Read Hmar 2 PETER 3 Bible Online

2 PETER 3 - Hmar bible

2 PETER 3

¹Dittakhai, tuta in kuoma ka ziek hi ka lekhathawn pahnina a na, chuonga chun, inhrietthartir ding cheuin, in lungril inthieng ka chawkhar ve ve a,

²zâwlnei inthienghai thu hrillâwk le, in tirkohai baua Lalpa le Sandamtu thupêk chu in hriet zingna dingin.

³Hi hi hre hmasa unla, ni nuhnungahai chun nuisawtuhai chu, anni châkna anga umin, nuisaw pumin hung an ta,

⁴“A hung nâwkna ding thutiem chu khâwlai am a um a? Siem tîra inthawkin iengkim a um pângngai angin chi thlatuhai ininnghil nia inthawk ta kha a la um pei annâwm,” la tîng an tih.

⁵Hieng hi an theinghil tehlêm hlak si; Tienlai khan Pathien thuin vânhai inumtir a ni a, hnuoi khawm tuia inthawka tuihaia siemin a lo um a;

⁶chu tuihai vêk chun chu laia khawvêl um chu a chîm a, a bohmang ta a, ti hi;

⁷nisienlakhawm, tuta vânhai le hnuoi umhai hi chu thu bawk lei chun Pathien ngaisak naw mihai rorêl le bohmang nia dingin khêkin, meia dinga inkhâwl khâwm a ni tah.

⁸Nisienlakhawm, dittakhai, hi thu bau khat hi theinghil naw ro, Lalpa ngai chun ni khat hi kum sâng khat ang a na, kum sâng khat khawm hi ni khat ang a nih, ti hi.

⁹Mi ṭhenkhatin muonga an ruot angin, Lalpa chu a thutiem kawnga chu a muong nawh; tukhawm bohmang lova mi po po sim ditpuiin, nangni tiengah a dâwthei a ni lem.

¹⁰Nisienlakhawm, Lalpa ni chu inru angin hung tlung ngei a tih; chu nia chun vânhai chu nasataka inriin bohmang a ta, thil bulhai chu meia emhmangin um tâng a ta, hnuoi le a sûnga sinthaw umhai hi kâng hmang a tih.

¹¹Chuong thilhai chu chuong anga bohmang vawng ding a nih ti in hriet leiin um dân inthieng le Pathien ngaisak kawnga chun mi ieng ang am in ni ding a na?

¹²Pathien Ni hung tlung ding hun chu ṭhahnemngaitakin beisei zing ro. Chu ni chu a tlung chun vânhai chu kângin bohmang a ta, thil bulhai khawm chu meia emtuiin um tâng an tih.

¹³Nisienlakhawm, a thutiem ang chun vân tharhai le hnuoi thar, a sûnga felna umhai chu ei beisei a nih.

¹⁴Chuleiin, dittakhai, chuong ang thilhai chu in beisei leiin, inthiengnawna kai lo le sawisêl boin thlamuongtaka in um a hmu theina ding cheuin, taimâk insuo ro.

¹⁵Chun, ei Lalpa dawtheizie chu sandamnaa ruot ro; ei unaupa dittak Paula khawmin, a kuoma varna pêk ang peia in kuoma a ziek ang khan.

¹⁶A lekhathawn po poa chun chuong thu chu hrilin, chuong ang bawkin a ziek a nih; chuonga chun thu hriet intak takhai a um a, chuong chu mi var naw le mi det nawhaiin, Pathien Lekha Thu dang an ngai kawi angin an ngai kawi a, mâni le mâni an insukbohmang pha hlak a nih.

¹⁷Chuongchun, dittakhai, nangnîn chuong thu chu in lo hriet lâwk leiin fîmkhur ro, chuong naw chun, mi suolhai indik nawnaa ṭhuoi hmanga umin, in det ṭhat lai tlu rawi in tih.

¹⁸Amiruokchu, ei Lalpa le Sandamtu Isu Krista lunginsietna le hrietnaa chun inṭhang lien ro. Tuta le chatuon chenin ama kuoma chun ropuina um raw se. Amen.