Read Hmar RORELTUHAI 20 Bible Online

RORELTUHAI 20 - Hmar bible

RORELTUHAI 20

¹Chuongchun, Israel thlahai po po chu an inthawk tâwl ta a, thukhat chelin, Dan khuoa inthawka Beer-seba chenin, Gilead rama mihai leh, Mizpaah LALPA kuomah an inkhâwm ta a.

²Chun, mi po po hotuhai, Israel chihai po po chen khawm chun Pathien mihai inkhâwmnaa chun an va ṭhang ve a, sipai kâwlhnâm chawi mi, nuoi li an nih.

³(Benjamin mihai chun Israel thlahai chu Mizpaa chun an hang fe ti an lo hriet a.) Chun, Israel thlahai chun, “Iengti ziea hieng anga rîtlona hi hung um am a ni a? mi hril ta u,” an ti a.

⁴Chun, Levi chi, nuhmei an that pasal chun, “Benjamin chihai umna khuo Gibeaah ka thaikêm leh riek tumin kan lût a.

⁵Chun, Gibea mihai chun an mi hung thaw ta a, zânah in an hung inhuol a, mi that an tum a, ka thaikêmnu chu an sawisa hrep a, a hung thi ta a.

⁶Chuongchun, ka thaikêm ruong chu ka lâk a, ka channâwi a, Israelhai ram hluo po poah ka thawn dar a nih. Israel rama hin thil tirdakumtak le invêtthlâktak an lo thaw ta si a.

⁷Nangni Israel thlahai, in rêng hin ngai ta u, in ngaidân le in remti dân chu hril ro khai,” a ti a.

⁸Chuongchun, mipui po po chu thukhat chelin an tho ṭhuop a, “Tukhawm mâni puon in tieng fe nâwm ei nih, tukhawm mâni ina khawm lût naw bawk ei tiu.

⁹Gibea mihai ei thaw dân ding chu hieng ang hi a nih:

¹⁰ṭhumvâwr ei ta, Israelhai chunga thil indik naw tak an thaw ang peia an thaw a, Gibea hmuna Benjamin mihai ei hang thawnaa mipuihai fâk ding lo inhlântu dingin Israel hnam po po laia mi za khatah sâwm pei, sâng khatah za pei, sîng khatah sâng pei thlang suok ei tih,” an ti a.

¹¹Chuongchun, Israel mihai po po chu chu khawpui thaw ding chun, mi pakhat anga insuikhawmin, an pungkhâwm ta a.

¹²Chun, Israel hnamhai chun Benjamin mihai po po kuoma chun, “Nangni laia hieng anga rîtlona hung um el ta hi iengtizie am a ni a?

¹³Gibeaa Belial nauhai chu hung ṭhuoi ro, chuongchun, Israel rama suol hi a re theina dingin lo sukhlum kan tih,” tiin mi an tir a. Nisienlakhawm, Benjamin chihai chun an unau Israel thlahai thuhril chu an lo pawm nuom naw a.

¹⁴Benjamin mihai chu Israel thlahai chu do dingin khawpuia inthawk dâmin an hung suok tâwl a, Gibeaa chun an lût tâwl a.

¹⁵Chun, chu nia Benjamin mihai khawpuia inthawka kâwlhnâm chawia suokhai chu, Gibeaa mi za sari thlang ṭhieu tiemsa lovin, mi sîng hni le sâng ruk an nih.

¹⁶Chuong po po lai chun vawikawlawng thlang ṭhieu za sari an um a, an rêng chun vailungdênga samzai ruol khawm ṭhel hlek lo mi an nih.

¹⁷Chun, Israel thlahai chu Benja-min mihai tiem lovin, kâwlhnâm chawi mi ṭhieu nuoi li an nih, chuonghai po po chu indo mi vawng an nih.

¹⁸Chun, Israel thlahai chu an tho a, Bethelah an hang fe a, Pathien an hang râwn a, “Benjamin mihai chu tu am a na hang thaw hmasa ding?” an ti a. LALPA chun, “Judahai hang fe hmasa raw se,” a ti a.

¹⁹Chuongchun, Israel thlahai chu zîngkâr an tho a, Gibea chu an hang inhuol a.

²⁰Chun, Israel thlahai chu Benjamin mihai thaw ding chun an inthawk a, anni thawna dingin Israel mihai chun Gibeaah ṭhanghmun an hang siem a.

²¹Benjamin mihai chu Gibea khuoa inthawk chun an hung suok a, chu ni chun Israel mihai lai chun mi sîng hni le sâng hni an hung that ta a.

²²Chun, mipui, Israel thlahai chu an hang infui tuo nâwk a, an thaw phut nia an thawna hmuna bawk chun thaw dingin ṭhang an hang siem nâwk a.

²³(Chun, Israel thlahai chu an hang fe a, Pathien hmaah zântieng chenin an hang ṭap a, “Kan unau Benjamin mihai hi do dingin kan hang inthawk nâwk ding am a nih?” tiin LALPA an indawn a. LALPA chun, “Hang thaw nâwk ro,” a ti a).

²⁴Chun a ni hni niin Israel thlahai chun Benjamin thlahai chu an hang hnai a.

²⁵Benjamin mihai khawm chu a ni hni ni chun thaw dingin Gibeaa inthawk chu an suok ve a, Israel thlahai lai chun sîng khat le sâng riet an hung that nâwk a, chuonghai po po chu kâwlhnâm chawi mi an nih.

²⁶Chuongchun, Israel thlahai po po le mipuihai po po chu an hang fe a, Bethela chun an hang fe a; an ṭap a. LALPA hmaah an ṭhung a; chu ni chun zântieng chenin bu an nghei a; LALPA kuomah pumrawhmang thilinhlân le inremna thilinhlânhai an inhlân a.

²⁷Chun, Israel thlahai chun LALPA an râwn a, (chuong lai chun chutaka chun Pathien Thuthlung bâwm chu a um a;

²⁸chun, chuong lai chun Aron naupa Eleazar naupa Phinehas chun a rawng a bâwl hlak a nih.) “Kan unau Benjamin mihai chu kan hang thaw nâwk ding am, kan tâwpsan el ta ding?” tiin. LALPA chun, “Hang fe ro, zînga chu chu in kutah ka pêk ta ding a nih,” tiin a dawn a.

²⁹Chun, Israelhai chun Gibea khuo vêla chun inchântu an insie rûk a.

³⁰Chun, Israel thlahai chu Benjamin mihai chu do dingin a ni thum ni chun an hang inthawk nâwk a, ni dang ang bawk khan Gibea khuo thaw ding chun ṭhang an hang siem nâwk a.

³¹Benjamin thlahai chu mihai chu do dingin an va suok a, khuo chu an suoksan a, chuongchun, ni dang ang bawk khan mihai chu thawin an that ṭan nâwk a, phûl faiah Bethel khuo hang fena le Gibea khuo lampuihaia chun Israelhai chu sâwmthum an that a.

³²Benjamin thlahai chun, “A hma ang bawk khan, ei hmaah an tlâwm nâwk ta le,” an ti a. Israel thlahai ruok chun, “Tlân ei tiu khai, khawpuia inthawk hi lamlienah intâwldawktir ei tiu,” an ti a.

³³Chuongchun, Israelhai po po chun an ṭhanghmun chu an suoksan a, Baal-tamar hmunah ṭhanghmun an siem a; chun, lo inchânrutu Israelhai kha an ṭhanghmun Maare-geba[30] hmuna inthawkin an hung suok a.

³⁴Chun, Israel mihai laia thlang ṭhieu sîng khatin Gibea khuo chu an thaw a, an inthaw chu a nasa hle el a, nisienlakhawm, anni chun an chan a se ngei ding a nih ti an hriet nawh.

³⁵LALPAIN Benjamin mihai chu Israelhai hmaa chun a sukhlum ṭeu a; Israel thlahai chun chu ni chun Benjamin mi sîng hni le sâng nga le za khat an that a, chuonghai po po chu kâwlhnâm chawi mi vawng an nih.

³⁶Chuongchun, Benjamin mihai chun an tlâwm an tah ti an inhriet ta a, Israel thlahai chun Gibea khuo thaw dinga arûka inchântuhai an sie kha an ringzo leiin Benjamin mihai an hang hnungintawl san a nih.

³⁷Chun, arûka inchântuhai chun Gibea khuo chu an baw ta thut a, arûka inchântuhai chu an inzar dar a, khuoa mihai po po chu kâwlhnâmin an thaw ta rak el a.

³⁸Israel thlahai le arûka inchântuhai kha an intiemna chu khawpui sûnga mei sukkhûk lui lui phaleh

³⁹Israel thlahai chun indona chu thaw ṭan ve ding ti a nih. Benjamin mihai chun an hang thaw ṭan a, Israel mihai chu sâwmthum lai an that a, “Ei inthaw phut ni ang bawk khan an tlâwm nâwk ta ngei el le,” an ti a.

⁴⁰Nisienlakhawm, khawpui sûnga chun meikhu chu a hung intung ta lui phingleh, Benjamin mihai chu an hei nghaleh a, khawpui chu a puma vân tienga khu tung ta lui lui el chu an hei hmu a.

⁴¹Chun, Israel thlahai chu an hung inher nâwk ta a, Benjamin mihai chu an lunginzîng ta hle a, an chan a se ding a nih ti an hriet ta leiin.

⁴²Chuleiin, Israelhai hmaa chun thlalêr tieng ân tlânse ta a; nisienlakhawm, an hnawtzui ta ngat ngat a, khawpuia inthawka hung suokhai chun chutaka chun an sukhlum a.

⁴³Benjamin mihai chu an inhuol ta tlat a, an hnawt a, nisa suokna tieng Gibea dep an châwlna hmunah an hnawt phâk a.

⁴⁴Benjamin mihai chu mi sîng khat le sâng riet an thi a, an rêng el chun mi hrât huoisen ṭhieu an nih.

⁴⁵Chun, an intâwl a, thlalêr tieng Rimmon lungpuiah an tlânsie a; mi sâng nga chu lamlienhaia chun an that a, Gidom chenin an hnawtzui ngat ngat a, mi sâng hni an that a.

⁴⁶Chuongchun, chu nia Benjamin mi thihai po chu kâwlhnâm chawi mi ṭhieu sîng hni le sâng nga an nih, an rêng chun mi hrât huoisen an nih.

⁴⁷Mi za ruk ruok chu thlalêr tieng Rimmon lungpuiah an tlânsie a, chu Rimmon lungpuia chun thla li an um a.

⁴⁸Chun, Israelhai chu Benjamin mihai chunga chun an inthawk nâwk a, khawpui sûnga mi taphawt chu ranhai an hmu taphawt khawm kâwlhnâmin an sât hlum pei a; chu nawa khawm khuo an hmu taphawt chu an raw pei a.