Read Hmar RORELTUHAI 11 Bible Online

RORELTUHAI 11 - Hmar bible

RORELTUHAI 11

¹Tuhin Gilead mi Jepthah chu mi hrât huoisen a nih, ama chu nawchizawr naupa a nih. A pa chu Gilead a nih.

²Gilead nuhmei chun ama chu naupasalhai a neipêk bawk a; chun, a nuhmei naupasalhai chun an hung puitlingin Jepthah chu an hnawt suok a, a kuomah, “Nang chun chu ei pa insûng ro hluo thei naw ti nih, nuhmei dang le nau i ni leiin,” an ti a.

³Chuongchun, Jepthah chu a unauhai laia inthawk chun a tlân hmang a, Tob ramah a um ta a; chun, Jepthah kuoma chun mi hotak takhai an um a, ama chu an zui hlak a.

⁴A nakie deu chun Ammon mihai chun Israelhai chu an do ta a.

⁵Ammon mihaiin Israelhai an hang do chun, Gilead mi upahai chu Tob rama Jepthah ṭhuoi dingin an fe suok ta a.

⁶Chun, Jepthah kuoma chun, “Ammon mihai kan do theina dingin kan hotu takah hung um ta la,” an ti a.

⁷Jepthah chun Gilead mi upahai kuoma chun, “In mi theida a, ka pa ina inthawk khan in mi hnawt suok a ni naw am a nih? In lunginzîng phinga iengdinga ka kuoma hung am in ni leh?” a lo ti a.

⁸Gilead mi upahai chun Jepthah kuomah, “Chu lei tak chun a nih annâwm, tuhin nanga tieng kan hung ngha nâwk chu, Ammon mihai va do dinga keini le i fe theina dingin; chun, Gilead rama umhai po po chungah kan hotuah um i tih,” an ti a.

⁹Chun, Jepthah chun Gilead mi upahai kuoma chun, “Ammon mihai do dinga in mi ṭhuoi nâwk a, LALPAIN anni chu a mi pêk chun in hotuah um takzet ka ti maw?” a ti a.

¹⁰Gilead mi upahai chun Jepthah kuomah, “LALPA chu ei inkâra hretu nîng a ta, i thu ang chun thaw ngei ngei kan tih,” an ti a.

¹¹Chuongchun, Jepthah chu Gilead mi upahai kuoma chun a fe ve ta a, chun, mihai chun hotu le a lusa tak dingin an lo siem ta a; chun Jepthah chun Mizpaah LALPA hmaah thu iengkim an hril ta a.

¹²Chun, Jepthah chun Ammon mihai lal kuoma chun, “Ka chungah ieng am i tia hienga ka ram do dinga ka kâwla hung el i ni lie?” tiin palaihai a tir a.

¹³Ammon mihai lal chun, “Israelhai Aigupta rama inthawka an hung suok lai khan ka ram an lâk leiin a nih, Arnona inthawka Jabbok le Jordan chenin; chuleiin, chu ramhai chu sêl lovin mi hung pe nâwk el rawh,” tiin, Jepthah palaihai chu a lo dawn a.

¹⁴Jepthah chun Ammon mihai lal kuoma chun palaihai a tir nâwk a,

¹⁵a kuomah, “Jepthah chun hieng ang hin a tih, ‘Israelhaiin Moab ram an lâkpêk naw a, Ammon mihai ram khawm an lâkpêk bawk nawh;

¹⁶Aigupta rama inthawka an hung suokna Tuipui Sen chena thlalêr kha an fe thleng a, Kades kha an tlung khan

¹⁷Israelhai chun Edom lal kuomah, I ram min fe thlengtir rawh, kan hni che a nih, tiin palaihai an tir a; nisienlakhawm, Edom lal chun a lo ngaisak nuom naw a. Chuong ang bawk chun Moab lal kuomah an tir nâwk a; nisienlakhawm, a lo remti naw a; chuleiin, Israelhai chu Kadesa chun an um ta a.

¹⁸Chu zoah thlalêr chu an fe thleng a, Edom ram le Moab ram chu an fe huol a, Moab ram saktieng pangah an fe a, Arnon khingtieng pangah an inkul a, Moab ram sûnga chu an lût dêr naw a nih, Arnon chu Moab ramri chin a ni si a.

¹⁹Chun, Israelhaiin Amorhai lal Sihon, Hesbon lal kuomah palaihai an tir a, Israelhai chun a kuomah, kan hmun tienga fe dingin i ram fe thleng kan tih, kan hni che a nih, an ti a.

²⁰Nisienlakhawm, Sihon chun Israelhai chu a ram fe thleng ding chun a ring zo naw a, Sihon chun a mihai po po chu ân khâwm a, Jahaz khuoah ân kul a, Israelhai chu a do ta a.

²¹Chun, LALPA, Israelhai Pathienin Sihon le a rawihai po po chu Israelhai kutah a pêk a, an that ta a, chuongchun, Israelhai chun chu ram Amor mihai umna ram po po chu an nei ta vawng a.

²²Chuongchun, Amor mihai ramri chin po po Arnona inthawka Jabbok tlung rakin thlalêra inthawk Jordan tlung zakin an nei ta vawng a nih.

²³Tuhin chuong anga LALPA Israelhai Pathienin a mi Israelhai hmaah Amor mihai chu a lâkpêk ta hnung chu, nangin i neipêk thei thu ding am a nih?

²⁴I pathien Kemos-in i puola a lo ruotpêk che chu i nei el ding a ni naw am a nih? Chun, LALPA kan Pathienin kan hmaa a lâkpêkhai chu kan nei ding a nih.

²⁵Moab lal Zippor naupa Balak nêkin i hrât lem am a nih? Ama chun Israelhai kha a chawkbuoiin a do hlak am a nih?

²⁶Israelhai Hesbona le a khaw chînhaia dâm, Aroer le a khaw chînhaia dâm, Arnon ramri dep khawpuihai po poa chun kum za thum zet an um lai khan iengdinga la lova lo la um zing am i ni leh?

²⁷Chuleiin, i chunga hin thil iengkhawm ka suksuol nawh, nangma lem hin mi hung thaw i tum lei hin ka chungah thil i suksuol a nih; LALPA rorêltu chun tuhin Israel mihai le Ammon mihai kâra thu chu ngaituo raw se,’ a tih,” tiin.

²⁸Nisienlakhawm, Ammon mihai lal chun Jepthah thu incha chu a lo ngai nuom naw a.

²⁹Chuongchun, LALPA thlarau chu Jepthah chungah a hung tlung a, Gilead le Manasse ram a fe thleng a, Gilead rama Mizpa a fe thleng a, chun, Gilead rama Mizpaa inthawk chun Ammon mihai kuomah a fe pei a.

³⁰Chun, Jepthah chun LALPA kuomah ṭawng ân khâm a, “Ammon mihai hi ka kuta i mi pêk takmeu chun,

³¹Ammon mihai kuoma inthawka râlmuonga ka in ka kîr nâwk pha chun iengkhawm ka kawtkhâra mi hung tuok hmasatak phawt chu, LALPA ta ding nîng a ta, pumrawhmang thilinhlân dingin hmang ngei ngei ka tih,” tiin.

³²Chuongchun, Jepthah chu Ammon mihai do ding chun a fe ta a; chun, LALPAIN a kutah a pêk ta a.

³³Aroera inthawka Minnith chenin a thaw pei a, khuo sâwmhni zet; chun, Abel-keramim chenin a that a that a. Chuongchun, Ammon mihai chu Israel mihai hmaa chun an lo tlâwm ta a.

³⁴Chun, Jeptha chu a umna khuo Mizpa chu a tlung ta a; chun, ngai ta, a naunu chun khuongtehai leh lâmin ama a lo tuok a, a nau nei sun a na, ama naw chu naunuhmei le naupasal dang hrim a nei nawh.

³⁵Ama chu a hang hmu phingleh a puonhai a keithlêr a, “E khai, ka naunu, i mi suktlâwm ta hle el a; a mi suklungzînghai laia mi i ni ta hi! LALPA tiengah ka bau ka lo ka ta si a, chu chu inphat nâwk thei ka ni ta nawh,” a ti a.

³⁶Ama chun a kuomah, “Pa, LALPA tieng i bau lo ka ta che chu, i baua thu suok ang ngeiin ka chungah i thaw el ding a nih; LALPA chun i hmêlma Ammon mihai chunga ngei chun i phuba a lâk ta si a,” a ti a.

³⁷Chun a pa kuoma chun, “Hieng ang hin thâwng ka tih, thla hni sûng chu keia khâtin um hran ka ta, tlânga hai hang rawl ka ta, ka nunghâkna hi hang sûn ka tih, kei le ka ruolhai le hin,” a ti a.

³⁸Ama chun, “Fe ta la,” a ti a. Chuongchun, thla hni thang dingin a tir a, a suok ta a, ama le a ruolhai le chun; chun, tlângahai chun a nunghâkna chu a hang sûn a.

³⁹Thla hni hnunga chun a pa kuomah a hung kîr nâwk a, ama chun ṭawng a lo inkhâm ta ang khan, a chungah a thaw a, pasal tukhawma an pâwl nawh.

⁴⁰Chuongchun, Israel naunuhai chun Gilead mi Jeptha naunu chu kum tin ni li sûn dânah an hung nei ta a.