Read Hmar RORELTUHAI 16 Bible Online

RORELTUHAI 16 - Hmar bible

RORELTUHAI 16

¹Samson chu Gazaah a fe a, chutaka chun nawchizawr hi a hmu a, a kuomah a lût ta a.

²Chun, “Samson chu hitaka hin a hung ie,” tiin Gaza mihai chu an hril a. Chuongchun, an inhuol ta a, khawpui kul kawtkhâra chun zânkhawvâr an inchân a, zânkhawvâr chun an to ṭhiep a, “Khuo hung var phawt phawt sien, chuongchun, ei that ding annâwm,” an ti a.

³Nisienlakhawm, Samson chu zânril chenin a zâl a, zânril lai chun a tho a, khawpui kul kawtkhârhai le a ban pahni chu a chel a, a kilnahai chen a phawidawk vawng a, a liengkoin a put a, Hebron zâwn tlâng sîp chenin a hang put kai a.

⁴A nakie deu chun Sorek ruoma mi nuhmei pakhat a dit zâwng ta a, a hming chu Delila a nih.

⁵Chun, Philistin mihai mi lienhai chu a kuoma chun an hang fe a, a kuomah, “Ama chu kan hne a, khuopa kan sawisak theina dingin a hrâtna san hi hriet tumin zâwr raw khai, chuongchun, kan rêng hin tangka sâng khat le za khat pe seng kan ti che,” an ti a.

⁶Chuongchun, Delila chun Samson kuoma chun, “I hrât hlena san hi mi hril raw khai, iengtin am sawisak dinga khuop thei ning i ti a?” a ti a.

⁷Samson chun a kuomah, “Thalhrui thar la ṭâwl lo pasariin mi khuop sienla, chuongchun, hrât naw ning a, mi dang ang el bawk nîng ka tih,” a ti a.

⁸Chun, Philistin mi mi lienhai chun thalhrui thar pasari la ṭâwl hlek lohai chu an pêk a, chuonghai chun a khuop ta a, Pindan sûng rilah inchânrutuhai an sie a.

⁹Chun, a kuomah, “Samson, Philistin mihaiin an hung thaw ding che a nih ie,” a ti a. Chun, thalhruihai chu meiin ziza hrui pawn a kâng tan ang el hin a suktan ta a. Chuongchun, a hrâtna san chu hriet a ni naw a.

¹⁰Chun, Delila chun Samson kuomah, “Ngai ta, i mi hlêm a, khêl i mi hril a nih, ieng anga khuop thei am i ni ding a na mi hril ta raw khai,” a ti a.

¹¹“Hruihruol thar la hmang hlek lovin mi khuop hai sienla, chuongchun, hrât ta naw ning a, mi dang ang el bawk nîng ka tih,” a ti a.

¹²Chuongchun, Delila chun hruihruol thar a lâk a, a khuop ta a; chun, a kuomah, “Samson, Philistin mihaiin an hung thaw ding che a nih ie,” a ti a. Pindan sûng rila chun ân chânrutuhai kha an um a. Chun, a kut khuopna chu patzai suktan ang elin a hang suktan ta a.

¹³Chun, Delila chun Samson kuomah, “I mi la hlêmin, khêl i mi la hril ta rawp a ni hi, ieng anga khuop thei ding am i ni a, mi hril raw khai,” a ti a. Ama chun, “ka sam phier sari hi puonah khâwng sa la, kilnain kildet la; chuongchun, hrât ta naw ning a, mi dang ang bawk ni el ka tih,” tiin a dawn a.

¹⁴Chuongchun, a sam phier sari chu puonah a khâwngsa a, kilnain a kilde tlat a, a kuomah, “Samson, Philistin mihaiin an hung thaw ding che a ni ie,” a ti a. Chuongchun, a in chu a hung har a, puonkawl kildena chu a kawl le a pat pumin a keidawk ta vawng el a.

¹⁵Chun, a kuomah, “I lungril hi i mi pêk hlek si naw a, iengtiziea, ‘Ka hmangai che,’ ti thei am i ni leh? Hi ṭum thum rau i mi hlêmna i suklang ta a, i hrât vieuna san hi i mi la hril dêr da el a” a ti a.

¹⁶Chuonga ni tin ela a mawr rak a, a ngên tlut tlut leiin, thina khawp rauin a lungvar a hung lunginzîng ta a.

¹⁷Chuongchun, a lungril po po chu a hril ta vawng a, a kuomah, “Ka lua hin bakmêt chem hrim ruoi a la ni ngai naw a, ka nu sula ka um laia inthawka Pathien ta dinga Nazarit mia hung um ka ni a, tuhin hung invaw ta lang chu ka hrâtna chu bo vawng el a tih; chuongchun, hung hrât nâwng ka ta, mi dang ang bawk hung ni el ka tih,” a ti a.

¹⁸A lungril po po chu a hril vawng an tah ti Delila chun a hriet phingleh Philistin mihai mi lienhai chu, “La hung nâwk phawt ta u, a lungril po po chu a mi hril vawng a ni tah,” tiin ân cha tâwl ta a. Chuongchun, Philistin mihai mi lienhai chu a kuoma chun an hang fe a, tangka chu an chawi a.

¹⁹Chun, a mal chungah a in innghiltir a, chun pasal a ko a, a sam phier sari chu ân âttantir ta vawng a, a sawisa ṭan ta a; chuongchun, a hrâtna chu a hung bo vawng el ta a.

²⁰Chun, “Samson, Philistin mihaiin an hung thaw ding che a ni ie,” a hang ti a: chun, a in chu a hang har a, “Ni dang ang bawk khan suok nâwk el ka ta, intleng suok nâwk el naw ning am,” a ti a, LALPAIN a mâksan tah ti hrim a hriet naw a.

²¹Chun, Philistin mihai chun an man a, a mit an kheldawkpêk a, Gaza khuoah an fe thlâkpui a, dâr kawlhai an inbuntir a, lung inah bu a râwt nawi hlak a.

²²Nisienlakhawm, a lu vâw kha a lua sam chu a hung sei nâwk ta a.

²³Chun, Philistin mihai mi lienhai chu an pathien Dagon kuoma inthâwina ropuitak inhlân ding le insukhlim dingin an pung khâwm tâwl a, “Ei pathienin ei hmêlmapa Samson a mi pêk tah annâwm,” an ti a.

²⁴Chun, mipuihai chun an hang hmu chun an pathien chu an inpâk a, “Ei pathienin ei hmêlmapa le ei ram suksetu, mi tamtak mi thattupa chu ei kutah a mi pêk tah annâwm,” an ti a.

²⁵Chuonga an lungril a hlim lai tak chun, “Samson kha ennuom dingin hung ko ta u,” an ti a. Chuongchun, Samson chu lung ina inthawk chun an va ko suok a, chuongchun an hmaa chun a thaw ta a, ban le ban inkâra hin an inngîrtir a,

²⁶Chun, Samson chu ama keitu naupang kuoma chun, “Hi in dotu ban hi mi hang inthemtir ta, hang innghai ka ti ie,” a ti a.

²⁷Chu in chu nuhmei le pasalin an sip mup el a; Philistin mihai mi lienhai po po chu chutaka chun an um vawng a, chun Samson ennuoma thlîrtuhai chu in chunga chun pasal le nuhmei sâng thum lai an um a.

²⁸Chun, Samson chun LALPA a ko a, “Aw Lalpa PATHIEN, ka hni che hi, mi hung hre zing la, ka hni che hi, tuta ṭuma chau bêk hin mi hung sukhrât la, aw Pathien, ka mit khing hni phuba hi Philistin mihai chunga hin hang la vak ka tih,” a ti a.

²⁹Chun, Samson chun chu in dotuhai tak, sût pahni chu a hei them a, a kut changtiengin pakhat chu a ringsan a, a kut vawitiengin pakhat.

³⁰Chun, Samson chun, “Philistin mihai hi hang thichil ka ti a,” a ti a. Chuongchun, a theitâwpin a kûn rak a; chun, mi lienhai le mipui a sûnga umhai po po chu in chun a del ta a. Chuongchun, a dam laia a sukhlumhai nêk chun a thichilhai chu an tam lem a.

³¹Chun, a unauhai le a pa sûnghai po po chu an hung suok a, an lâk a, an hang zâwn a, Zora le Estaol inkâra a pa Manoa phûmna hmunah an phûm ta a. Chuongchun, kum sâwmhni Israelhai chungah ro a rêl a nih.