Read Hmar 1 JOHAN 5 Bible Online

1 JOHAN 5 - Hmar bible

1 JOHAN 5

¹Tûkhawm Isu hi Krista a ni ti ring chu Pathien inei a nih; tûkhawm a neitu hmangai chun a inei khawm a hmangai hlak.

²Hitaka hin Pathien nauhai ei hmangai ti ei hriet, Pathien ei hmangai a, a thupêkhai ei zâwm hin.

³Pathien ei hmangaina chu hi hi a nih, a thupêkhai ei zâwm hi. A thupêkhai chu a khir si naw a.

⁴Pathien inei taphawt chun khawvêl a hne pei si a; hi hi khawvêl hnea ngamna chu a nih, ei ringna hi.

⁵Isu hi Pathien Naupa a nih ti ringtu chau naw chun tuin am khawvêl a hne hlak a?

⁶Hi hi a nih tui le thisena hung chu, Isu Krista hi; tui chauah ni lovin, tuia le thisenah a ni lem. Inhriettirtu chu Thlarau hi a nih. Thlarau chu thutak a ni leiin.

⁷Inhriettirtu chu pathum an um,

⁸Thlarau le tui le thisen chu: chuong pathum chu an inthuruol a nih.

⁹Mihriem inhriettirna hman ei pawm chun Pathien inhriettirna chu a ropui lem si a; Pathien inhriettirna chu hi hi a nih, “Ka Naupa chanchin kân hriettir tah,” ti hi.

¹⁰Pathien Naupa ringtu chun mâniah hrietna a nei a nih; Pathien ringnawtu chun ama chu khêlhlipah a siem a nih, Pathienin a Naupa chanchin ân hriettir chu a ring naw leiin.

¹¹Inhriettirna chu hi hi a nih, Pathienin chatuona hringna a mi pêk a, chu hringna chu a Naupaah a um a nih.

¹²Naupa neitu chun hringna chu a nei a, Pathien Naupa neinawtu chun hringna chu a nei nawh.

¹³Chatuona hringna in nei ti in hriet theina dingin, nangni Pathien Naupa hming ringtuhai kuomah hieng thu hi ka ziek a nih.

¹⁴Hi hi ama chunga ei huoina chu a nih, iengkhawm a ditzâwng anga ei hni chun amain a mi ngai pêk hlak hi.

¹⁵Chuongchun, iengkhawm ei hni taphawt a mi ngaipêk hlak ti ei hriet chun, a kuoma ei thil hni chu ei hmu tah ti ei hriet a nih.

¹⁶Tûkhawmin a unau thina khawp nilo suol thawin hmu sienla, hnipêk a ta, chuongchun, Pathienin a hnitu kuoma chun thina khawp nilo suol thawtuhai ta ding chun hringna pêng a tih. Thina khawp suol a um a; chuong ang tieng chun hnipêk a tih ka ti a ni nawh.

¹⁷Felnawna po po hi suol a nih, thina khawp nilo suol khawm a um bawk a nih.

¹⁸Tûkhawm Pathien inei chun thil a suk suol zing ngai nawh ti ei hriet; Pathien inei khan ama chu a hum zing a; Mi suol chun a tâwk thei nawh.

¹⁹Chun, Pathiena inthawk ei nih ti le, khawvêl pumpui hi Mi Suol thu thuin a um ti ei hriet.

²⁰Pathien Naupa chu a hung a. Mi Indiktak chu hre thei dingin hriettheina a mi pêk ti ei hriet bawk a; chun, eini, a Naupa Isu Kristaa ei um hin Mi Indiktaka chun ei um a nih. Ama chu Pathien indiktak a na, chatuona hringna khawm a nih.

²¹Nauhai, milima inthawkin in siekieng ro.