Read Hmar RORELTUHAI 18 Bible Online

RORELTUHAI 18 - Hmar bible

RORELTUHAI 18

¹Chuong lai chun Israel ramah lal an um naw a; chun Dan chihai chun ram hluo ding an zawng a: chuong lai chen khawm chun Israel chihai laia khan ram hluo ding an la chang si naw a.

²Chuongchun, Dan mihai chun an hnam pumpui laia mi, pasal ṭha panga, Zora le Estoal khuoa inthawkin ram va enthlithlai ding le va hre chieng dingin an tir a, an kuoma chun, “Va fe unla, ram chu va hre chieng ta u,” an ti a. Chuongchun, Ephraim tlâng rama Mika in chu an va tlung a, chutaka chun an riek ta a.

³Mika in kâwla an um lai chun Levi chi tlangvâl râwl chu an hriet a, chu tieng chu an va pan a, a kuomah, “Tuin am hitaka hin a ṭhuoi che a? Hi hmuna hin ieng am i thaw a? Taka hin ieng thawa um che?” an ti a.

⁴Ama chun an kuomah, “Mika hin hieng ang hin a mi lo siem ta a, a mi ruoi a, a thiempuah ka um a nih,” a ti a.

⁵Chun, anni chun a kuomah, “Kan fena dinga hin kan tluongtlung ding le ding naw Pathien mi râwnpêk raw khai,” an ti a.

⁶Chun, thiempu chun an kuomah, “Thlamuongtakin fe ro khai, in fena ding chu LALPAIN a hrietpui zing cheu,” a ti a.

⁷Chuongchun, mi panga hai chu an suok ta a, Lais khuoah an va lût a, chutaka mihai chu Zidon mihai ang bawka râlmuongtak le lungmuongtaka iengkhawm tlasam[24] lova an um ṭawk ṭawkzie chu an va hmu a; chu rama chun anni hang sukse dinga thuneitu bîk khawm tukhawm an um chuong naw a, Zidon[25] mihai le hlak an inhlat a, tu le khawm inhmangna hrim an nei si nawh.

⁸Chun, Zora le Estaol khuoa unauhai kuoma an kîr nâwk chun, an unauhai chun an kuomah, “Ieng am hril ding in nei a?” an ti a.

⁹Anni chun, “Tho ro khai, hang thâwng ei tih, ram chu kan hang hmu ta ngei el le, a ṭha hle el a, in châng naw ding am a nih? Chu rama hang lûta hang hluo ding chun muong naw ro khai.

¹⁰In hang fe phawt chun râlmuonga um mihai a nih in hang hmu ding, a ram hlak chu a lien si a, Pathienin a pêk ta cheu a nih, hnuoia thil um chu iengkhawm tlâksam hlek lona hmun a nih,” an ti a.

¹¹Chuongchun, Zora le Estaola inthawk chun Dan hnamhai chu indona thuom inbelin mi za ruk an suok a.

¹²Chun, an hang fe a, Juda ram Kiriath-Jearimah an inkul a. Hi lei hin chu hmun chu tu chen hin Mahane-dan[26] an la ti a nih; chu chu Kiriath-Jearim thlangtienga um a nih.

¹³Chutaka inthawk chun Ephraim tlâng ram tieng chu an pan a, Mika in chu an va tlung a.

¹⁴Chun, Lais ram enthlithlai dinga suokhai mi panga chun an dawn a, an unauhai kuomah, “Hieng inhaia hin zakawsîng dâm, milim siem fâwm dâm, milim sung fâwm dâm, a um ti in hriet am? Chuleiin, tuhin ieng am in thaw ding ngaituo ro,” an ti a.

¹⁵Chun, chutaka inthawk chu an pêt a, Levi chi tlangvâl umna Mika in ngei chu an va tlung a, a chungchâng thu an indawn a.

¹⁶Chun, Dan mihai za ruk indona thuom inbelhai chu kul kawtkhâr bulah an ngîr a.

¹⁷Chun, mi panga ram enthlithlaituhai chu an hang fe a, an hang lût a, milim siem fâwm dâm, milim dâm, milim sung fâwm dâm chu an lâk a, chun, thiempu chu mi za ruk indona thuom inbelhai lai kul kawtkhâr bula chun a ngîr ve a.

¹⁸Chun, chuong mihai chu Mika inah an hang lût a, milim siem fâwm dâm, zakawsîng dâm, milim dâm, milim sung fâwm dâm an hang lâk chun, thiempu chun an kuomah, “Ieng am in thaw a ni leh?” a ti a.

¹⁹Anni chun, “To rawh, i kutin i bau kha hup la, kan kuomah hung ve la, kan paa le thiempuah hung um rawh; i ta dingin sûng khat chau thiempua um am a ṭha lema Israelhai laia chi khat le hnam khat ta dinga thiempua um?” an ti a.

²⁰Chun, thiempu lungril chu a lâwm hle el ta a, chuongchun, zakawsîng dâm, milim dâm, milim siem fâwm dâm chu a lâk a, mipui laia chun a ṭhang ve ta a.

²¹Chuongchun, an fe suok ta a, an nau le tehai le an ranhai, thuomhnawhai chu an sawm pei a.

²²Mika ina inthawka hla rei an hang fe hnung chun, Mika tuolbâwmhai chu an inpunkhâwm a, Dan mihai chu an va hnawt phâk ta a.

²³Chun, Dan mihai chu an hei ko a. Anni chu an hung ngha kîr a, Mika kuoma chun, “Ieng am a ni ta leh mi khâng zozai kha i hung pui?” an ti a.

²⁴Ama chun, “Ka pathien siemhai le thiempu chu in fepui a, in fe ta dai el a, ieng am nei ka nei ta leh? Iengti tia, ‘Ieng am i ni ta leh?’ mi ti el am in ni a?” a ti a.

²⁵Dan mihai chun a kuomah, “Keini lai hin ṭawng mei mei naw ta khai, chuong naw chun chu mi lunginrawm kut tuor rawi i tih; nang le i sûnghai hringna chân el rawi in tih,” an ti a.

²⁶Chun, Dan mihai chu an fe ta a, Mika chun ama ta dingin an hrât taluozie chu a hmuin a inah a kîr nâwk ta a.

²⁷Chuongchun, Mika thil siem le a thiempu nei chu fepuiin Lais khuo, râlmuonga um ṭawk ṭawkhai kuom chu an hang tlung a, kâwlhnâmin an hang that a, khuo chu an raw ta a.

²⁸Zidona inthawka a hang hlat êm leiin a hang sansuoktu ding hlak tukhawm an um si naw a; tuhai le hlak khawm inhmangna hrim an nei naw bawk a; Beth-rehob bul ruoma um a nih. Chun, khuo chu an siem nâwk a, chutaka chun an um ta a.

²⁹A khaw hminga chun Israel nau an thlatu Dan hming inchawiin Dan an inbûk a, a phut chun chu khuo chu Lais an ti hlak a nih.

³⁰Chun, Dan mihai chun milim siem fâwm chu anni ta dingin an inngîr ta a; chun, Mosie[27] nau Gersom naupa Jonathan le a naupasalhai chu, ram chu miin an lâk hmakhat chun Dan chihai thiempua chun an um ta a.

³¹Chuongchun, Silo khuoa Pathien in a um sûng po chun an inngîr ta a.