlâng chu tâwk sienla, lunga dêng hlumin a um ding a nih,” ti thupêk kha an tuor thei ta si naw a;

²¹an thil hmu khawm chu ṭi a um êm a, chuongchun, Mosiein, “Ka ṭiin kân thin nasa bêk bêk a,” a ti kha.

²²Zion tlâng dâm, Pathien hring khuo, vân Jerusalem dâm, tiem sêng nawhai vântirko inkhâwmpui dâm,

²³nau lutîr vâna hming chuong kohran kuom dâm, Pathien, mi po po ngaituotu kuom dâm, mi fel sukṭhat famkimhai thlarau kuom dâm,

²⁴Isu thuthlung thar palai kuom dâm, thisen the, Abel thisen nêka ṭha lem hriltu kuom dâm tlung in ni lem.

²⁵Thu hriltu chu lo dit naw rawi in tih, fimkhur ro. Hnuoia anni kâwk hmasatu kha an dit naw hmana, hremna an pumpel si naw chun, eini vâna inthawka mi kâwktu nghatsantuhai hin pumpel naw nâwkzuol ei tih.

²⁶Chu lai chun a râwl chun hnuoi hi a sukhnîng a, nisienlakhawm, tuhin chu, “Vawi khat chu hnuoi chau ni lovin, vân khawm la sukhnîng ka tih,” tiin a tiem ta lem a.

²⁷Chun, “Vawi khat la sukhnîng nâwk ka tih,” ti hin thil inhnîng nawhai chu a um zing theina dingin thil hung inhnînghai chu thil siemhai ang elin sawn hmangin a um ding a nih ti ân hriettir a.

²⁸Chuongchun, ram sukhnîng ruol lo ei chang leiin, lâwmtakin um ei tiu, chu zâra chun inza le ṭidêk pumin Pathien lâwm zâwngin rawng ei bâwl thei ding a nih;

²⁹ei Pathien hi mi kâng bohmang mei a ni si a.