Read Hmar 1 JOHAN 4 Bible Online

1 JOHAN 4 - Hmar bible

1 JOHAN 4

¹Dittakhai, thlarau nazawng chu ring naw ro, amiruokchu, thlarauhai chu Pathiena inthawk an ni le ni naw infie ro; thuhriltu tehlêm tamtak khawvêlah an hung suok ta leiin.

²Hi hin Pathien Thlarau chu hrieng in tih; thlarau iengkhawm Isu Krista tisaah a hung inchang ti ṭan chu Pathiena inthawk a nih; thlarau iengkhawm Isu ṭan naw chu Pathiena inthawk a ni nawh.

³Chu chu Krista kaltu thlarau, a hung ding in hriet kha a nih; tu khawm hin khawvêlah a um zing tah a nih.

⁴Nauhai, Pathiena inthawk in na, chuong chu in hne tah, nangnia um chu khawvêla um nêk chun a ropui lem leiin.

⁵Anni chu khawvêla mi an na, chuleiin khawvêla mi angin an ṭawng a, khawvêlin an thu an ngai hlak a nih.

⁶Eini Pathiena inthawk ei na; Pathien hretu chun ei thu a ngai hlak a, Pathiena inthawka mi ni lo chun ei thu a ngai ngai nawh. Chuonga chun thlarau indiktak le indiknaw ei hriet a nih.

⁷Dittakhai, inhmangai tuo seng ei tiu; hmangaina hi Pathiena inthawka suok a ni si a; mi tin, hmangaina nei taphawt chu Pathien inei an ni ta a, Pathien an hriet bawk a.

⁸Hmangaina nei naw chun Pathien a hriet nawh; Pathien chu hmangaina a ni si a.

⁹Hitaka hin Pathien hmangaina ei chungah a hung inlang tah, ama leia ei hring theina dinga Pathienin a Naupa nei sun khawvêla a hung tira hin.

¹⁰Hitaka hin hmangaina a um, einin Pathien ei hmangai ka ti a ni naw a, amain a mi hmangai a, ei suolhai thuphachawina ni dingin a Naupa a hung tir ka ti lem a nih.

¹¹Dittakhai, Pathienin chuong ang lâwma a mi hmangai chun, eini khawm ei inhmangai tuo seng ding a nih.

¹²Tûkhawmin ienglai khawmin Pathien an hmu ngai nawh. Ei inhmangai tuo chun Pathien einiah um zing a ta, a hmangaina khawm einiah famkim bawk a tih.

¹³Amaah ei um zing le ama chu einiah a um zing ti hitaka hin ei hriet, a thlarau a mi pêk ta lei hin.

¹⁴Chun, Pain Naupa chu khawvêl sandamtua um dingin a hungtir ti ei hmu ta a, ei inhriettir a nih.

¹⁵Tûkhawm, “Isu hi Pathien Naupa a nih,” tia ṭan taphawt chu, amaa chun Pathien a um zing a, ama khawm chu Pathienah a um zing bawk a nih.

¹⁶Pathienin einia hmangaina a inei chu ei hriet a, ei awi bawk a nih. Pathien chu hmangaina a nih, hmangainaa um zing chu Pathienah a um zing a, Pathien khawm amaah a um zing a nih.

¹⁷Hitaka hin ei chungah hmangaina a famkim tah; rorêl nia ṭi lova ei um theia hin; ama um anga khawvêla hin ei um leiin.

¹⁸Hmangainaa chun ṭitna hrim a um nawh; hmangaina famkimin ṭitna a hnawt suok lem hlak a nih, ṭitnaa chun hremna a um si a; a ṭitu chu hmangainaah a la famkim naw a nih.

¹⁹Amain a mi hmangai hmasak leiin ei hmangai a nih:

²⁰Miin, “Pathien ka hmangai,” tiin a unau theida si sienla, ama chu khêlinhlip a nih; a unau a ihmu zing ta hman a hmangai naw chun, Pathien a ihmu ngai naw chu iengtin am hmangai thei a ta?

²¹Ama kuoma inthawkin hi thupêk hi ei nei “Tukhawmin Pathien a hmangai chun a unau khawm a hmangai bawk ding a nih,” ti hi.