Read Hmar JAKOB 3 Bible Online

JAKOB 3 - Hmar bible

JAKOB 3

¹Ka unauhai, nangni laia mi tamtak hi inchûktirtuahai hung um naw ro, inchûktirtu chun rorêlna nasa lem kan tuok ding a nih ti kan hriet si a.

²Thil tamtaka chun ei rêngin ei suol hlak si a. Tûkhawm thuhril kawnga a suol naw chun, ama chu puitling a nih, a taksa pum khawm vêng thei mi a nih.

³Ngai ta u, ei thu an awi theina dinga sakawr bauahai thîrbar ei inba chun an taksa pum khawm ei kei her hlak.

⁴Ngai ta u, lawnghai khawm hi a lien hleh a, thli natak imût lêngin a um hlak a, nisienlakhawm, a sukhertu chun ân fetir nuomna tieng phawtah sukherna chîterekin a sukher hlak.

⁵Chuong ang bawkin, lei khawm hi taksa pêng chîterek a na, nasatakin a uong hlak. Ngai ta u! mei chîterekin ram a va kâng nasa de!

⁶Chun, lei hi mei a nih; ei taksa pênghai laia rîtlona hlawm chu lei hi a nih; chu chun taksa chu a pumin a sukthieng naw a, piengpui tawlailîr chu a sukkâng a, ama chu hremhmun sukkâng a nih.

⁷Sa chi tinrêng dâm, vate chi tinrêng dâm, thilhring chi tinrêng dâm, tuisuorieta thil tinrêng dâm hi vai ngam thei a ni si a, mihriemhai ivai ngamin an um bawk a;

⁸amiruokchu, lei hi tûkhawmin an vai ngam thei naw a nih; thina tûra sip, suol um ṭawk ṭawk thei naw a nih.

⁹Chu chun Lalpa le Pa ei inpâk hlak a, chu bawk chun Pathien anga siem mihriemhai chu ṭawngsie ei inphur bawk hlak a nih.

¹⁰Bau hmunkhata inthawkin inpâkna le ṭawngse inphurna a suok hlak. Ka unauhai, chuong thil chu chuong ang chu a ni ding a ni nawh.

¹¹Tuikhur hin hnâr hmunkhatah tui inhnik le tui inhnik naw a suksuok hlak am a nih?

¹²Ka unauhai, theichang kûngah oliv thei a ra thei am a nih? annawleh, grêp hruiah theichang a ra thei am a nih? Chuong ang bawkin chi khur hin tui al naw a suksuok thei bawk nawh.

¹³Nangni lai tû am vara, thu hre thei a um a? Thuhnuoirawltak le vartakin a thilthawhai a um dân ṭhain inentir raw se.

¹⁴Nisienlakhawm, in lungrilah îtthîkna khatak le mâni hmasielna in nei chun, thudik chu uong khum le kalin khêl hril naw ro.

¹⁵Chu varna chu chung tienga inthawka hung thla chu a ni naw a, khawvêl le taksa châkna le khawhria inthawk a ni lem.

¹⁶îtthîkna le mâni hmasielna umnaa chun buoina le thilsuksuolna tinrêng a um hlak.

¹⁷Chung tienga inthawka varna hung thla ruok chu a tîrin ân thieng phawt a; chu hnunga chun inrem a nuom a, a nun ân nêm a, a biek ân hawi a, lunginsietna le ra ṭhain a sip a, thlier bîk a nei naw a, a vervêk naw a nih.

¹⁸Felna ra chu inremna siemtuhai ta ding chun inremnain tu a nih.