Read Hmar HEBRAIHAI 4 Bible Online

HEBRAIHAI 4 - Hmar bible

HEBRAIHAI 4

¹Chuleiin, ṭîng ei tiu, chuong naw chun, a châwlnaa lûtna thutiema la umin, nangni laiah tûkhawm tling naw angin lo um hlau rawi in tih.

²An kuoma hril a ni ang bawk khan Chanchin Ṭha chu ei kuoma hril a ni ngei si a; nisienlakhawm, an thu ngai chun anni a sukṭhahnem si naw a, ngaitu taktakhai leh ringnaa zawmin an um naw leiin.

³Eini ring tahai hi chu châwlnaa chun ei lût zing a nih. “Ka lungsena kân khâm ang khan, Ka châwlnaa chun lût naw ni hai,” a ti ang khan, leilung insieng tira sinhai chu thaw zo ni ta sien khawm.

⁴Khâwlai hmuna manih ni sari ni thu hieng ang hin a hril a nih, “Chun, ni sari nia chun Pathienin a sinthaw po po a châwl san ta a,” tiin,

⁵Chun hi hmuna hin, “Ka châwlnaa chun lût naw ni hai,” a ti nâwk a.

⁶Chuongchun, ṭhenkhat chu châwlnaa chun an la lût ding thu a um leiin le, inhmaa Chanchin Ṭha hril dawngtuhai chu awi naw leia an lût ta naw leiin,

⁷sâwttak hnung khan David chun, “Vawisûn hin,” tiin ni ieng amanih a ruot nawn nâwk a nih, “Vawisûn hin a râwl in hriet chun, In lungril sukngar naw ro,” tia a hmaa ka hril ang khan.

⁸Josua chun anni chu ân châwltir ta si chun, chu hnunga chun ni dang thu chu hril naw ni.

⁹Chuongchun, Pathien mihai ta ding chun Châwlnia châwlna a la um ta rawp a.

¹⁰A châwlnaa lût ta chu, Pathienin ama sinthawhai a châwl san ang khan ama khawm chun a sinthawhai a châwl san ve ta a.

¹¹Chuongchun, tûkhawm chu thuawi nawna leia an tlûk anga ei tlûk nâwna dingin, chu châwlnaa lût ding chun ṭhahnem ngai ei tiu.

¹²Pathien thu hi a hring a, thil a thaw thei a, kâwlhnâm ngeituo ieng ang nêk khawmin a ngei a, hringna le thlarau, rulechâng le thlin kawi dar khawp hielin a sun thei a, lungrila ngaituo le tumhai hi a hriet nghâl thei a nih.

¹³Thil siem ama mithmua inlang naw hrim hrim a um nawh. Ei chanchin ei intlunna ding mithmua chun iengkim saruok le inhawng sain a um lem a nih.

¹⁴Chuongchun, vânahai fe thleng tah, Thiempu Laltak ropuitak, Isu Pathien Naupa chu ei nei leiin, ei thuring hi pawm tlat ei tiu.

¹⁵Thiempu Laltak ei hrâtnawnahai mi hrietpui phâk lo nei ei ni si naw a. Eini anga kawng tinrênga thlêmna tuok tah, suol ruok chu suol lo nei ei ni lem.

¹⁶Chuongchun, zângaina ei hmu theina ding le, ṭhangpui ei ngai phaa ṭhangpuina lunginsietna chu ei hmu theina dingin lunginsietna lalṭhungpha chu huoitakin hnai ei tiu.