Read Hmar RORELTUHAI 10 Bible Online

RORELTUHAI 10 - Hmar bible

RORELTUHAI 10

¹Abimelek hnunga chun Israelhai chu sansuok dingin Issakar mi Dod nau Pua naupa Tola a hung suok a, Ephraim tlâng ram Samir khuoah a um a.

²Kum sâwmhni le kum thum Israelhai ro a rêl a, chun a thi a, Samir khuoah an phûm a.

³Chu hnunga chun Gilead mi Jair a hung suok a, kum sâwmhni le kum hni Israelhai ro a rêl a.

⁴Ama chun naupasal sâwmthum, sabengtungte sâwmthum chunga chuong hlak mi a nei a, chun, Gilead rama chun khaw sâwmthum an nei a, chuong chu tu chen hin Havvoth-jair an tih.

⁵Chun, Jair chu a thi a, Kamon khuoah an phûm a.

⁶Israel mipui chun LALPA mithmua thil suol chu an lo thaw nâwk ta a, Baalhai le Astaroth, Suria mihai pathienhai, Zidon mihai pathienhai, Moab mihai pathienhai, Ammon mihai pathienhai, Philistin mihai pathienhai rawng an lo bâwl ta a; chuongchun, LALPA chu an nghatsan a, a rawng an bâwl ta naw a.

⁷Chuongchun, LALPA chu Israelhai chunga chun a lunginsen hle el ta a, Philistin mihai le Ammon mihai kuomah a zawr ta a.

⁸Chu kum chun Israel thlahai chu an suklungzîngin an nêksâwr êm êm el a, Jordan râl Gilead rama Amor mihai rama Israel mi umhai po po chu kum sâwm le kum riet sûng rau an nêksâwr a.

⁹Chun, Ammon mihai chu Juda mihai, Benjamin hnamhai le, Ephraim pahnamhai do dingin Jordan râl an kai a; chuongchun, Israelhai chu namên lovin an lunginzîng ta a.

¹⁰Chun, Israel mihai chun, “Kan Pathien chu kan lo nghatsan chie ta che a, Baalhai rawng chu kan lo bâwl ta leiin i chungah thil kan lo suksuol tah a nih,” tiin LALPA an ko a.

¹¹LALPA chun Israel mihai kuoma chun, “Aigupta mihaia inthawk, Amor mihaia inthawk, Ammon mihaia inthawk le, Philistin mihaia inthawk dâmin ka sansuok cheu ni lo am a nih?

¹²Zidon mihai, Amalek mihai, Maon mihai khawma an nêksâwr cheu a; chun, in mi ko a, an kuta inthawkin ka sansuok cheu a.

¹³Chuong sa khawma nangnîn in mi nghatsan a, pathien danghai rawng chu in bâwl ta lem a; chuleiin, sansuok ta naw ning cheu ah.

¹⁴In ithlang pathienhai chu ko ta unla, anni chun in lunginzîng pha chun sansuok el raw hai se cheu chu,” a ti a.

¹⁵Chun, Israel mihai chun LALPA kuomah, “Thil kan lo suksuol tah a nih; nangin ṭha i ti ang angin kan chungah thaw la, kan hni che hi, a san ruok chu vawisûn hin mi hung sansuok hrâm raw khai,” an ti a.

¹⁶Chuongchun, anni laia hnam dang pathienhai chu an sie hmang vawng a, LALPA rawng chu an bâwl ta a; chun, Israelhai lunginzîngna[19] lei chun a lungril a lungngai[20] ta bêk bêk el a.

¹⁷Chun, Ammon mihai chu an pungkhâwm a, Gileadah an vân kul a, Israel mihai chu an inkhâwm ve a, Mizpaah an inkul a.

¹⁸Chun, mipuihai, Gilead rama mi lienhai chu an inbiek a, “Ammon mihai thaw phuttu ding hi tu am a um a? Gilead ram po poa hotuah um a tih,” tiin.