Read Hmar HEBRAIHAI 6 Bible Online

HEBRAIHAI 6 - Hmar bible

HEBRAIHAI 6

¹Chuongchun, Krista thu bul hril ta lovin puitling tieng pan ei tiu; lungphûm chu phûm nâwk ta lovin simna dâm, Pathien tienga ringna dâm,

²baptismahai le, kut innghat le, mithi thonâwkna le, chatuona rorêlna kawng thu inchûktirna lungphûm chu.

³Pathienin rem a ti chun chu chu thaw ngei ei tih.

⁴Chun, vawikhat lungril sukvara lo um tah, vân thilpêk intem ta a, Thlarau Inthieng changtu ni ta a,

⁵Pathien thu ṭha le hun la hung um dinga thilthawtheina intem ta zeta,

⁶tlûksanhai kawng thu chu chuong mihai chu an simna dingin siem thar nâwk ruol an ni nawh, Pathien Naupa chu anni ta dinga hemde nâwka sukmuolpho an ni leiin.

⁷Hnuoi, a chunga ruotui tla rawp lo dâwn taa, thloa a umna sanhai ta dinga thlai fâk tlâk hung insuotu chun, Pathiena inthawkin malsâwmna a hmu hlak a nih.

⁸Amiruokchu, hlohlingnei le buorhai ân suo chun mâkin a hung um a, ṭawngsephur hielin a um hlak a, a tâwpa chun raw a tuok hlak.

⁹Nisienlakhawm, dittakhai, chuong ang chun hril inlang khawm, nangni chun, thil ṭha lem sandamnaa ṭhang thilhai chu in thaw kan ring tlat cheu a nih.

¹⁰In sin thaw le a hming leia hmangaina in inlangtir, mi inthienghai rawng in ibâwl, tu chen khawma in ila bâwl rawp chu theinghil dingin Pathien chu mi fel naw a ni si naw a.

¹¹Chun, in beiseina chu a famkima hmu dingin a tâwp chenin in ṭhahnemngaina pângngai insuo pei unla kan ti bêk bêk a nih.

¹²Chuongchun, inthlada naw ti niu a, ringna le nghâk peina leia thutiemhai ro hluotahai inchûk tuhai ni lem in tih.

¹³Pathienin Abraham kuoma thu a hung tiem lai khan, ama nêka ropui lem sâlin ân khâm thei naw leiin ama le ama insâlin,

¹⁴“Matheilovin, mal sâwm ngei ngei ka ti che a, pung khawm suk pung pêk ngei ngei ka ti che,” tiin ân khâm ta a.

¹⁵Chuongchun, seltaka a tuor suok hnungin thiltiem chu a hmu ta ngei a.

¹⁶Mihriem hin anni nêka ropui lem sâlin an inkhâm hlak a, an insêlna tinrênga khawm sukdetna dingin inkhâm hi suktâwpna a ni hlak.

¹⁷Chuongchun, Pathienin thutiem rohluo dinghai kuoma chun a rorêlna danglam ngai nawzie, nasa nâwk zuola inentir nuomin inkhâmin a sukdet a;

¹⁸Pathien inkhêl ruol a ni nawna, thil danglam thei naw pahni leiin, eini, insanhimna dinga ei hmaa beiseina um chel dinga tlânhai infuina nasatak ei nei theina dingin.

¹⁹Chu beiseina chu thlarau ta dinga thîrchakai angin him le dettakin ei nei a nih. Chu chu puonzâr hliea hmun thienghlimah chun a lût a,

²⁰chutaka chun Isu, Melkizedek um dân anga chatuon Thiempu Laltak lo ni tain, ei hmaṭhuoitu dingin a lût ta a.