Read Hmar HEBRAIHAI 7 Bible Online

HEBRAIHAI 7 - Hmar bible

HEBRAIHAI 7

¹Chu Melkizedek chu Salem lal, Pathien Chunghnungtak Thiempu, Abraham lalhai thata a hung tieng lo tuoka malsâwmtu a nih.

²Ama chu Abrahamin iengkim sâwma pakhat a pêk a. A hming umzie chu a hmasatakah Felna Lal a na, a dawtah Salem lal a ni bawk a, chu chu Remna Lal tina a nih.

³Ama chu pa nei lovin, nu nei lovin, chi thlatuhai chanchin nei lovin, um ṭanna nei lovin, hring tâwp khawm nei chuong lovin, Pathien Naupa anga siema umin, Thiempuah a um zing a nih.

⁴Chuongchun, chi thlatu Abrahamin a râllâk ṭha po sâwma pakhat a ipêk chu, chu mihriem ropuizie chu ngaituo ta u.

⁵Levi thlahai laia thiempu sin chang taphawt chun Dân thu angin mihai kuoma inthawkin sâwma pakhat lâkna thu an hmu ngei a nih, chu chu an unauhaia inthawkin a nih; chuonghai chu Abraham ṭhalbea insieng ni hai sien khawm;

⁶amiruokchu, anni laia thlatuhai sui sa ve naw khan Abrahama inthawkin sâwma pakhat a lâk a, thutiemhai vawngtu chu mal a sâwm ta si a.

⁷Nisienlakhawm, sêlruollovin a chîn lem chu a lien lem malsâwm pêkin a um hlak.

⁸Chun, hitaka hin mihriem thi hlakhai hin sâwma pakhat an hmu hlak a, chutaka ruok chun, “a hring zing,” tia a thu an inhriettir chun a hmu a nih.

⁹Chun, Levi sâwma pakhat la hlaktu hmanin, Abraham kuta khan sâwma pakhat a pêk tah, ti thei a nih;

¹⁰Melkizedekin ân tuokpui lai khan a thlâtu ṭhâlbeah a la um si a.

¹¹Chuongchun, Levihai thiempu nîna leia famkimna hmu thei a ni chun (chu hnuoia chun mihaiin Dân thu an lo hmu si a), Aron um dân anga ruot lovin, Melkizedek um dân anga thiempu dang hung um hi ieng am a ngai na?

¹²Thiempu nîna chu a hung danglam ta leiin Dân thu chu sukdanglam ve a hung ngai ta hrim a nih.

¹³Hieng a thu an ihril hi hnam dang mi a ni si a, chu hnam laia mi chu tûkhawm maichâmah an châng ngai nawh.

¹⁴Ei Lalpa chu Juda hnam laia inthawka hung suok a ni ti ân lang fel si a, chu hnam thua chun Mosiein thiempuhai kawng thu iengkhawm a hril nawh.

¹⁵Chun, ei thu hril kha nasatakin chieng nâwkzuol a tih: Melkizedek anga thiempu dang,

¹⁶Dânin a phût anga taksa inthlasâwng ang nilo, sukbohmang theilo hringna thilthawtheina lei lemin thiempu a hung nih.

¹⁷“Nang chu Melkizedek um dân anga, Chatuon thiempu i nih ie,” ti inhriettir a ni si a.

¹⁸A hrât naw le a ṭhathnem nawna leiin thupêk um hmasa chu peiin a um a.

¹⁹Dân thu chun iengkhawm a sukfamkim si nawh. Beiseina ṭha lem lâk lûta hung um hin Pathien a mîn hnaitir lem a nih.

²⁰Chun, inkhâm naw a ni naw leiin, (anni chu inkhâm lova thiempua siem an ni si a),

²¹ama ruok chun, “ ‘Nang chu chatuona Thiempu i nih,’ tiin Lalpa ân khâm a, inkîr nâwk ta naw ni,” tia hriltu kut khan (inkhâma Thiempua siem a ni lem),

²²chuong ang bawka nasa chun Isu chu thuthlung ṭha lem sukdetpuitu a hung ni ta a.

²³Chun, anni ruok chu thi leia um sawng thei an ni naw leiin, thiempua siem an tam ngei a;

²⁴ama ruok chu chatuona a um zing leiin a Thiempu nina chu thleng thei ruol lovin a nei ta lem a nih.

²⁵Chuongchun, amaa Pathien kuoma hunghai chu a tâwp khâwk chenin a sandam thei bawk a nih; anni ṭawngṭai pêk dingin chatuona a hring zing leiin.

²⁶Chuong ang, Thiempu Laltak, mi inthieng, sawisêlbo, inthieng nawna kai lo, mi suolhai laia inthawka a tuma um, vânhai nêka chunghnung lema siem ta chu ei ta dingin a âwm hrim si a.

²⁷Chuong thiempu lalhai chun ni tin mâni suolna leiin inthawina an inhlân hmasa zet a, chu hnungah mihai suolna leiin an inhlân nâwk a. Chuong chu ama ta ding chun a ngai nawh, ama le ama ân hlân fâwm lai khan ṭum khatah a lo suktlingtla ta leiin.

²⁸Dân thu chun mihriem hrât nawna neihai chu, Thiempu Laltakah a ruot hlak a; inkhâm thu, Dân thu hnunga hung um ruok chun, Naupa chatuona dinga sukfamkim ta chu a ruot lem a nih.