Read Hmar JAKOB 5 Bible Online

JAKOB 5 - Hmar bible

JAKOB 5

¹Mi hausahai, ngai ta u khai! In chunga rinum hung tlung ding zing lei chun ṭap unla, khêk rak rak ro.

²In rohai a se ta a, in puonhai hângthimin a fâk zo tah.

³In rângkachak le in tangkahai a tuiêk zo ta a; a tuiêk chu in thiem nawzie inhriettirna nîng a ta, in taksa chu mei kâng angin fâng a tih. Ni nuhnunga chun ro in inkhâwl a ni hi.

⁴Ngai ta u, in lova bu sîka inhlawfahai hlaw, hlêma in pêk naw kha, a khêk a, a sîktuhai lunginzing khêk ri khawm chu Mipuihai Lalpa naah a hung lût ta a.

⁵Khawvêla hin inhawitirtakin in um a, in insukthâm mei mei a; in that niin in lungril in suktlai a.

⁶Mi fel chu thiemnaw in inchangtir a, in that ta a; ama chun a kal naw cheu.

⁷Chuongchun, unauhai, Lalpa hung nâwk hmakhat chu seltakin lo um ro. Ngai ta u, lo neitu chun ruo tui tla hmasa le nuhnung chu a hmu hmakhat chu seltakin hnuoi ra hlutak chu a nghâk hlak.

⁸Nangni khawm seltakin um ro; in lungril sukdet ro; Lalpa hungna chu a hnai ta si a.

⁹Unauhai, thiemnaw changa in um nâwna dingin inchier khum naw ro; ngai ta u, rorêltu chu kawtkhâr bulah a ngîr zing a nih.

¹⁰Unauhai, Lalpa hminga thu hriltu le zâwlneihai chu, tuor dân le sel dân kawnga chun, enkhi dingin hmang ro.

¹¹Ngai ta u ! tuortuhai chu hamṭha ei ti a, Job selzie chu in hriet a, Lalpain a tâwpa a thaw zie khawm kha in hmu bawk a; Lalpa chu lunginsietnain a sipzie le za a ngai theizie khawm kha.

¹²Nisienlakhawm, ka unauhai, iengkhawm thaw unla, inkhâm naw ro, vân sâlin amanih, hnuoi sâlin amanih, thil dang hrim hrim amanih sâlin inkhâm naw ro: “A nih,” in ti chu, “A nih,” ni sienla, “A ni nawh,” in ti chu, “A ni naw,” ni raw se; chuong naw chun thiemnaw changin um in tih.

¹³Nangni lai thil ṭha naw tuor an um am? Ṭawngṭai raw se. Hlim an um am? Inpâkna hla sak raw se.

¹⁴Nangni lai damnaw an um am? Kohran upa inkotir sienla, anni chun Lalpa hminga hriek nâlin a chungah ṭawngṭai raw hai se.

¹⁵Chun, ringnaa ṭawngṭaina chun damnaw chu sukdam a ta, Lalpa chun ama chu keitho a tih; chun, thil a lo suksuol ta chun, ngaidampêk nîng a tih.

¹⁶Chuongchun, sukdama in um theina dingin in suolhai thupha inchawi tuo unla, in ṭawngṭaipêk tuo hlak ro.

¹⁷Mi fel ṭawngṭaina chun thil nasatak a thaw hlak. Elija chu eini mizie ang nei mihriem bawk a ni a, ama chun ruo sûr nâwna dingin ṭhahnemngaitakin a ṭawngṭai a; chun, kum thum le thla ruk sûng po chu, hnuoi chungah ruo a sûr ta naw a.

¹⁸Chun, a ṭawngṭai nâwk a, vânin ruo ân sûrtir a, hnuoiin a rahai a hung insuoktir ta a.

¹⁹Ka unauhai, nangni laia mi tûkhawm thutaka inthawk chun inhmang sienla, chun, tuin amanih innghat kîrtir sienla,

²⁰mi suol a lampui inhmangnaa innghat kîrtirtu chun thinaa inthawkin a thlarau sandam a ta, suol tamtak inkhumpêk bawk a tih ti inhre raw se.