Read Hmar RORELTUHAI 1 Bible Online

RORELTUHAI 1 - Hmar bible

RORELTUHAI 1

¹Josua thi hnung chun Israel thlahaiin, “Keini ta dinga Kanaan mihai chu thawa do dingin tu am hang fe hmasa phawt a ta le?” tiin LALPA chu an râwn a.

² LALPA chun “Juda hang fe raw se, ngai ta u, a kutah ram chu ka pêk tah a nih,” a ti a.

³Juda chun a unau Simeon kuomah, “Kanaan mihai hang thaw dingin ka ram bituma hin hung ve la, kei khawm i ram bitumah hung vêng ka tih,” a ti a. Chuongchun, Simeon chun a fepui ta a.

⁴Juda chu a hang fe a; chuongchun, Kanaan mihai le Periz mihai chu an kutah LALPAIN a pêk ta a, Bezekah mi sîng khat an that ta a.

⁵Bezeka chun Adoni-bezek an hang hmu a; an thaw a, Kanaan mihai le Periz mihai chu an that ṭeu a.

⁶Adoni-bezek ruok chu a tlân a; nisienlakhawm, an hnawt a, an man a, a kutpuihai le a kepuihai an tanpêk a.

⁷Adoni-bezek chun, “Lal sâwmsari kutpui le kepui tan bawnga umhai chun ka dawkân hnuoia bumal an rût hlak a, ka thaw ang chiein Pathien chun a mi hung thung ve an ta hi,” a ti a. Chun, Jerusalemah an ṭhuoi a, chutaka chun a thi ta a.

⁸Chun, Juda mihai chun Jerusalem chu an hang do a, an lâk a, kâwlhnâmin an that a, khawpui chu an raw ta a.

⁹Chu hnunga chun Juda mihai chu Kanaan mihai tlâng rama um dâm, simtienga[1] um dâm, phaia um dâm chu do dingin an zu fe a.

¹⁰Chun, Juda chun Kanaan mihai Hebrona umhai chu a va thaw a (a hma chun Hebron hming chu Kiriatharba a nih), chuongchun, Sesai, Ahiman le Talmai chu an that a.

¹¹Chutaka inthawk chun Debira umhai chu an va thaw a (a hma chun Debir chu Kiriath-sepher a nih).

¹²Kaleb chun, “Tukhawm Kiriathsepher chu thaw a, la taphawt chu ka naunu Aksa hi nuhmeiah inneitir ka tih,” a ti a.

¹³Chun, Kaleb sangpa Kenaz naupa Othniel chun a lâk a, chuongchun, a naunu Aksa chu nuhmeiah ân neitir ta a.

¹⁴Aksa chun Othniel kuom a va tlung chun a pa kuomah ram hni dingin ama chu a thlêm a; chun, a sabengtung chunga inthawk chun a ṭum a, Kaleb chun a kuomah, “Ieng am i dita le?” a lo ti a.

¹⁵Ama chun a kuomah, “Thilpêk mi pe rawh, Simtieng rama i mîn umtir ta si hin chu tui hnâr neihai mi pe la,” a ti a. Chuongchun, Kaleb chun tui hnâr nei thlanghnunghai le sakhnunghai chu a pêk ta a.

¹⁶Chun, Mosie tarpupa Ken thlahai chu Arad sim tienga Juda ram thlalêra chun Juda thlahai leh tûm khawpuia inthawk chun an hang fe a; anni lai chun an hang um ve ta a.

¹⁷Juda chu a unau Simeon le chun an inthawk a, Zephatha um Kanaan mihai chu an that a, an sukchimit dêr a. Chu khawpui hming chu Horma[2] an tih.

¹⁸Juda chun Gaza le a ram chin, Askelon le a ram chin, Ekron le a ram chin khawm a lâk a.

¹⁹LALPA chu Juda kuoma chun a um a; chuongchun tlâng rama umhai chu a hnawt hmang vawng a, phaizâwla umhai ruok chu thîr tawlailîrhai an nei leiin a hnawt suok thei nawh.

²⁰Chun, Mosiein a lo hril ta angin, Kaleb chu Hebron pêk a ni a; chutaka chun Anak naupasalhai pathum chu a hnawt suok a.

²¹Benjamin mihai ruok chun Jerusalema um Jebus mihai chu an hnawt suok naw a, Jebus mihai chu Benjamin thlahai leh tu chen hin Jerusalemah an la um hmunkhat ta zing a nih.

²²Josef sûngkuohai khawm chu Bethel thaw dingin an hang suok ve a, an kuomah LALPA chu a um a.

²³Chun, Josef sungkuohai chun Bethel enthlatu ding mi an tira (a hma chun chu khaw hming chu Luz a nih).

²⁴Enthlatuhai chun khaw sûnga inthawka mi pakhat hung suok hi an hmu a, a kuomah, “Kan hni che hi, khawpui sûng lûtna mi kâwkhmu raw khai; chuongchun, keini khawma ṭhatakin kan thaw ding che a nih, ” an ti a.

²⁵Chun, khawpui sûng lûtna chu a kâwkhmu a, chuongchun, kâwlhnâmin chu khuo chu an thaw a, chu mipa le a sûnghai po ruok chu an hla a.

²⁶Chu mipa chu Hit mihai rama chun a lût a, khuo a siem a, chu khuo chu a hmingah Luz ân bûk a; tu chen hin chu hming chu a la put zing a nih.

²⁷Manasse chun Beth-sean le a khaw chinhaia umhai, Taanak le a khaw chinhaia umhai, Dor le a khaw chinhaia umhai, Ibleam le a khaw chinhaia umhai, Megiddo le a khaw chinhaia umhai chu a hnawt suok naw a; chu rama chun Kanaan mihai chu an um zing ta lem a.

²⁸Israel thlahai chu an hung hrât tiel tiel china khan chu Kanaan mihai chu sinthawa ruoi dingin an inumtir a, an hnawt suok fai rêt ta naw a.

²⁹Ephraim chun Gezera Kanaan mi umhai chu a hnawt suok naw a; Kanaan mihai chu Gezera chun anni lai an um ve ta lem a.

³⁰Zebulun chun Kitron khuoa umhai le Nahalal khuoa umhai chu a hnawt suok naw a; Kanaan mihai chu anni lai an um ve a, sinthawa ruoi dingin an um ta lem a nih.

³¹Aser chun Akkoa umhai, Sidona umhai, Ahlaba umhai, Akziba umhai, Helbaa umhai, Aphika umhai, Rehoba umhai, a hnawt suok naw a;

³²Aser mihai chu chu rama um Kanaan mihai laia chun an um ve ta lem a, anni chun an hnawt suok naw leiin.

³³Naphtali chun Beth-semesa umhai le Beth-anatha umhai a hnawt suok naw a; chu rama um Kanaan mihai lai chun an um ve ta lem a; amiruokchu, Beth-semesa umhai le Beth-anatha umhai chu an sinthawa ruoi dingin an um tah a nih.

³⁴Amor mihai chun Dan mihai chu tlâng ramah an hnawt kai a, ruoma an fe thlâk chu an phalpêk si naw a.

³⁵Amor mihai ruok chu Har-heres tlânga dâm, Aijalona dâm, Saalbima dâm an um ta zing a, nisienlakhawm, Josef sûnghai kut chu an chungah a hrât a, an sinthawtua hmang dingin an hung um ta a.

³⁶Chun, Amor mihai ramri chu Akrabim hang fena le Selaa inthawka a tunga fe pei a nih.