Read Hmar 1 PETER 4 Bible Online

1 PETER 4 - Hmar bible

1 PETER 4

¹Chuongchun, Kristain taksaa a tuor leiin nangni khawm, chuong ang lungrilin inthuom ve ro; taksaa tuor ta chun suol a bânsan ta si a.

²Chuongchun, hi hnunga taksaa in la um sûng po chu mihriem châknahai tienga um ta lovin, Pathien dit zâwng tieng um tâng in tih.

³Jentailhai dit zâwng thâwna ding le, hurnaa dâm, taksa châknaa dâm, uoin hênaa dâm, zu hmun hlimnaa dâm, zu dâwn khâwmnaa dâm, milim biekna tirdakumtaka dâma umna ding chun kha hma kha a huntâwk tah.

⁴Chuonga chun anni inhawitir taluo anga in um ve ta naw hi mak an ta, an hrilsiet hlak cheu a nih.

⁵Anni chun, mi hring le mithihai chunga rorel dinga inzosa kuoma chun an chanchin la hril an tih.

⁶Hi hi lei hin a nih, mithihai lai khawm chun Chanchin Ṭha hril a ni, tisaa um mihriemhai anga ngaituoin an um a, thlaraua ruok chun Pathien anga an hring theina dingin.

⁷Nisienlakhawm, thil po po tâwpna chu a hnai ta a, chuleiin, in ṭawngṭai theina dingin lungril feltak putin fimkhur ro.

⁸Ieng dang nêkin, ṭhahnemngaitakin inhmangai tuo lem ro; hmangaina chun suol tamtak ân khum hlak si a.

⁹Chier lovin intlung tuo unla,

¹⁰mi tinin, Pathien lunginsietna tinrêng enkawltu ṭha angin, Pathien thilpêk an dawnghai taphawt chu hmangin rawng inbâwl tuo seng ro.

¹¹Mi tûkhawmin thu a hril chun Pathien thuhai angin hril raw se; mi tûkhawmin rawng a bâwl chun Pathienin hrâtna a pêk ang peiin bâwl raw se; chuongchun, Isu Krista leiin Pathien chu thil iengkimah chawimawiin um thei a tih, ropuina le rorêlna chu chatuona ama ta a ni si a. Amen.

¹²Dittakhai, nangni laia fiena nasatak hung um, nangni fiena dinga in chunga hung tlung hi, thil mak in chunga tlung angin makti naw ro.

¹³Krista tuornahaia tuorpuituhai in ni zie ang peiin lâwm lem ro; chuongchun, a ropuina a hung inlang pha chun nangni khawm hlimtakin lâwm thei in tih.

¹⁴Krista hming leia hal in ni chun in hamṭha; ropuina Thlarau le Pathien Thlarau chu in chungah a um si a.

¹⁵Nisienlakhawm, nangni laia tûkhawm tuolthattu a ni leiin amanih, inru a ni leiin amanih, thil suksuoltu a ni leiin amanih, mi danghai thilthaw rêlpêktu a ni leiin amanih tuor naw raw se.

¹⁶Amiruokchu, kristien a ni leiin tuor sienla, inzak naw raw se; chu hming lei chun Pathien chawimawi lem raw se.

¹⁷Rorêlna chu Pathien sûnghaia hin ṭan a hun ta si a; chun, einia hman a phut hmasa chun Pathien Chanchin Ṭha thu zâwm nawhai tâwpna chu ieng tin tak am nîng a ta?

¹⁸Chun, mi fel hman sandam hrâm hrâm a ni chun, Pathien ngaisak naw le mi suol chu khâwlai am inlang phâk hlak an ta?

¹⁹Chuleiin, Pathien remti zâwng anga tuorhai chun, thil ṭha thawin an thlarauhai chu Siemtu ringumtak kuomah inkawltir raw hai se.