Read Hmar JAKOB 4 Bible Online

JAKOB 4 - Hmar bible

JAKOB 4

¹Nangni laia indona le insêlna hai hi khâwlaia inthawka hung suok am an na? In taksa pêngahai indona siem hlaktu, in nuom zâwnga inthawkhai chun hung suok an ni naw am a nih?

²In châk a, in nei si naw a, tuol in that a, in inhnar a, in nei thei si naw a; in insêl a, in indo a; in hni naw leiin in nei naw a;

³in hni a, in hni indik naw leiin in hmu nawh, in inhawitirna dingin hmang in tum si a.

⁴Nangni uirenuhai, khawvêl ruol nina hi Pathien hmêlma nina a ni ti in hriet naw am a nih? Chuongchun, tûkhawm khawvêl ruol ni nuom taphawt chu Pathien hmêlmaah ân siem hlak a nih.

⁵Annawleh, “Thlarau einia ân chêngtir chun, thîk khawp hielin a mi dit a nih,” ti hi, Pathien Lekha Thuin iengkhawm ni lovin a hrilin in ring am a nih?

⁶Nisienlakhawm, lunginsietna tam nâwkzuol a pêk hlak; chuleiin, Pathien Lekha Thuin, “Pathienin mi chapohai a kal a, inngaitlâwmhai ruok chu lunginsietna a pêk hlak,” a ti a nih.

⁷Chuongchun, Pathien thu thuin um ro; amiruokchu, Diebol chu kal ro, chuongchun, tlân hmang san a ti cheu.

⁸Pathien hnai ro, chuongchun, amain hnai a ti cheu. Mi suolhai, in kuthai sâwpfai ro, lungril bulbâl nei nawhai, in lungrilhai sukthieng ro.

⁹Rimsi unla, lungngai unla, ṭap ro; in innui chu lungngaiah inchang sienla, in hlim nguiah inchang raw se.

¹⁰Lalpa mithmuin inngaitlâwm ro, chuongchun, chawimawi a ti cheu.

¹¹Unauhai, inhrilse tuo naw ro. Tûkhawmin a unau a hrilsietin amanih, a unau a sawisêlin amanih, Dân a hrilsietin Dân a sawisêl a nih; nisienlakhawm, Dân i sawisêl chun Dân zâwmtu i ni naw a, rorêltu i ni lem.

¹²Dân petu le rorêltu pakhat chau a um; sandam theia, sukbohmang thei chu; nang tuolbâwmhai sawisêltu chu tu am i ni leh?

¹³Tuhin ngai ta u khai! nangni, “Vawisûn amanih, zinga manih, chu khawpuia chun fêng ei ta, chutaka chun kum khat va thang ei ta, sumdâwng ei ta, hlâwkna hmûng ei tih,” tituhai,

¹⁴zînga chun ieng am a hung um ding in hriet si nawh. In hringna chu ieng am a na? Sûm sâwt nawtê hung inlanga, bo nâwk el hlak ang hi in ni si a.

¹⁵Chuongchun, “Lalpain rem a ti chun dam ei ta, chu chu, kha kha thâwng ei tih,” in ti ding hi a nih.

¹⁶Nisienlakhawm, in uongnahai hi in suong lem si a; chuong ang suongna po po chu suol a nih.

¹⁷Chuongchun, tûkhawm thil ṭha thaw ding hre sia, thaw naw chu, a ta dingin suol a nih.