Read Hmar 1 JOHAN 2 Bible Online

1 JOHAN 2 - Hmar bible

1 JOHAN 2

¹Ka nauhai, thil in suksuol nâwna dingin hieng thu hi in kuomah ka ziek a ni hi. Tûkhawmin thil a suksuol chun, Pa kuoma mi hrilpuitu Isu Krista mi fel chu ei nei.

²Ama chu ei suolhai thuphachawina a nih; eini suol chau ni lovin, khawvêl po po suol thuphachawina khawm a nih.

³Chun, a thupêkhai pawm ei ni chun, chutaka chun ama chu ei hriet ti ei inhriet.

⁴A thupêkhai pawm si lovin, “Ama ka hriet,” titu chu mi khêlhlip a nih, thutak amaah a um nawh.

⁵Tûkhawm a thu pawm taphawt chu amaa chun Pathien a hmangaina a famkim takzet tah a nih. Amaah ei um ti hitaka hin ei inhriet a nih.

⁶“Amaah ka um zing hlak,” titu chu, ama a um ang bawk khan a um ve ding a nih.

⁷Dittakhai, thupêk thar chu in kuomah ka ziek naw a; thupêk hlui a tira inthawka in nei kha, ka ziek lem a nih. Chu thupêk hlui chu in thu hriet ta hnung kha a nih.

⁸Niesienlakhawm in kuomah thupêk thar ziek nawk a ni hi, (chu chu amaah le nangniah ân lang a nih), inthimna chu a bo mêk a, var taktak chu tuhin a hung var ta leiin.

⁹Mâni unau theida si a, “Varah ka um,” titu chu, tu chen khawm hin inthimah a la um zing a nih.

¹⁰Mâni unau hmangaitu chu vara chun a um zing a, amaa chun tlûkna hrim a um nawh.

¹¹Mâni unau theidatu ruok chu inthimah a um a, inthimah ân vâk bawk a nih; inthimin a mit a sukdel ta leiin a fena khawm a hriet ngai nawh.

¹²Nauhai, ama hming leiin in suolhai ngaidam a ni tâk leiin in kuomah ka ziek a ni hi.

¹³Pahai, ama, a tira inthawka um zing chu in hriet leiin in kuomah ka ziek a nih. Ruoltharhai, mi suol chu in hne tâk leiin in kuomah ka ziek a ni hi.

¹⁴Nauhai, Pa chu in hriet leiin in kuomah ka ziek a ni kha. Pahai, ama a tîra inthawka um zing chu in hriet leiin in kuomah ka ziek a ni kha. Ruoltharhai, in hrât a, Pathien thu nangniah a um zing a, mi suol chu in hne tâk leiin in kuomah ka ziek a ni kha.

¹⁵Khawvêl hi hmangai naw unla, khawvêla thil umhai khawm hi hmangai bawk naw ro. Mi tûkhawmin khawvêl a hmangai chun, Pa a hmangaina amaah a um nawh.

¹⁶Khawvêla thil um po po, tisa châkna dâm, mit châkna dâm, dam sûng ropuina tehlêm dâm hi Paa inthawka suok a ni naw a, khawvêla suok a ni lem si a.

¹⁷Khawvêl hi a châkna pumin a bohmang zing a nih, Pathien ditzawng thawtu ruok chu kumkhuoin um zing a tih.

¹⁸Nauhai, hun nuhnung tak chu a ni tah, Krista kaltu hung a tih ti in hriet ang khan, tu khawm hin Krista kaltu tamtak an hung suok tah; chuleichun, hun nuhnung tak a ni tah ti ei hriet.

¹⁹Anni chu eini laia inthawkin an suok a, nisienlakhawm, eini mi tak an ni nawh; eini mi tak ni hai sienla, eini kuomah an um ve pei ding a ni si a. Nisienlakhawm, an rêngin eini mi tak an ni naw vawng ti ân lang fel theina dingin an mi suoksan ta a nih.

²⁰Mi Inthieng kuoma inthawkin hriek nâlna in chang a, iengkim in hriet a nih.

²¹Thutak thu in hriet naw leiin ka ziek a ni naw a, in hriet lei le, thutakah khêl iengkhawm a suok ngai naw leiin ka ziek lem a nih.

²²Isu chu Krista a nih ti awinawtu nêka khêlinhlip tu am um an ta? Tûkhawm Pa le Naupa awinaw chu Krista kaltu a nih.

²³Tûkhawm Naupa awinaw chun Pa khawm a pawm chuong nawh; Naupa awitu ruok chun Pa khawm a pawm a nih.

²⁴Nangni chun chu, a tira inthawka in hriet kha, nangniah inumtir zing ro. Chu a tîra inthawka in hriet chu nangniah a um zing chun, nangni khawm Naupaa le Paa chun um zing in tih.

²⁵Chun, hi hi a nih, ama ngeiin thil a mi tiem kha Chatuona hringna hi.

²⁶Chuong nangni ṭhuoi hmang tumtuhai thu chu, in kuomah ka ziek a nih.

²⁷Nangni chu ama kuoma inthawka hriek nâlna in hmu kha nangniah a umzing a, tu inchûktir khawm in ngai nawh, ama hriek nâlna chun thil po po thu ân chûktir lem cheu lei le, indiktak a na, khêl khawm a ni naw leiin, chu chu ân chûktir ang cheu khan amaah um zing ro.

²⁸Chuongchun, nauhai, amaah um zing ro; chuongchun, ama chu hung inlâr sien khawm, a hungin a hmaah inzak lovin huoitakin um thei ei tih.

²⁹Ama chu mi fel a nih ti in hriet chun, mi tûkhawm felna thaw chu ama inei a ni ti in hriet.