Read Hmar HEBRAIHAI 5 Bible Online

HEBRAIHAI 5 - Hmar bible

HEBRAIHAI 5

¹Thiempu Laltak taphawt, suolnahai leia thilpêk le inthâwina ân hlân kawp theina dingin, mihriem laia inthawka lâk tuma lo umin, Pathien tieng thilhaia chun mihriemhai ta dingin ruot an ni hlak si a.

²Chuonghai chun iengkhawm hre nawhai le lampui inhmanghai chungah zai an daw thei hlak a nih, anni ngei khawm hrât nawna inhuol vêla an um bawk leiin.

³Chun, chu lei chun, mihai ta dinga an inhlânpêk angin, anni ta ding ngei khawmin suolhai leiin inhlân ve naw thei an ni nawh.

⁴Chun, tûkhawmin chu chawimawina chu mâni ta dingin an inbel ngai nawh. Aron anga Pathien iko an ni naw chun.

⁵Chuong ang bawkin Krista khawm chu Thiempu Laltaka siem dingin mâni ân sukropui naw a, “Nang chu ka Naupa i na, Vawisûn hin ka nei che a nih,” tia hriltu khan a sukropui ta lem a nih;

⁶“Nang chu Melkizedek um dân anga Chatuon Thiempu i nih,” tia hmun danga a hril ang khan.

⁷Ama chun hnuoi taksa a put lai nihaia khan thinaa inthawka ama sandam theitu kuoma khan nasataka khêkin, mitthli tla pumin ṭawngṭainahai le hninahai ân hlân a, inzâ taka ân pekna leiin ngaithlâkin a um a,

⁸Naupa rau ni sienla khawm a thil tuorhaia chun thu âwi ân chûk ta a nih;

⁹chuongchun, sukṭhat famkima hung umin a thu awi po pohai ta dingin chatuona sandamna bulpui a hung ni ta a,

¹⁰Melkizedek um dân anga Thiempu Laltakah Pathienin ân bûk ta a.

¹¹Chu mi chanchina chun hril ding tamtak kan nei a, hrilfie khawm ân tak, in na a lo sêt ta leiin.

¹²A hun ngaituo chun inchûktirtu ni rau ta âwm in nia chu, Pathien thu inchûktirna bulhai chu inchûktir in ngai nâwk ta a; bu rum ni lova, nênetui la ngai mi ang in hung ni nâwk ta hi.

¹³Nênetui ring taphawt chun felna thua chun hrietna an nei naw a, nautê an la ni leiin.

¹⁴Bu rum ruok chu puitlinghai ta dingin a nih, chuonghai chun asie aṭha hrefie dingin an hriettheina chu hmangin an sâwizawi tah.