Read Hmar RORELTUHAI 13 Bible Online

RORELTUHAI 13 - Hmar bible

RORELTUHAI 13

¹Israel thlahai chun LALPA mithmua thil suol an thaw nâwk ta a, chuongchun, LALPAIN anni chu Philistin mihai kutah kum sâwmli ân umtir a.

²Chun, Zora khuoa Dan hnam mi pakhat a um a; a hming chu Manoa a nih, a nuhmei chu a ching a, nau hrim a nei naw a.

³Chun, LALPA vântirko a nuhmei kuoma chun a hung inlâr a, a kuomah, “Ngai ta khai, i ching a, nau hrim i la vawn ngai naw a, nisienlakhawm, inrai i ta, naupasal nei i tih.

⁴Chuongchun, fîmkhur raw khai, uoin le zu hrim dâwn naw la, fâk thienglo hrim khawm fa dêr naw rawh;

⁵ngai ta, inrai i ta, naupasal i nei ding a ni si a, a lua chun bakmêt chem hrim ruoi ni naw ni a, naupang chu sula a um laia inthawkin Pathien ta dinga Nazarit mi a ni ding a ni si a, ama chun Israel mihai hi Philistin mihai kuta inthawk chun sansuok ṭan a tih,” a ti a.

⁶Chun, nuhmei chun a pasal kuomah, “Pathien mi mi pakhat ka kuomah a hung a, a hmêl chu vântirko hmêl ang ṭiumtak a nih, khâwtienga mi am a ni kân dawn ta chuong naw a, ama chun a hming hlak a mi hril naw bawk a;

⁷amiruokchu, ka kuomah, ‘Ngai ta, inrai i ta, naupasal nei i tih, chuongchun, uoin le zu hrim dâwn naw la, fâk thieng lo thil hrim khawm fa dêr naw rawh, naupang chu sula a um laia inthawka a thi chenin Pathien ta dinga Nazarit mi a ni ding a ni si a,’ a ti a,” tiin a hril a.

⁸Chun, Manoain LALPA kuomah a ngên ta rak a, a kuomah, “Aw LALPA, ka hni che, Pathien mi i hung tir kha kan kuomah hung nâwk sienla, naupang hung pieng ding chu ieng tin am a na kan thaw ding mi hung inchûktir raw se,” a ti a.

⁹Pathienin Manoa thuhril chu a lo ngai a, chun, nuhmei chu phûla a ṭhung laiin Pathien vântirko chu a kuomah a hung nâwk a, a pasal Manoa ruok chu a kuoma chun a um ve naw a.

¹⁰Chun nuhmei chu inhmâwtakin a tlân ta a, a pasal chu a va hril a, a kuomah, “Ngai ta, ni khat nia ka kuoma hung bawk kha, ka kuomah a hung inlâr nâwk tah,” a ti a.

¹¹Manoa chu a tho a, a nuhmei chu a zui a, ama kuom chu a va tlung a, a kuomah, “Nang hi i ni maw nuhmei kuoma thuhriltu chu?” a ti a. Ama chun, “Ka nih,” a ti a.

¹²Chun, Manoa chun, “I thu ang pei chun hung tlung raw se, naupang umdân ding chu iengtin am nîng a ta, ieng am nîng a ta a thaw ding chu?” a ti a.

¹³LALPA vântirko chun Manoa kuomah, “Nuhmei kuoma ka hrilhai po po kha ngaituo ṭha el raw se,

¹⁴Grep hruia inthawk hrim hrim chu a fâk ding a ni naw a; uoin le zu hrim khawm a dâwn ding a ni nawh, fâk thienglo thil hrim khawm a fâk ding a ni nawh; thu ka ipêk ta po po kha vawngṭha raw se,” a ti a.

¹⁵Chun, Manoain LALPA vântirko kuoma chun, “Ka ngên che a nih, kan thlo hri che a nih, kêlte hang buotsaipêk phawt kan ti che,” a ti a.

¹⁶LALPA vântirko chun Manoa kuomah, “Mi thlo la khawm i bu chu fa naw ning, chun, pumrawhmang thilinhlân dinga buotsai i ni ruok chun, LALPA kuomah în hlân ding a nih,” a ti a. Manoa chun ama chu LALPA vântirko a nih ti a hriet si naw a.

¹⁷Manoa bawk chun LALPA vântirko kuoma chun, “Ieng am i hming, i thuhril ang ngeia a hung tlung pha kan chawimawi theina ding chein?” a ti a.

¹⁸LALPA vântirko chun a kuomah, “Iengdinga ka hming i min dawn am? Hril mi a ni dêr nawh,” a ti a.

¹⁹Chun, Manoa chun kêlte chu fâk ding thilinhlân leh a lâk a, lungpui chungah LALPA kuomah ân hlân a; chun, vântirko chun thil maktak a thaw ta a, Manoa le a nuhmei chun an thlîr zing a.

²⁰Maichâma inthawka meichawk chu vântieng ân tung lai chun LALPA vântirko chu maichâma meichawka chun a tungin a fe ta a; Manoa le a nuhmei chun an thlîr zing a, hnuoia chun an bawkkhup dêr el ta a.

²¹Amiruokchu, LALPA vântirko chu Manoa le a nuhmei kuoma chun a hung inlâr nâwk ta naw a. Chuongchun, Manoa chun LALPA vântirko a nih ti a hriet ta a.

²²Chun, Manoa chun, a nuhmei kuomah, “Ei thi ngei ding a nih, Pathien ei hmu tlat si a,” a ti a.

²³A nuhmei ruok chun a kuomah, “LALPAIN mi sukhlum a tum dâm chun pumrawhmang thilinhlân le fâk ding thilinhlân ei inhlânhai kha pawm nuom da ni ie, hieng ang po pohai dâm hi min entir naw bawk a ta, hieng ang thilhai khawm hi tuta ṭum hin mi hril naw bawk a tih,” a ti a.

²⁴Chun, nuhmei chun naupasal chu a hung nei ta a, a hmingah Samson an sak a; chun, nautê chu a hung inṭhanglien a, LALPAIN ama chu mal a sâwm a.

²⁵Chun, Zora le Estaol inkâra Mahane-dana chun LALPA thlarauin ama chu a khîkhar ṭan ta a.