Read Hmar 1 JOHAN 1 Bible Online

1 JOHAN 1 - Hmar bible

1 JOHAN 1

¹Hringna Thu a tîra inthawka um kha, kan nâhaiin kan ihriet kha, kan mithaiin kan ihmu kha, kan en zinga kan kuthaia kan them kha, chu chu chanchin chu;

²(chu hringna chu a hung inlang ta a, kan lo hmu a, kan inhriettir bawk a, chu chatuon hringna, Pa kuoma um, kan kuoma hung inlang chu, kan hril cheu a ni hi);

³chu kan ihriet le kan ihmu chu in kuomah kan hril ve cheu a ni hi, nangni khawma in mi pâwl ve theina dingin; anih, keini pâwlna chu Pa le a Naupa Isu Krista pâwlna a nih.

⁴Chuongchun, kan lâwm a famkim theina dingin hieng thuhai hi in kuomah kan ziek a ni hi.

⁵Chun, thuincha a kuoma inthawka kan hriet a, in kuoma kan hril sâwng ding cheu chu hi hi a nih: Pathien chu var a nih, amaa chun inthimna hrim a um nawh.

⁶Inthima um siin, “Ama ka pâwl,” ei ti chun khêl ei hril a nih, thutak khawm chu ei zâwm nawh.

⁷Amiruokchu, ama chu vara a um angin eini khawm vara um ei ni chun, ei inpâwl tlâng a nih, chun, a Naupa Isu thisenin ei suol po po a mi sâwpfai pêk hlak a nih.

⁸“Suol ka nei nawh,” ei ti chun mâni le mâni ei inhlêm fâwm a, thutak khawm chu einiah a um naw a nih.

⁹Ei suolhai thupha ei chawi chun, ei suolhai ngaidam ding le, ei felnawna po po sâwpfai dingin ama chu ring a umin a fel a nih.

¹⁰“Thil ka suksuol nawh,” ei ti chun ama chu khêlhlipah ei siem a, a thu khawm einiah a um naw a nih.